1 SAMUEL 14
14
1Jonatán tsa' caji' suben jini x'e'tel i cha'an mu' bʌ i ch'ʌmben majlel i ye'tijib cha'an guerra: Conla, la' c'axiconla ya' ti wits ba' tempʌbilob jini filisteojob, che'en. Pero ma'anic tsi' sube i tat. 2Ya' tsa' cʌle Saúl ti yebal granado te' am bʌ ti Migrón ti' junwejlel Gabaa, yic'ot lujunc'al i chabajc' (600) winicob. 3Ya'an ja'el Ahías (i yalobil Ahitob, i yʌscun Icabod). (Jini Ahitob i yalobilʌch Finees i yalobil bʌ Elí, jini motomaj i cha'an lac Yum ti Silo.) Ahías lʌpʌl i cha'an jini bujcʌl cha'an i ye'tel Dios. Ma'anic majch tsi' ña'ta mi mach chʌn ya'ix an Jonatán. 4Ya' ti' bijlel filisteojob ba' yom ñumel Jonatán cha'an mi' majlel i tajob, an cha'p'ejl colem xajlel, jay ts'ucan bʌ i ni' ti jujunwejl bij. Jump'ejl xajlel i c'aba' Boses, jini yambʌ i c'aba' Sene. 5Ya' wa'al jump'ejl xajlel ti norte ti' tojel Micmas. Yambʌ an ti sur ti' tojel Gabaa.
6Jonatán tsi' sube jini x'e'tel i cha'an mu' bʌ i ch'ʌmben majlel e'tijibʌl cha'an guerra: Conla ti ñumel ya' ba' añob jini mach bʌ tsepbilobic i pʌchʌlel. Tic'ʌl mux i coltañonla lac Yum, come cabʌl i p'ʌtʌlel jini lac Yum. Mi' c'ʌn winicob ti' ye'tel. Mi cabʌlob o mi ma'anic jaytiquil, junlajal ti' wut, che'en. 7Jini i yaj cuch e'tijibʌl tsi' jac'ʌ: Concula. Mele pejtelel chuqui a wom. Jump'ejl jach lac pusic'al. Ya'to mij coltañet ti pejtelel chuqui ma' mel, che'en. 8Jonatán tsi' yʌlʌ: Conla ti c'axel ya' ba' mi caj i q'uelonla jini filisteojob. 9Mi tsi' subeyonla: “Pijtañon lojon jinto mij c'otel lojon ya' ba' añetla”, mi che'ob, ya' jach mi caj lac wa'tʌl lac pijtañob. Che' jini ma'anic mi caj lac letsel majlel lac tajob. 10Pero mi tsi' subeyonla: “Letsenla tilel ilayi”, mi che'ob, mux caj lac letsel. Che' jini mux i mʌjlel lac cha'an, come lac Yum tsa'ix i yʌc'ʌyob ti laj c'ʌb cha'an mi lac jisañob. Mi caj lac ña'tan wolix i coltañonla lac Yum, che'en Jonatán.
11Tsa' majliyob ba' tsi' q'ueleyob filisteojob. Jini filisteojob tsi' yʌlʌyob: Awilan wolix i cha' loq'uelob jini hebreojob ya' ba' muculob ti ch'en tac ba' tsa' puts'iyob, che'ob. 12Tsi' subeyob Jonatán yic'ot i yaj cuch e'tijibʌl: Yom mi la' letsel tilel ba' añon lojon. An chuqui com c subeñet lojon, che'ob. Che' jini Jonatán tsi' sube i yaj cuch e'tijibʌl: Yom ma' letsel tilel tic pat. Come lac Yum tsa'ix i yʌc'ʌyob ti' c'ʌb Israel, che'en. 13Tsa' ts'ujyi letsel Jonatán. Tsa' letsi ja'el jini xcuchijel ti' pat. Jonatán tsi' jats'ʌ majlel jini filisteojob ti jujuntiquil. Jini i yaj cuch e'tijibʌl tsa' bʌ majli ti' pat i yum tsi' tsʌnsayob. 14Ya' ba' tsa' c'otiyob ti ñaxan ti' tejchibal guerra, Jonatán yic'ot i yaj cuch e'tijibʌl tsi' tsʌnsayob che' bajche' junc'al winicob. Pam pujquem tsi' cʌyʌyob jini ch'ujlelʌlob ya' ti xajlelol. 15Che' jini tsa' cajiyob ti wen bʌq'uen pejtelel jini filisteojob ya' ba' añob. Tsa' tili i yujquel lum ja'el. Pejtelel winicob tsa' toj sajtiyob i pusic'al.
