1 SAMUEL 16
16
Lac Yum tsi' yajca David
1Lac Yum tsi' sube Samuel: ¿Jayp'ejl to q'uin mi caj a chʌn mel a pusic'al cha'an Saúl, cha'an tsa'ix c chilbe i yumʌntel ti' tojlel israelob? But'u a xulub ti aceite. Ch'ʌmʌ majlel a wic'ot. Mi caj c choquet majlel ba'an Isaí ti Belén, come tsa'ix c yajca juntiquil i yalobil Isaí cha'an mi' yochel ti rey, che'en. 2Samuel tsi' jac'ʌ: ¿Bajche' mi mejlel c mel jini? Mi tsa' caji i yubin Saúl che' ya' añon, mi caj i tsʌnsañon, che'en. Lac Yum tsi' sube: Yom ma' pʌy majlel juncojt xch'oc wacax. Subeñob: “Tsa' tili c tsʌnsʌben i majtan lac Yum”. Che'ʌch yom ma' subeñob. 3Pʌyʌ majlel Isaí ya' ba' ma' tsʌnsʌbeñon c majtan. Ya'i mi caj c pʌsbeñet chuqui mi caj a mel. Mux caj a mul ti aceite jini yajcʌbil bʌ c cha'an mu' bʌ caj c pʌsbeñet, che'en lac Yum.
4Che'ʌch tsi' mele Samuel che' bajche' tsi' sube lac Yum. Che' bʌ tsa' c'oti ti Belén, jini xñoxob ti tejclum tsa' loq'ui i tajob, tsiltsilñayob ti bʌq'uen. Tsi' yʌlʌyob: ¿Tsa' ba tili a wʌq'ueñon lojon i yutslel a t'an? che'ob. 5Samuel tsi' jac'ʌ: La' ñʌch'lec la' pusic'al. Tsa' tili c tsʌnsʌben i majtan lac Yum. Yom mi la' sʌq'uesan la' bʌ cha'an temel mi la cʌq'uen i majtan lac Yum, che'en. Samuel tsi' sʌq'uesa Isaí ja'el yic'ot i yalobilob. Tsi' pʌyʌyob ya' baqui yom i tsʌnsan majtañʌl.
6Che' bʌ tsa' tiliyob, Samuel tsi' wen q'uele Eliab. Tsi' ña'ta: Wʌ'ix wa'al Eliab ti' tojlel lac Yum. Jiñʌch i yajcʌbal lac Yum, lon che'en. 7Pero lac Yum tsi' sube Samuel: Mach a lon q'uelben i wut yic'ot i bʌc'tal jini winic, come tsa'ix c ñusa. Ma'anic mic ch'ʌm tic wenta anquese wen i t'ojol jax, anquese wen chan. Joñon mach lajalic mij q'uel che' bajche' winicob. Cojach mi' q'uelbeñob i bʌ i wut pero joñon mij q'uelbeñob i pusic'al, che'en. 8Che' jini Isaí tsi' pʌyʌ tilel Abinadab cha'an mi' ñumel ti' tojlel Samuel, pero tsi' yʌlʌ: Mach yajcʌbilic i cha'an lac Yum ja'el iliyi, che'en. 9Che' jini Isaí tsi' choco ñumel Sama, pero tsi' yʌlʌ: Mach yajcʌbilic i cha'an lac Yum iliyi, che'en. 10Isaí tsi' choco ñumel wuctiquil i yalobilob ti' tojlel Samuel. Pero Samuel tsi' sube Isaí: Lac Yum ma'anic tsi' yajcayob, che'en. 11Samuel tsi' c'ajtibe Isaí: ¿Cojix ba a walobilob iliyi? che'en. Isaí tsi' jac'ʌ: Anto yambʌ. Jiñʌch ijts'iñʌl bʌ mu' bʌ i cʌntan tiñʌme', che'en. Jini cha'an Samuel tsi' sube Isaí: Pʌyʌ tilel, come mach mejliconla ti buchtʌl jinto mi' tilel ilayi, che'en. 12Jini cha'an Isaí tsi' pʌyʌ tilel jini ijts'iñʌl bʌ. Chʌcwaxan i wut. Wen i t'ojol i wut. Wen uts'at ti q'uelol. Lac Yum tsi' yʌlʌ: Ch'ojyen ti ora. Wa'chocon ti' ye'tel come jiñʌch iliyi. 13Samuel tsi' ch'ʌmʌ jini xulub but'ul bʌ ti aceite. Tsi' bombe i jol ti' tojlel i yʌscuñob. Ti jim bʌ ora jini Ch'ujul bʌ Espíritu i cha'an lac Yum tsa' c'oti ti' tojlel David. Samuel tsa' cha' sujti ti Ramá.
David mi' ñijcan música ba'an Saúl
14I yEspíritu lac Yum tsi' tʌts'ʌ i bʌ ba'an Saúl. Jini jontol bʌ espíritu chocbil bʌ tilel cha'an lac Yum tsa' caji i tic'lan. 15Jini x'e'telob i cha'an Saúl tsi' subeyob: Awilan wolix i tic'lañet jontol bʌ espíritu chocbil bʌ tilel cha'an Dios. 16Subeñob jini x'e'telob a cha'an, cha'an mi' sʌclañob juntiquil yujil bʌ i ñijcʌntel arpa. Che' wen ch'ijiyem a pusic'al cha'an jini jontol bʌ espíritu chocbil bʌ tilel i cha'an Dios, mi' caj ti lajmel a wocol che' mi' ñijcʌntel jini arpa, che'ob. 17Jini cha'an Saúl tsi' sube jini x'e'telob i cha'an: Yom mi la' sʌclan juntiquil wen yujil bʌ i ñijcʌntel arpa. Pʌyʌ tilel ba' añon, che'en.
18Juntiquil x'e'tel tsi' yʌlʌ: Q'uelbilix c cha'an juntiquil i yalobil Isaí ti Belén, wen yujil bʌ i ñijcʌntel arpa. Cabʌlʌch i pusic'al. Wen ch'ejl ja'el. Lac Yum mi' coltan, che'en. 19Jini cha'an Saúl tsi' choco majlel winicob cha'an mi' subeñob Isaí: Chocbeñon tilel David woli bʌ i cʌntan tiñʌme', che'en. 20Isaí tsi' p'ʌtʌ ti juncojt burro cabʌl caxlan waj, yic'ot jump'ejl pʌchi but'ul bʌ ti' ya'lel ts'usub, yic'ot juncojt alʌ chivo. Tsi' laj choco majlel ti' wenta David i yalobil cha'an mi' yʌq'uen Saúl. 21Jini cha'an David tsa' tili ba'an Saúl. Tsa' caji' melben i ye'tel. Saúl tsi' c'uxbi David. Tsi' yʌq'ue i ye'tel ti' tojlel. 22Tsi' choco majlel winic cha'an mi' suben Isaí: Awocolic mij c'ajtibeñet, la' to cʌlec David quic'ot, come wolix i wen ñuq'uesʌbeñon c pusic'al, che'en. 23Ba' ora tsa' tili i tic'lan Saúl jini jontol bʌ espíritu chocbil bʌ tilel ti Dios, David tsa' caji i jats' jini arpa. Saúl tsa' cha' caji i yubin i tijicñʌyel yic'ot i c'oc'lel. Jini jontol bʌ espíritu tsi' cʌyʌ i tic'lan.
Currently Selected:
1 SAMUEL 16: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.