KALATE METATAʼA 6
6
Joʼojoʼo mboone môta binam
(Nk 34:15-16; 2 Ko 6:14-18; Sam 14:1-4; Rm 3:10-18)
1Eyoñe bôt be nga taté na ba mialan e si nyô, a na bengon be nga bialé be be, 2ane bone be Zambe be nga yene na bengone be bôt be mbe abeñ, a e nne be nga zu tobe binga bap e be bengone bete.
3Ajô te Nti a nga jô na: E Nsisime wom wo ye bo te tabe be môta binam éyoñ ése, amu a ne foʼo ve minsôn, a mimôse mié mia ye bo mimbu 120. 4Eyoñe te é mbe ji mimben mi mbe si nyô, valé bone be Zambe be zuya e be bengon be bôt, be ki be biaya be bon : e mbe bete be mbe beta mimbene ya melu kôa. 5Nti a nga yene na mbia mboone môt a nga dañ anen e si nyô; a na môs ôse e nleme wé wo bôndé ve mbia bʼasimesan. 6Ajô te Nti a nga jôbane na a nga té môt e si nyô a e nleme wé ô nga wôʼô ôlun. 7Nti nye na: Ma ye fimi môt me nga té e si nyô été, ataté môt a kui biyem, betite ba woñ a kui anone ya yôp; amu ma jôban ane me nga bo bie. 8Ve Noé a nga bi mvame Zambe.
Nkañete Noé
(Hé 11:7; 1 Pi 3:19-20; Yb 22:15-17)
Ndôn
9E mvoñe bôte Noé e nje nyô:
Noé a mbe zôsôôô môt teke bijô ézezañe bôte ya biyoñe bié; Noé baa Zambe be mbe be wuluʼu.
10Noé a nga biaé bobefame belaa: Sem, Kam a Yafet. 11Si é mbe ndaman e mise me Zambe, si é mbe njalane njet. 12Zambe a nga yene na si é mbe ndaman; amu nsôn ôse ô mbe ô wuluʼu abé e si nyô. 13Ajô te Zambe a nga jô Noé na: Me tyiʼiya na ma jiane bevevee bitétéa bise; amu si é ne njalane njet amu be; ajô te ma zu jiane be, nalé fe si. 14Lôñe womiene Ark a élé ba loone gôfér; wo ye bo bitune bi nda e ark ate été; wo ye futi meyañ été a atan. 15Avale di e nde wo ye ba nye: ayap menyiʼi me mo 300, ndam menyiʼi me mo 50, ôyabe yôp: menyiʼi me mo 30.
16Wo ye futi ayombô e ark yôp e too anyiʼi wo da; e mbé wo ye bo mfaʼa ya fefe; ark ate a ye bi nkôñ mfaʼa ya si, nalé fe wu baa a wu lale. 17A e mfaʼa wom, ma ye soo ndôn e si nyô, asu ya jian nsôn ôse ô ne yôbe si ô bili mvebe ényiñ; jôm ése é ne si ja ye jañ. 18Ve ma ye bo élate jam a wo; wo ye nyiine ark été a bobefame bôé, e minga wôé a mimbome miôé. 19Wo ye fe bo na tit ébaé ya aval ese é vee é nyiin, asu ya na be ke ôsu a nyiñ a wo; wo ye nyoñe ngale wua a nnôme wua. 20Ngal a nnôm ya kan ése, ônon, éyem, tit ja woñe si, ba ye zu be wo, nalé ba ye bo te jañ. 21A wo nyoñek ngab éziñe ya bidi bise ba di, a baʼale bie ngaʼaban e fefele jôé, nalé ate bia ye volô wo asu bidi biôé a e mfaʼa wop.
22Avale te e nde Noé a nga bo; a nga bo mimfaʼa mise avale Zambe a nga bendé nye.
Currently Selected:
KALATE METATAʼA 6: BULU09
Highlight
Share
Copy
Want to have your highlights saved across all your devices? Sign up or sign in
© LʼAlliance Biblique du Cameroun, 2009