1 REYES 12
12
Xñusa t'añob jini israelob
(2 Cr. 10.1—11.4)
1Roboam tsa' majli ti Siquem ba' tsa' majliyob pejtelel israelob cha'an mi' wa'chocoñob ti rey. 2Ti jim bʌ ora Jeroboam (i yalobil Nabat) tsi' yubi chuqui tsa' ujti. Ya'to an ti Egipto ba' tsa' puts'i che' bʌ tsi' bʌc'ña jini rey Salomón. 3Pero jini israelob tsi' chocoyob ti pʌyol. Che' jini tsa' cha' sujti Jeroboam ti' lumal. Tsa' majli yic'ot bajc'ʌl i pi'ʌlob cha'an mi' pejcañob Roboam. Tsi' subeyob: 4A tat tsi' teñeyon lojon ti cabʌl e'tel. Yomix ma' t'ox c wocol lojon. Mach yomic lajal ma' mel che' bajche' a tat. Che' jini mi caj c yumañet lojon, che'ob. 5Roboam tsi' jac'beyob: Mi caj c ña'tan bajche' yom. Cucuxla. Che' ñumenix uxp'ejl q'uin mi caj c subeñetla, che'en. Che' jini tsa' cha' sujtiyob ti' yotot.
6Jini rey Roboam tsi' c'ajtibeyob jini xñoxob tsa' bʌ i pi'leyob ti e'tel jini rey Salomón: ¿Chuqui yom mic suben ili winicob? che'en. 7Jini xñoxob tsi' jac'beyob: Mi mux a mel che' bajche' mi' yʌlob ili winicob, mi uts ma' pʌs a bʌ ti' tojlelob, che' jini mi caj i yumañetob ti pejtelel ora, che'ob. 8Pero Roboam ma'anic tsi' mula ili t'an. Che' jini tsi' pejca ch'itoñob to bʌ i pi'ʌlob tsa' bʌ coliyob yic'ot. 9Tsi' c'ajtibeyob: ¿Chuqui yom mic subeñob ili winicob tsa' bʌ i subeyon cha'an mic t'oxbeñob i wocol cha'an ma'anic mic mel che' bajche' c tat? che'en Roboam. 10I pi'ʌlo' bʌ ti colel tsi' subeyob: Yom ma' suben ili winicob: “Mi tsa' la' wubi wocol ti' tojlel c tat, ñumen mi caj la' wubin tic tojlel. 11Isujm, c tat tsi' yʌq'ueyetla wocol bʌ e'tel, pero ñumen cabʌl mi caj cʌq'ueñetla. C tat tsi' jats'ʌyetla ti asiyal, pero joñon mi caj cʌq'uetla ti c'uxtʌl ti siñan”. Che' yom ma' subeñob, che'ob jini ch'itoñob to bʌ i pi'ʌlob.
12Che' ti' yuxp'ejlel q'uin tsa' cha' c'oti Jeroboam yic'ot i winicob ba'an Roboam che' bajche' tsi' yʌc'ʌ i t'an Roboam: Che' ñumenix uxp'ejl q'uin mi caj c subeñetla, che'en. 13Jini rey tsʌts tsi' pejca jini winicob. Ma'anic tsi' jac'beyob i t'an jini xñoxob. 14Tsi' jac'beyob i t'an jini ch'itoñob to bʌ i pi'ʌlob ti colel. Tsi' yʌlʌ: Isujm tsi' yʌq'ueyetla wocol e'tel c tat, pero ñumen cabʌl mi caj cʌq'ueñetla. C tat tsi' jats'ʌyetla ti asiyal, pero joñon mi caj cʌq'uetla ti c'uxtʌl ti siñan, che'en Roboam. 15Jini rey ma'anic tsi' jac'beyob i wocol t'an jini winicob. Che'ʌch tsa' ujti cha'an mi' ts'ʌctiyel i t'an lac Yum che' bajche' tsi' yʌlʌ jini x'alt'an Ahías ch'oyol bʌ ti Silón.
16-17Che' bʌ tsi' ña'tayob jini israelob ma'anic woli' jac'beñob i wocol t'an jini rey, tsi' yʌlʌyob: ¿Chuqui tsac taja lojon ti' yumʌntel David? ¿Chuqui to i ye'tel mi lac yuman i p'olbal David? Israelob, cha' conla ti la cotot. La' i bajñel yumañob Roboam i pi'ʌlob. Che' tsi' yʌlʌyob. Tsi' chocbeyob majlel ili t'an. Che' jini tsa' laj sujtiyob jini israelob ti' yotot. Roboam tsi' cha'le yumʌl ti' tojlel junmojt israelob chumulo' bʌ ti Judá. 18Jini rey Roboam tsi' choco majlel Adoram i yum jini x'e'telob cha'an mi' wets'ob tilel winicob. Pero jini israelob tsi' juluyob ti xajlel. Che' jini tsa' chʌmi. Jini cha'an jini rey Roboam ti ora jach tsa' letsi ti carreta cha'an mi' majlel ti puts'el ti Jerusalén. 19Jini cha'an t'oxolob to jini israelob ti' tojlel i p'olbal David c'ʌlʌl wʌle. 20Che' bʌ tsi' yubiyob pejtelel israelob cha' c'otemix Jeroboam ya' ba'an israelob, tsi' chocoyob majlel winicob cha'an mi' pʌyob tilel. Che' jini tsi' wa'chocoyob ti rey ti' tojlel pejtelel israelob. Cojach junmojt tsi' chʌn tsajcayob i p'olbal David ya' ti Judá.
