Vama ndum mbeina 1
1
Vad’ud’a
1Mbaktum mba wanda ti ta’î ahle suma Jesus Christ mi ndazi woina. Nahle suma Alona mi humzi mi tagazi woi mazungeî mam suma sunda vama ar go á mbad’ina. Nahle suma Christ mi sun malaika mama á tagazi woi mazong mama Jean-na. 2Jean mi dahlena pet suma mi wazina, ni zla d’a tcholï avun Alonid’a ki gagazi d’a Jesus Christ mi ndat teid’a. 3Sama nga mi ndum mbaktum mba wanda azi ki suma a nga hum zla d’a tcholï avun Alona d’a suma a nga djogot teid’a suma a nga ge yazi kä ad’u vama a b’irim kur mbaktum mba wandina, a le furîd’a, kayam yima ngam yam ahle ndazinina mi ar wa go.
Dep pa ge d’a mi Tok ka kid’iziyad’id’a
4-5An Jean nga ni b’ir mbaktumba mi agi Tok ka kid’iziya d’a kur ambas sa Asi-d’id’a.
Alo ma nga na, ma nga adjeu deina, ma nga mi mbana azi ki muzuk mam ma kid’iziya ma nga avok zlam mba amulina zlapa ki Jesus Christ ma glangâs ma d’engzengâ, ni Gor ma a vud’um avok ma tchol akulo avok kikidji aduk suma matna karid’ina, mam mi amul ma kal teglesâ hamulei suma yam andagad’ina, a vagi sumad’a ki b’leng nga halasa.
Christ ni ma le keina, ni ma pad’ei woi kur tcho meid’a ki buzuwama. 6Mi mbud’i sum mama, mi mbud’i suma ngat buzuna á le sunda mAbum Alonina. Subura kad’enga ni mamba gak didin. Amin!
7Gola! Nga mi djï kur d’ugula. Suma pet a mba golomu, suma tchogoma pî a mba wumu, suma yam andagad’ina pet a mba tchi hora kamu. Â, ar le hina. Amin!
8Salad’a Alo ma ad’engêm kal petna, Ma nga na, Ma nga adjeu deina, Ma nga mi mbana, mi de woi ala: An ni Alfa, an ni Omega mi.
Vama Christ mi ndum mbei mi Jean-na
9Ni an wiyegina Jean ndragi ma kur ndaka zlapa ki sed’egi yam Jesus yam leud’a hAlona d’a ei nga djubut ki ve tad’id’a. An nga kur til la a yat ala Patmos-sa, kayam an tchi wal zlad’a hAlonid’a ki gagazi d’a Jesus mi ndat teid’a mi. 10Kur burâ hi Salad’ina, Muzuk ma bei tchod’a ba na mi vanu. An hum del la ngola ei blogonu; ti tchi d’igi adifa na. 11Ti dan ala: Ang b’ir vama an wuma kur mbaktumba, ang sunut mi Tok ka kid’iziyad’a, nala, ta Efes-sa, ta Ismirin-nda, ta Pergam-mba, ta Tiyatir-ra, ta Sardes-sa, ta Filadelfi-d’a ki d’a Lawodise-d’a mi.
12An mbut iran á gol sama nga mi dan zlad’ina. Ata yi máma, an we agu ma tin lalam mba lora kama kid’iziya. 13Vana nga tchola aduk agu máma, mi hle tamî d’igi sana na. Mi tchuk baru d’a fiyaka atam gak ti tchuk kä asemu, mi djin d’ik ma lora kurumu. 14Tumus sa kamba ni hapa d’igi barud’a na, d’oze d’igi gagarad’a na, iram mba gola ni d’igi sin akud’a na. 15Asem wile d’igi kawei ma hleu ma a gum aduk aku d’a tchafina na. Delem mba ded’a ti tchi d’igi mbiyo ma avun vorina na. 16Tchitchiud’a kid’iziya a nga ved’a abom ma ndjufâ, mbigeu d’a fiyak ka te d’a siyat mbàd’a, ti nde woi avunamu. Iram mba gola nga d’i wile d’igi afat ta faleid’a na.
17Ata yima an wuma, an puk kä asem d’igi sama matna na, wani mi tin abom ma ndjufâ kanu, mi dan ala: Ang le mandar ri; ni an Ma avo’â, ni an Ma danana. 18An ma arina, an ma mit adjeuna, wani ki tchetchemba an nga karid’a gak didin. An nga kad’enga yam matna, an nga kad’enga yam yima zuleina mi. 19Kayam ndata, ang b’ir ahle suma ang wazina, nala, ahle suma a nga na kahle suma a nga mbeï bugolâ mi. 20Ang we zla d’a mudurid’a hi tchitchiu d’a kid’iziya d’a ang wat abon ma ndjufâ kagu ma tin lalam mba lora kama kid’iziyad’a. Tchitchiu d’a kid’iziya ti ni malaika suma kid’iziya suma yam Tok ka kid’iziyad’ina; agu ma tin lalamba kam ma kid’iziyana mi ni Tok ka kid’iziyad’a mi.
Currently Selected:
Vama ndum mbeina 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.