1 SAMUEL 15
15
Tsa' chojqui Saúl cha'an tsi' ñusa t'an
1Samuel tsi' sube Saúl: Lac Yum tsi' chocoyon tilel cha'an mic wa'chocoñet ti rey ti' tojlel Israel. Jini cha'an yomix ma' wen ñich'tʌben i t'an lac Yum. 2Lac Yum i Dios Panchan yic'ot Pañimil woli' yʌl: “Joñon mi caj cʌq'ueñob wocol jini amalecob cha'an tsi' tic'layob israelob che' bʌ tsi' mʌcbeyob i bijlel che' loq'uemobix ti Egipto. 3Jini cha'an yomix ma' majlel a tsʌnsan jini amalecob. Jisan pejtelel chuqui añob i cha'an. Mach ma' wis p'untañob mi winicob mi x'ixicob, mi alʌlob anquese woliyob to ti chu', mi wacax, mi tiñʌme', mi camello, mi burro. Laj jisañob”, che'en.
4Jini cha'an Saúl tsi' tempa tilel winicob ya' ti Telaim, lujunc'al mil soldadojob yic'ot lujump'ejl mil winicob loq'uemo' bʌ ti Judá. 5Che' bʌ woli' tilel Saúl ti colem tejclum i cha'an amalecob, tsi' subeyob wa'tʌl xq'uelojelob ya' ti joctʌl. 6Tsi' choco majlel winicob cha'an mi' subeñob jini ceneojob: Cucula ti loq'uel wʌ' ba'añetla. Yom mi la' tʌts' la' bʌ ba'an jini amalecob, ame jisʌntiquetla yic'otob. Com j coltañetla cha'an uts tsa' la' pʌsʌ la' bʌ ti' tojlel israelob che' bʌ tsa' letsiyob loq'uel ti Egipto, che'en Saúl. Jini cha'an tsi' tʌts'ʌyob i bʌ jini ceneojob ti' tojlel amalecob. 7Saúl tsi' jisa majlel amalecob c'ʌlʌl ti Havila, c'ʌlʌl ti Shur, am bʌ ti' tojel Egipto ba' mi' pasel q'uin. 8Saúl tsi' chucu Agag i rey amalecob. Cuxul to tsi' cʌchʌ. Tsi' laj jisayob i contrajob, winicob yic'ot x'ixicob. 9Pero ma'anic tsi' tsʌnsayob Agag yic'ot jini wen tac bʌ tiñʌme', yic'ot jini uts'at tac jax bʌ wacax, yic'ot pejtelel yan tac bʌ alʌc'ʌl wen jujp'em tac bʌ. Tsi' lotoyob. Ma'anic tsi' jisayob. Pero jini mach bʌ ch'ejlic tsi' jisayob ti pejtelel.
10Tsa' c'oti i t'an lac Yum ba'an Samuel: 11Ch'ijiyem c pusic'al cha'an tsa cotsa ti rey jini Saúl, come tsa'ix i tʌts'ʌ i bʌ tic tojlel. Ma'anic woli' jac'beñon c t'an, che'en. Tsi' wen mele i pusic'al Samuel. Jump'ejl ac'ʌlel c'ʌlʌl tsa' sʌc'a tsi' pejca lac Yum ti c'am bʌ t'an. Tsi' cha'le uq'uel. 12Wen seb tsa' ch'ojyi Samuel cha'an mi' majlel i taje' Saúl. Jini winicob tsi' subeyob: Tsa'ix c'oti Saúl ti Carmel ya' ba' tsi' wa'choco jini wa'al bʌ xajlel cha'an mi' yʌc' i bʌ ti ña'tʌntel. Ti' wi'il tsi' xoyo i bijlel. Tsa' majli ti Gilgal, che'ob. 13Samuel tsa' majli ba'an Saúl. Saúl tsi' yʌlʌ: La' i yʌq'ueñet lac Yum i yutslel i t'an. Joñon tsa'ix c jac'be i mandar lac Yum, che'en. 14Pero Samuel tsi' sube: ¿Chucoch woli cubiben i t'an jini tiñʌme' tac, yic'ot i yuq'uel jini wacax? che'en. 15Saúl tsi' jac'ʌ: Jini winicob tsi' chilbeyob jini amalecob. Tsi' lotoyob jini uts'at tac bʌ alʌc'ʌl cha'an mi' yʌq'ueñob tsʌnsʌbil bʌ i majtan lac Yum Dios. Pejtelel jini yan tac bʌ tsa'ix c laj jisa lojon, che'en. 16Samuel tsi' sube Saúl: Pijtan to. Mi caj c subeñet chuqui tsi' yʌlʌ lac Yum sajmʌl ti ac'ʌlel, che'en. Saúl tsi' jac'ʌ: Subeñon, che'en. 17Samuel tsi' yʌlʌ: Che' pec' tsa' q'uele a bʌ, ¿mach ba anic tsa' ochiyet ti' rey ti' tojlel jini lajchʌnmojt israelob? Lac Yum tsi' yajcayet cha'an ma' wochel ti' rey Israel. 18Che' bʌ tsi' chocoyet majlel lac Yum, tsi' wersa subeyet cha'an ma' jac'ben i t'an. Tsi' subeyet: “Yom ma' laj jisan jini xmulilob ti' lumal Amalec jinto mi laj chʌmelob jini amalecob”. 19¿Chucoch ma'anic tsa' jac'be i t'an lac Yum? Tsa' loto jini chubʌ'añʌl. Che' jini tsa'ix a cha'le ñuc bʌ mulil ti' contra lac Yum, che'en.
