Vama ndum mbeina 2
2
Zla d’a mi dat mi Tok ka Efes-sid’a
1Ang b’ir mbaktumba mi malaika ma nga yam Tok ka Efes-sina.
Wana nahle suma ma ve tchitchiu d’a kid’iziyad’a abom ma ndjufâ ma nga mi tit aduk agu ma tin lalam mba lora kam ma kid’iziyana mi dazina: 2An wahlena pet suma ang lazina, an we sun mang nga kaud’a. Ang nga ve tang ki suma tchona d’i, ang kuk wa suma a yi tazi ala azi ni suma a sunuzina na, wani azi ni suma a sunuzi d’uo na, ang vazi ad’uzi woi ala azi ni suma ka zlad’a. 3Ang nga ve tang ad’enga, ang nga fe ndaka kanu, wani ang tang tchuk nga lus si. 4Wani vama an mining nguo kama ba wana, kayam ang ar o mang nga avoka woyo. 5An nga ni dangû, ar ang djib’er yam yima ang puk kuana, ang mbut hurung yam tcho manga, ang le sunda d’igi ang lat avok na. Le ang mbut nga hurung yam tcho manga d’uo ni, an nga ni mba ni hle agu ma tin lalam manga woi ata yamu. 6Vama ang lum ata yama ba wana: Ang noî sunda hi Nikolait-ta d’igi an noyôt na mi.
7Sama nga ki humbina, ar mi hum vama Muzu’â hAlonina nga mi dum mi Tokina.
Suma a mba kus ayînina, an mba tinizi á te vud’agu ma he ari ma nga kur asinena hAlonina.
Zla d’a mi dat mi Tok ka Ismirin-nda
8Ang b’ir mbaktumba mi malaika ma nga yam Tok ka Ismirin-ndina.
Wana nahle suma Ma avo’â, Ma danan ma mi mit mi mbut arid’ina ni dazina: 9An wang ndak manga ki hou manga, wani angî sama ndjondjoîna. An we zla d’a tcho d’a suma a yi tazi ala azi ni Juif-fâ na a nga dat kanga, wani azi ni Juif-fâ d’i, azi ni toka hi Seitan-nda. 10Ang le mandar abo ndak ka ang mba fata d’i. Gola! Diable nga mi mba, mba mi kugugiya, mba mi tchuk suma dingâ ablaud’a adigagi dangeina; agi mba fagi ndaka burâ dogo. Ar ang kak sama d’engzengâ gak matna; an mba ni hang avaval la bei b’laka ba d’a.
11Sama nga ki humbina, ar mi hum vama Muzu’â hAlonina nga mi dum mi Tokina.
Suma a mba kus ayînina, mat ma mbàna mba mi tchazi d’i.
Zla d’a mi dat mi Tok ka Pergam-mbid’a
12Ang b’ir mbaktumba mi malaika ma nga yam Tok ka Pergam-mbina.
Wana nahle suma Ma nga ki mbigeu d’a fiyak ka te d’a siyat mbàd’a mi dazina: 13An we yi mang ma kaka, ni yima zlamba hi Seitan-nid’a ti nga tinda kuana. An we ang nga ve tang ad’enga kanu, ang tin nga vunang yam he gagazi d’a ang hat kan kur bur ma a tchi Antipas man ma glangâs ma d’engzengâ adigagi ata yima Seitan mi nga kaka kuana d’i. 14Wana ni vama an mining nguo kama: Ang nga ki suma a ve hata hi Baläm ma mi hat Balak á tchuk Israel-lâ kur tchod’a á tahle suma a tuwal ki fileinina, á le mizeuna mi. 15Ang tanga nga ki suma a ve hata hi Nikolait-tina hina mi. 16Kayam ndata, ang mbut hurung yam tcho manga. Le hina d’uo ni, an nga ni mba atogo zak á dur ayîna ki sum ndazina ki mbigeu d’a fiyak ka avunanda.
17Sama nga ki humbina, ar mi hum vama Muzu’â hAlonina nga mi dum mi Tokina.
Suma a mba kus ayînina, an mba ni hazi man ma nga ngeid’ina. An mba ni he nge nge pî adigazi ahina d’a hap pa a b’ir nga simi ma awilina kuad’a. Ni d’a sama ding ndak á wat tuo d’a, ni sama vatna hola.
Zla d’a mi dat mi Tok ka Tiyatir-rid’a
18Ang b’ir mbaktumba mi malaika ma nga yam Tok ka Tiyatir-rina.
Wana nahle suma Alona Gorom ma iram mba gola d’igi sin akud’a na ma asem mi wile d’igi kawei ma hleu ma a gum aduk aku d’a tchafa na na mi dazina: 19An wahlena pet suma ang nga lazina, an we o manga, d’engzeng manga, sun mang nga led’a ki ve ta manga. An we sun mang nga tchetchemba ti kal la avoka. 20Wani vama an mining nguo kama ba wana, kayam ang ar Jezabel, atcha d’a nga d’i yi tat ala ndat ni d’a djok vun Alona d’a, ti nga d’i vit man suma sunda woyo, nga d’i had’azi á le mizeuna, á tahle suma a tuwal ki fileinina mi. 21An arat wa yina kayam ti mbut hurut yam tcho mata, wani ndat min mbut hurut yam mizeu matna d’i. 22Kayam ndata, an gat nga kä hur azangâ ki ndaka ngola. Le suma le mizeuna ki sed’etna a mbut nga huruzi yam tcho d’a azi lat ki sed’eta d’uo ni, an mba ni tinizi ndak ka ngola kazi mi. 23An mba ni tchi grotna woyo. Ata yi máma, Toka pet mba d’i wala an ni ma we djib’era ki nga hurâ hi sumina, an mba ni wurak nge nge pî yam vama mi luma mi.
24Wani agi suma ding suma kur Tok ka Tiyatir-ra suma zlabagi nga ki hat ta tcho ndata d’uo na, agi had’agi nga vama a yum ala Zul la yiyik ka mudurid’a hi Seitan-nda d’uo na, an nga ni dagi woyo, an dok tinigi vama anek ma ding kagi d’uo d’a. 25Wani ar agi vagi vama agi nga ki sed’ema ad’enga ngingring gak mba manda. 26-27Suma a kus ayîna suma a ngom sun manda gak dabid’ina, an tanda mba ni hazi ad’eng nga Abun handjid’a, an mba ni hazi ad’enga á te yam andjaf suma mi. Azi mba gad’azi ki totogo d’a kawei ma wurana, a mba tozi woi d’igi suma a to dei ma sana minima woi na. 28An mba ni hazi avevel ma fo yina mi.
29Sama nga ki humbina, ar mi hum vama Muzu’â hAlonina nga mi dum mi Tokina.
Currently Selected:
Vama ndum mbeina 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.