ZAKARI 14
14
Mewosan ma suʼulan a nsoone Nti
(Nli 16:13-16; Mt 16:27; 2 Tim 1:6-10)
1Môse yʼayaa Nti ô ntoo bebé.
A bôte ya Yérusalém,
ba ye kaban akume denan
mise menan me lôô!
2E ne foʼo na Nti a ye sulane meyoñe na
me wosane Yérusalém:
ba ye nyoñe tison,
ba ye sa menda,
ba ye jabe binga,
éfase jia ya bôt ja ye ke minkôm,
ve mebukaʼa me bôt ma ye bo nguleya Tabe tison.
3Eyoñe te Nti a ye taté na
a tebe meyoñ mete ngame yat,
a ye wosan aval a zu a bo éyoñ ése
e biyoñe bita.
4Eyoñe te, a ye tebe e nkôle beôlivié,
bebé Yérusalém, éfase tisone ya jôp da tôô.
nkôle beôlivié wo ye salé zañ ngab ébaé,
a beta mbiʼili a ye bo
a soʼo mfaʼa jôp da tôô a kele mfaʼa da dim.
Efase nkôle jia ja ye kʼôyap
mfaʼa yʼakôé,
éfase baa ki mfaʼa ya nké.
5Nne mia ye tup e mbiʼili
ô ne mfaʼane zañe minkôle miam,
amu wo ye ndamban a kui Asal.
Mia ye mate avale benyobimvam be nga bo
melu Ozias njô bôte ya Yuda a nga jôô,
amu si é nga fôʼôsan.
Eyoñe te Nti, e Zambe wom, a ye suan
ba beéngele ba saane nye.
6Eyoñe te éfufup ja ye bo teke fe mfi,
e avep a metaʼa.
7Nti étam nye a yem éyoñe te,
Môs étam ñwô wo ye bo
teke fe nkandan e zañe môs ba alu,
éngengeñ ja ye bo jaʼane mamengôʼé.
8Anjeñe mendim da ye vam e Yérusalém;
éfase jia ya mendime mé ja ye lôt
mfaʼa évele mañ,
éfas évoʼo ki mfaʼa beta mañ
tañe ngume mbu,
a mfum avale fʼane a suʼu.
9Eyoñe te Nti a ye jôô si ése;
Nye étam ba ye kañ ane Zambe,
jôé dé étam nde bôte bese ba ye yem.
10Efuse si ése ja bômane Yérusalém
ja ye veñesane njeʼese,
ataté Géba mfaʼa yʼakôé
a kui Rimon mfaʼa ya nké.
Yérusalém a ye dañe mefôla
ma bômane nye,
a tison ja ye bo ataté mbé Bényamin
a kui mbé ya jua,
e vôme nnôme mbé ô né,
nalé fe ataté nkum Ananél
a kui bibé bi njô bôt ba miate woon.
11Ba ye bo nguleya tabe e tison,
amu ja bo teke fe bi éndeñelaʼa
ajô ntyaman
a bôt ba ye nyiñ été mvoʼé .
Ebubua mfaʼa meyoñ mese
(Sam 2:8-12; Eza 60:12; 66:23-24)
12Mfaʼa meyoñ me nga ke wosane Yérusalém,
mbia be mame Nti a ye bo be mme ma:
minsône miap mia ye boé be ngenane be vee,
mise map ma ye boé vôm me né,
avale te fe ayeme dap e menyu map.
13Eyoñe te, Nti a ye jalé be
a beta woñ;
bana ba ye wosane ba bevok,
a môt ase a ye wosane môt ba nye
be too bebé.
14Bôte ya Yuda ba ye wosan
asu ya kamane Yérusalém,
ba ye nyoñ akume meyoñ ma bômane be ese.
nalé ate ba ye kôane or, argent
a mengômesan abui.
15Betite bese ya ngame besiñ:
bikabela, bemulé, bekamel a bijakas,
mam me nga kui be bôt.
Ma ye fe kui be be.
16Eyoñe te bôte ya meyoñ
me nga wosane Yérusalém ba ye nyiñ,
ba ye bet e tison éte mbu ôse,
asu ya kañe Nti, njôô yʼémo,
a asu ya jem abôʼô bibem.
17Ngʼayoñe da ya meyoñe ya si
Da bo te ke Yérusalém
asu ya kañe Nti, njôô yʼémo,
mveñ ja ye bo te noñ e si jé.
18Nge bôte yʼEjipte ba bene ke Yérusalém,
asu ya jem abôʼô bibem,
be fe ba ye biban a bidim
avalʼane meyoñe mevok ma ye bo
teke ke jem abôʼô te.
19Avale te nde Ejipte a meyoñ
ma ye bo te jem abôʼô te ba ye
nyoñe melep .
20Eyoñe te, jaʼane bone mengôñ
bikabela
ba ye bi ntilane wu na:
ntelan étyi asu Nti.
A memvé ya nda Zambe fe
ma ye teléban étyi
avale fe ane bisua ba belane bie
asu mmiaman mbie bi tele asu
ataʼa metunaʼa.
21Memvé mese me ne Yérusalém a Yuda
ma ye teléban étyi asu Nti ya si ése.
Ba ba ye zu ve metunaʼa
ba ye belane me asu ya yame tit.
Eyoñ éyoñe te ja ye kui,
teke nkuan abom éziñ a ye beta tabe
nda Zambe Nti ya si ése.
Currently Selected:
ZAKARI 14: BULU09
Highlight
Share
Copy
Want to have your highlights saved across all your devices? Sign up or sign in
© LʼAlliance Biblique du Cameroun, 2009
