EZEKIEL 9

Melebe ma tôñe Yérusalém

(2 Minkte 36:14-17; Mal 3:16-20)

1Wôna a nga bete tyiñe ngu melo mam na: Zaʼane bebé, mia mia yiane lebe tison, môt ase évôle jé ya jian e mo!

2Nde me nga yene bôte besaman be soʼo zen é ne mbé ya yôp ô lôô mfaʼa yʼakôé, môt ase a bili évôle ya tyam e mo. Môt a beʼe éfumulu ngômesan a nga tele be zañ ndeʼe mendime ntilimam é tyele nye kandé. Nde be nga zu tebe bebé ataʼa metunaʼa mvot. 3Etôtoʼo Zambe Israél é nga kôlô vôm é nga too kérubime yôp a ke mfaʼa mbalaʼasi ya nda . Ane a loone môt a nga beʼe éfumulu ngômesan a ndeʼe mendime ntilimam e kandé. 4Nti a nga jô nye na: Kele temeteme tison ézezañe Yérusalém beangôndô be mam bese ba boban été. 5A a nga jô bôte bevok melo mam me wôʼô na: Lôtane nye mvus e tison a bibaʼan; dise denan é boʼo tʼéngôngo a te mia yeʼele jôm éziñ! 6Wôan, a mane jiane minnôm, bisoé bendôman, bindune bengon, bongô a benya binga; ve mi bo te nnambe nyô ase a beʼe ndem a tataʼane vôme wom a nʼétyi! Be nga taté befam, bemvendé be mbe ôsu ya Nda. 7A nga jô be na: Vaʼane Nda mvit a jalaʼane minseñ a mimbim! Kuian atan! Be nga kui atan a bibi e tison été.

8Be bibiʼi a ma ki me ngenane me too, nde me nga ku asu é butu si a me nga yône na: A Zambe nyô a nʼétyi ye wo ye mane jiane mebukaʼa mese yʼIsraél éyoñe wo mias ayaa e Yérusalém? 9A nga yalane ma na: Ékobe nda bôt Israél a Yuda é nʼangôndô, angôndô yʼanen; si é jaéya a mewôé me bôt, tison é ne njalan a bikotekote mimboon amu ba jô na: Nti a liʼiya si nyô, Nti a nji yene jôm. 10Ma fe ma ye bo tʼéngôngo a ma ye bo te yeʼe jôm; ma ye bo na mimboone mi mame miap mi ku be minlô 11wôna môt a beʼe éfumulu ngômesan a ndeʼe mendime jam ô nga bendé ma.

Currently Selected:

EZEKIEL 9: BULU09

Highlight

Copy

Compare