16Jini i yaj q'ueloñelob Saúl año' bʌ ti Gabaa ti' lumal Benjamín tsi' q'ueleyob tʌctʌcñayob jini winicob ya' ba' woli yujquel lum. 17Che' jini Saúl tsi' sube i winicob ya' ti Gabaa: Yom mi la' wen q'uel mi an majch tsa' loq'ui ti lac tojlel, che'en. Che' jini tsa' caji' q'uelob, mach ya'ic an Jonatán yic'ot i winic mu' bʌ i ch'ʌmben majlel i ye'tijib cha'an guerra. 18Saúl tsi' sube Ahías: Ch'ʌmʌ tilel jini Arca i cha'an bʌ lac Yum, che'en. Come ti jim bʌ ora ya'an jini Arca ti' tojlel jini israelob. 19Che' bʌ woli to ti t'an Saúl yic'ot jini motomaj, woli' p'ojlel ju'ucña bʌ t'an ba' woliyob ti wocol jini filisteojob. Ju'ucña tsi' yubibeyob i t'an. Jini cha'an Saúl tsi' sube jini motomaj: Tʌts'ʌ a c'ʌb, cʌyʌx, che'en. 20Saúl tsi' tempa pejtelel jini winicob ya' bʌ añob. Tsi' pʌyʌyob ya' baqui woliyob ti guerra. Che' bʌ tsa' caji i q'uelob, awilan woli' jats'ob i bʌ ti espada jini filisteojob. Sojquemob i jol cha'an bʌq'uen. 21Jini hebreojob tsa' bʌ cʌjchiyob majlel cha'an jini filisteojob ti yambʌ ora cha'an mi' coltañob ti' ye'tel, tsa' tiliyob i coltan i pi'ʌlob israelob am bʌ ti' wenta Saúl yic'ot Jonatán. 22Jini israelob tsa' bʌ cʌn puts'iyob ya' ti te'el i c'aba' Efraín tsa' tiliyob ja'el che' bʌ tsi' yubiyob woliyobix ti puts'el jini filisteojob. Tsa' caji' yajñesañob ja'el. 23Che' jini lac Yum tsi' wen colta jini israelob ti jim bʌ q'uin. Tsa' c'ʌlʌ c'otiyob ti guerra ti Betavén.
24Pero pejtelel jini israelob tsi' yubiyob wocol ti jini q'uin, come Saúl tsi' wʌn subeyob: Majqui jach mi' c'ux i bʌl i ñʌc' che' anto q'uin, che' maxto anic tsa' mʌjli lac cha'an ti guerra, mux i chojquel ti Dios jini winic, che'en. Jini cha'an ma'anic chuqui tsi' wis c'uxuyob ti jini q'uin. 25Tsa' ñumiyob ti jumpejt te'el ba' wen cabʌl chab ti' petol jini lum. 26Pero ma'anic majch tsa' mejli i jap, come añob i bʌq'uen ame chojquicob ti Dios che' bajche' tsi' yʌlʌ Saúl. 27Pero ma'anic ubibil i cha'an Jonatán chuqui tsi' yʌlʌ i tat che' bʌ tsi' tiq'uiyob. Tsi' letsa i te' cha'an mi' yʌch'esan yic'ot i ya'lel chab. Che' jini tsi' yotsa ti' yej. Tsa' caji ti ch'ejl'an. Tijicñayix pañimil tsi' yubi. 28Che' jini tsa' tili winic i suben: Tsi' yʌlʌ a tat ti' tojlel pejtelel israelob cha'an muc' abi i chojquel ti Dios majqui jach mi' c'ux i bʌl i ñʌc', che'en. Jini cha'an c'uñobix i pusic'al. Yomobix chʌmel ti wi'ñal. 29Jonatán tsi' jac'ʌ: Jini c tat woli jach i tic'lan winicob. Q'ueleyon wʌle. Cha' tijicñayix pañimil woli cubin cha'an ili ts'ita' chab tsa' bʌ c mʌc'ʌ. 30Uts'at tsa'ic i laj c'uxuyob i bʌl ñʌc'ʌl tsa' bʌ i cʌyʌyob laj contrajob che' bʌ tsa' puts'iyob. Che'iqui ñumen tsa' mejli lac jisan jini filisteojob, che'en.
