Nehemi 1
1
NEHEMI MI FE LOVOTA Á HULONG JERUSALEM
(1.1—2.10)
Nehemi mi hum zla Jerusalem
1Ni zla d’a ded’a hi Nehemi Hakaliya goromid’a. Kur til ma Kisleu-na, kur biza d’a dok mbà d’a Artazerses nga mi tamulid’a, an nga avo Sus kur azì ma ngolâ. 2Wiyen ma dingâ tu a yum ala Hanani zlapa ki suma dingâ a tcholï yam andaga d’a Juda-d’a, a mba. An djobozi yam Juif suma a tcholza kur magomba a mbazina, yam Jerusalem mi.
3A hulong dan ala: Suma a tcholza kur magombina a nga kaka kur andaga d’a Juda-d’a, wani a nga ni kur hohoud’a ki zulona. Gulumun ma Jerusalem-ma mi ni hod’ola hina hohotot, vunam mi ngal lei mi.
Nehemi mi tchen Alona yam Juif-fâ
4Kid’a an hum zla ndatid’a, an kak kä nga ni tchiya, an le burâ ablaud’a kur djib’era, an d’el tan bei te tena, an nde tchen Alo ma akulona. 5An dum ala: Ma didina Alo ma akulona, Alo ma ngol ma kal papana, ang nga ngom vun ma djin mangâ ki suma a nga ge yazi kä ad’u vun mang ma hed’ina, ang nga we hohowa suma a nga le kangâ mi. 6Ar ang mbud’ï irang kanu, ang tin humang hum tchen nda an azong mangâ nga ni tchenenga. An nga ni tcheneng ki tchetchemba andjege ki falei yam azungeî mang suma Israel-lâ, an nga ni dang woi yam tchod’a hi ami Israel-lîd’a. An kabuyon ngolo, ami lami tchod’a avorong mi. 7Ami lami tchod’a ngola avorongû, ami ngomomi nga vun mang ma hed’a ki gat ta ang hamizi avun azong mangâ Moise-sa d’i.
8Ang djib’er yam zla d’a ang damizi avun azong mangâ Moise-sa, ang dami ala: Le agi lagi tchod’a avoronu ni, an mba ni ndjoyôgi woi aduk andjaf suma dingâ. 9Le agi hulongôgi gevenu, le agi ngomogi vun ma he mana, le agi tid’igi kam mi ni, le a digigi gak igi navun dabid’a handagad’id’a pî, an mba ni togogï ata yima an manam á tin simiyên kuana. 10Ami nazungeî mangâ, ami ni sum mang suma ang pad’ami woi kad’eng mang nga kal teglesa kabong ma ad’engîna. 11Salad’a, ang tin humang hum tchen nda an azong mangâ nga ni tchenenga ki tchenda hazungeî mang suma a nga lang mandarangâ, ang wan hohowon an azong mangâ avok amul máma ini.
Kur biza ndata an ni ma ni he süma mamulîna.
Currently Selected:
Nehemi 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.