20Saúl tsi' jac'be Samuel: Tsa' cu c jac'be i t'an lac Yum. Tsa' majliyon ya' ba' tsi' subeyon c Yum. Cojach tsac pʌyʌ tilel Agag i rey jini amalecob. Pejtelel jini yaño' bʌ tsac laj jisayob. 21Pero jini winicob tsi' yajcayob pejtelel jujp'em tac bʌ tiñʌme' yic'ot wacax mu' bʌ caj i wersa tsʌnsʌntel cha'an mi cʌq'uen lojon tsʌnsʌbil bʌ i majtan Dios wʌ' ti Gilgal, che'en.
22Samuel tsi' yʌlʌ: ¿Tijicña ba mi' q'uel lac Yum jini pulbil bʌ i majtan yic'ot tsʌnsʌbil bʌ i majtan che' ma'anic wola' jac'ben i t'an? Yom cu mi la cʌq'uen tsʌnsʌbil bʌ i majtan Dios. Pero ñumen yom mi lac jac'ben i t'an. 23Jini mu' bʌ i ñusʌben i t'an Dios lajalʌch i mul bajche' xwujt. Lajal i mul jini tsʌts bʌ i pusic'al bajche' jini mu' bʌ i ch'ujutesan dioste' tac. Tsa'ix a ñusʌbe i t'an lac Yum. Jini cha'an chojquemetix loq'uel ti a yumʌntel. Ma'anix mi caj a chʌn ajñel ti rey, che'en.
24Saúl tsi' sube Samuel: Isujm tsac taja c mul. Tsac ñusʌbe i t'an lac Yum yic'ot a t'an cha'an mic tajben i yutslel i t'an winicob. Jini cha'an tsac jac'beyob i t'an. 25A wocolic ñusʌbeñon c mul. Mach a cʌyon. La' quic'ot che' mic cha' sujtel cha'an mic majlel c ch'ujutesan lac Yum, che'en. 26Pero Samuel tsi' sube Saúl: Ma'anic mic majlel a wic'ot, come tsa'ix a ts'a'le i t'an lac Yum. Jini cha'an lac Yum tsa'ix i chilbeyet a yumʌntel ti' tojlel Israel, che'en. 27Che' bʌ tsi' sutq'ui i bʌ Samuel, Saúl tsi' chucu ti' bujc Samuel. Tsi' jet' tsilbe i bujc. 28Samuel tsi' sube: Lac Yum tsa'ix i chilbeyet a yumʌntel ti Israel. Tsa'ix i yʌq'ue yambʌ winic ñumen wen bʌ bajche'et. 29Jini Dios i ñuclel bʌ Israel mach yujilic lot. Ma'anic mi' yʌn i t'an, come mach lajalic Dios bajche' winic mu' bʌ i cha' wi'il q'uextan i t'an, che'en.
30Saúl tsi' yʌlʌ: Isujm tsa'ix c taja c mul, pero ti wocol t'an mij c'ajtibeñet cha'an ma' q'uelon ti ñuc ti' tojlel jini xñoxtacob ila tic tejclum yic'ot ti' tojlel israelob. Che' jini mi caj c ch'ujutesan a Yum Dios, che'en. 31Jini cha'an Samuel tsi' pi'le majlel. Saúl tsi' ch'ujutesa lac Yum. 32Samuel tsi' yʌlʌ: Pʌybeñon tilel Agag i rey amalecob, che'en. C'unte' tsa' c'oti ba'an Samuel jini Agag. Tijicña i wut che' bʌ tsi' yʌlʌ: Melel, ma'anix bʌq'uen. Tsa'ix ñumi i yorajlel chʌmel, che'en. 33Samuel tsi' yʌlʌ: Che' bajche' tsa' tsʌnsa winicob cha'an mi' sujtelob ti meba' i ña'ob, che' ja'el mic tsʌnsañet wʌle. Meba'ix mi caj i cʌytʌl a ña', ma'anix i yalobil, che'en. Che' jini Samuel tsi' bic'ti tsepe Agag ti' tojlel lac Yum ya' ti Gilgal.
34Tsa' sujti Samuel ya' ti Ramá. Saúl tsa' majli ti Gabaa. 35C'ʌlʌl che' bʌ tsa' chʌmi Samuel ma'anix ba' ora tsi' chʌn q'uele Saúl. Pero tsi' chʌn mele i pusic'al cha'an i mul Saúl. Lac Yum tsi' mele i pusic'al ja'el cha'an tsi' lon otsa ti rey ti' tojlel israelob.
Currently Selected:
1 SAMUEL 15: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.