31Anquese anto yom i p'ʌtʌlel jini soldadojob israelo' bʌ ti jim bʌ q'uin, pero wersa tsa' mejli i jisañob filisteojob ti Micmas c'ʌlʌl ti Ajalón. 32Che' bʌ tsa' bʌjli q'uin jini winicob tsa' caji' ch'ʌmob i chubʌ'anob i contrajob. Tsi' ch'ʌmʌyob tiñʌme' tac, yic'ot wacax, yic'ot alʌ wacax. Tsa' caji' tsʌnsañob cha'an mi' bʌc' c'uxob yic'ot i ch'ich'el. 33Tsa' tili winic i suben Saúl: Jini winicob woli' cha'leñob mulil ti' contra lac Yum. Woli' c'uxob we'elʌl yic'ot i ch'ich'el, che'en. Saúl tsa' caji i tic' i winicob: Woli la' cha'len mulil. La'la ts'ʌlbeñon letsel ñuc tac bʌ xajlel wʌ'i, che'en. 34Tsi' yʌlʌ ja'el: Yom mi la' puc la' bʌ ti' tojlel soldadojob. Subeñob ti pejtelelob, la' i pʌyob tilel ña' wacax yic'ot tiñʌme'. Wʌ' yom mi la' tsʌnsan ilayi cha'an mi la' c'ux, pero mach yomic mi la' c'ux we'elʌl yic'ot i ch'ich'el. Jiñʌch mulil ti' contra lac Yum, che'en. Che' jini ti jujuntiquilob tsa' caji' pʌyob tilel i wacax ti jini ac'ʌlel. Ya' tsi' tsʌnsayob. 35Saúl tsi' melbe lac Yum jump'ejl pulʌntib. Jiñʌch ñaxan bʌ pulʌntib tsa' bʌ i melbe lac Yum.
36Saúl tsa' caji' yʌl: La' lac chʌn ajñesan majlel jini filisteojob wʌle ti ac'ʌlel c'ʌlʌl mi' sʌc'an cha'an mi lac laj jisañob, che'en. Tsi' jac'ʌyob: La' ujtic che' bajche' ma' wʌl, che'ob. Pero tsi' yʌlʌ jini motomaj: La'ix lac lʌc'tesan lac bʌ ba'an Dios, che'en. 37Jini cha'an Saúl tsi' c'ajtibe Dios: ¿Yom ba mi cajñesan lojon jini filisteojob? ¿Mu' ba caj a wʌc'ob ti' c'ʌb israelob? che'en. Pero Dios ma'anic tsi' jac'be i t'an ti jini q'uin. 38Jini cha'an Saúl tsi' yʌlʌ: La'la pejtelel ñuc tac bʌ la' we'tel ila ti tejclum cha'an mi lac wen q'uel majqui an i mul ti lac tojlel. 39Isujm mic subeñetla come cuxul lac Yum tsa' bʌ i colta israelob: Majqui an i mul, la' chʌmic. Anquese mi jinic calobil Jonatán am bʌ i mul wersa mi' chʌmel, che'en. Pero ma'anic majqui tsi' jac'be. 40Saúl tsi' sube pejtelel israelob: Mux lac t'ox lac bʌ. Ya' yom mi la' wa'tʌl jatetla. Joñon yic'ot calobil Jonatán wʌ' ti yambʌ junwejl, che'en. Tsi' jac'ʌyob jini winicob: Che'ʌch yom che' bajche' wola' wʌl, che'ob. 41Saúl tsi' sube lac Yum: C Yum i Dioset israelob, yom ma' wen tsictesʌbeñon lojon majqui an i mul, che'en. A wilan lac Yum tsi' tsictesa: Jini yaño' bʌ ma'añobic i mul. Jatet Saúl yic'ot a walobil Jonatán an ti la' wenta jini mulil, che'en. 42Saúl tsi' yʌlʌ: Quilala majqui an i mul, mi joñon o mi calobil Jonatán, che'en. Awilan tsa' tsictiyi añʌch i mul Jonatán.