21Che' bʌ tsa' juli Roboam ti Jerusalén, tsi' pʌyʌ tilel pejtel i p'olbal Judá yic'ot pejtel i p'olbal Benjamín, bolonc'al mil (180,000) winicob yujilo' bʌ guerra. Tsi' ña'ta wersa mi caj i cha'len guerra ti' contra jini lujunmojt israelob cha'an mi' ch'ʌmob ti' wenta. 22Pero lac Yum tsi' pejca Semaías i winic Dios. Tsi' sube: 23Suben jini rey Roboam (i yalobil Salomón) yic'ot i winicob ya' ti Judá yic'ot ti Benjamín yic'ot yaño' bʌ: 24“Mach yomic mi la' wʌlʌc majlel ti guerra ti' contra la' pi'ʌlob israelo' bʌ. Cha' cucuxla ti la' wotot come joñon tsac t'oxoyob”, che'en lac Yum. Che' tsi' yʌlʌ jini x'alt'an Semaías. Jini winicob tsi' jac'beyob i t'an lac Yum. Tsa' cha' sujtiyob ti' yotot che' bajche' tsa' subentiyob.
I mul Jeroboam
25Jeroboam tsi' cha' wen mele jini ts'ajquibil bʌ tejclum Siquem am bʌ ti Efraín wits ya' ba' chumul. Ti wi'il tsi' cha' mele jini ts'ajquibil bʌ tejclum i c'aba' Penuel. 26Jeroboam tsa' caji i ña'tan ti' pusic'al: Bʌbʌq'uen mi caj i cha' chilbeñon c yumʌntel i pi'ʌlob David. 27Che' mi' letselob pejtel c winicob ya' ti Jerusalén cha'an mi' pulbeñob i majtan lac Yum, bʌbʌq'uen mi caj i ña'tañob ti' pusic'al cha'an mi' cha' tsajcañob jini rey Roboam. Che' jini mi caj i tsʌnsañoñob cha'an mi' cha' yumañob jini Roboam i rey judíojob. Che' tsi' ña'ta Jeroboam. 28Jini cha'an tsi' teme i t'an yic'ot año' bʌ i ye'tel cha'an mi' mel cha'cojt i yejtal alʌ tat wacax melbil bʌ ti oro. Tsi' sube pejtel winicob: Mach wersajix mi la' chʌn letsel majlel ti Jerusalén, come awilan wʌ'ix an la' dios tsa' bʌ i loc'sayetla ti' lumal Egipto, che'en.
29Tsi' yʌc'ʌ juncojt i yejtal alʌ tat wacax ya' ti Betel. Tsi' yʌc'ʌ yambʌ ti Dan. 30Che' jini tsi' xiq'ui ti mulil jini israelob. Tsi' ñopbeyob i t'an. Tsi' ch'ujutesayob i yejtal wacax ya' ti Betel yic'ot ti Dan. 31Jeroboam tsi' mele ja'el i yotlel diosob ya' ti bujbujtʌl. Tsi' wa'choco motomajob mach bʌ levíjobic. 32Che' ti' tejchibal noviembre Jeroboam tsi' mele ñuc bʌ q'uin cha'an Tabernáculo, lajal bajche' mi' melob ya' ti Jerusalén. Tsa' majli ti Betel ba' lotol i yejtal alʌ tat wacax cha'an mi' yʌq'uen i majtan i dios tac ya' ti pulʌntib. Che' ja'el tsi' wa'choco motomajob cha'an mi' melob i ye'tel ya' ti bujbujtʌl am bʌ ti Betel. 33Leco tsi' mele Jeroboam che' bajche' tsi' bajñel ña'ta ti' pusic'al. Tsi' pʌyʌ jini israelob ti q'uiñijel ya' ti Betel. Tsi' tsʌnsa alʌc'ʌl ti pulʌntib. Tsi' pulbe pom.
Currently Selected:
1 REYES 12: ctuBI
Highlight
Share
Copy
Want to have your highlights saved across all your devices? Sign up or sign in
© 1977, Wycliffe Bible Translators, Inc. All rights reserved.