MARKUS 16

Binga ba ke yene soñ

(Mt 28:1-8; Lk 24:1-12; Yoa 20:1-2)

1Eyoñ sabbat a nga lôt, e nde Marie ya Magdala baa Marie nyia Yakob, a Salôma be nga mane kuse mimbon mi ôlobinda na ba ke woʼo Yésus. 2Valé tyé é ngenan mendim, e môs ôsu ya sondô, ane be nga ke e soñ, jôb e tôôya. 3Be nga ke ba kobô na: Za nye a ye fendé bia akoʼo ya mbé soñ? 4Abete ba bete mis, be nlôô na akoʼo e ntoo mfendan; akoʼo te kik e mbe étua ya anen. 5Anyiin be nga nyiin e soñ, e nde be nga yene mone ndômane môt a too si e mfaʼa ya mbo nnôm, a beʼe éfumulu ézingi, ane be nga siʼan a woñ. 6E nde ndôman éte é nga jô be na: Te mia fôʼôban a woñ. Mia jeñ Yésus ya Nazarét, e nyô be nga tyelé e krôa . A wômôya, a nji fe bo va; fombaʼane vôm be nga bôôé nye. 7Kelane ñhe kate beyéʼé bé a Pierre na a keya mia ôsu, e Galilé; e ne mia ye yene nye wé, aval ane a nga jô mia. 8Ane be nga kôlô e soñ a kui atan, ba ke ba fôʼôban, feʼe njañan e mebum. Be teke foʼo kate môte jam éziñ, amu woñ ô nga bili be.

Beyéʼé ba yene Yésus

(Mt 28:16-20; Lk 24:36-49; Yoa 20:19-23)

9Eyoñe Yésus a wômôya, mametyé, e môs ôsu ya sondô, ane a nga taté liti Marie Magdaléna nyôl, e minga a nga vaa mimbia minsisim zamgbwa. 10Ane nye kʼa nga ke kate bôte baa be Yésus be mbe be too foé, amu be nga bili mintaé e nlem be yônôk. 11Eyoñe bôte bete be wôʼôya na a vee, a na a nga ke liti nyôl e be minga ate, be nji kañese. 12E mvuse valé, ane a nga beta liti nyôl aval afe e be beyéʼé bebaé be too e dulu zañ, be kele e nlame mvus. 13Ane balé fe be nga bulan a mvus, be ke kate bôte bevoʼo foé. Be teke yebe.

14E nde a nga ke suʼulane liti nyôl e be Beyéʼé awôm a wua be too si, be jaʼak. A nga komekane be na be ne teke buni, be too fe ayete minlem, amu be nji ke buni e bôte be nga yene nye éyoñ a vômôya. 15Ane a nga jô be na: Kelane mefôla me si mese, mi ke mia yôtan ékôkômaʼa ése Mbamba Foé. 16E môt a ye buni a duban, a ye bi ényiñ, e nyô ki a ye bo teke buni a ye nyoñe mekua. 17Mendeme ma ye tôñe bôte ba buni e me ma: E jôé dam, ba ye titane mimbia minsisim, ba ye kobô mimfefé minkobô . 18ba ye bi benyo a mo, a nge ba nyu e jôme ja wôé môt, ja ye bo teke bo be mbia jam, ba ye beté minkôkon mo, mi ve bo mvoʼé . 19Eyoñe ñhe Nti Yésus a maneya kobôô be nalé, ane a nga bet e yôb a nyoñ éto e mbo nnôm be Zambe. 20Beyéʼé kik, akôlô ya valé, be nga ke ba kañete Mbamba Foé vôm ase, Nti a kelee be nsamba e ésaé été, a yemeteʼe nkañetane wob ya ajô Zambe ngu amu bitua bi mam bi mbe bi bobaʼan.

Currently Selected:

MARKUS 16: BULU09

Highlight

Copy