43Saúl tsi' sube i yalobil: Subeñon chuqui tsa' mele, che'en. Jonatán tsi' tsictesa i bʌ: Isujm, tsa'ix c mula ts'ita' jini chab. Tsa cotsa ti quej i ni' te' chucbil bʌ c cha'an. Um ba' añon cha'an mic chʌmel, che'en. 44Saúl tsi' jac'ʌ: Wersa mi caj a chʌmel. La' i yʌq'ueñon wocol Dios, mi ma'anic mi cʌq'uet ti chʌmel, Jonatán, che'en. 45Pero jini soldadojob tsi' subeyob Saúl: ¿Yom ba mi' chʌmel Jonatán? Jiñʌch tsa' bʌ i colta israelob cha'an mi' mʌjlel lac cha'an. Isujm mic subeñet lojon, come cuxul lac Yum: Ma'anic mi' cajel ti yajlel ti lum mi junt'ujmic i tsutsel i jol, come lac Yum tsi' wen colta. Jini cha'an tsi' mʌlbe laj contrajob, che'ob. Che'ʌch tsi' coltayob Jonatán pejtelel i pi'ʌlob cha'an ma'anic mi' yʌjq'uel ti chʌmel. 46Jini cha'an Saúl tsi' cʌyʌ i tsʌclen majlel jini filisteojob. Tsa' laj sujtiyob majlel ti' lumal jini filisteojob.
47Che' wolix ti yumʌntel Saúl ti' tojlel israelob, tsi' cha'le guerra yic'ot pejtelel i contrajob año' bʌ ti' joytʌlel, jini moabob, jini amoñob, jini edomob, yic'ot jini yumʌlob ti Soba, yic'ot jini filisteojob. Baqui jach tsa' majli Saúl tsa' mʌjli i cha'an. 48Tsi' mele ñuc tac bʌ i ye'tel. Tsi' mʌlbe jini amalecob. Tsi' colta jini israelob. Tsi' jisa i contrajob woli bʌ i tic'lañob.
49I yalobilob Saúl jiñobʌch Jonatán, Isúi yic'ot Malquisúa. An cha'tiquil i yixic'al ja'el, Merab jini chichʌl, yic'ot Mical jini ijts'iñʌl bʌ. 50I yijñam Saúl jiñʌch Ahinoam (i yixic'al Ahimaas). Jini ñuc bʌ i yaj cʌnta soldado, jiñʌch Abner (i yalobil Ner, jini Ner i yumijel Saúl). 51Jini Cis, i tat Saúl, yic'ot Ner i tat Abner jiñobʌch i yalobilob Abiel. 52Ti pejtelel i jabilel Saúl, tsi' chʌn cha'le guerra ti' tojlel filisteojob. Baqui jach tsa' tajle p'ʌtʌl bʌ winic ch'ejl bʌ i pusic'al, Saúl tsi' pʌyʌ cha'an mi' yochel ti soldado.
Currently Selected:
1 SAMUEL 14: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.