Sofoni 1
1
1Wana ni zla d’a Ma didina mi dat mi Sofoni kur atchogoi d’a Josiyas Amon goroma nga mi tamula yam suma Juda-nid’a. Sofoni ni Kusi goroma, Kusi tamba ni Gedaliya goroma, ni Amariya gorom ngolona, ni Ezekiyas gorom ngolo ma mbàna.
Alona mi ngop suma yam andagad’ina pet
2Ma didina mi dala:
An mba ni b’lak ahle suma
yam andagad’ina woi pet.
3An mba ni b’lak suma woi
ki d’uwarâ kahle suma abageina
kaluweina ki kulufâ woyo,
an mba ni b’lak suma asa’atna
ki sun mazi d’a b’lak suma woyo,
an mba ni ar sa yam andaga tu d’i.
Alona mi ngop Juda-na ki suma Jerusalem-ma
4Ma didina mi dala:
An mba ni hlabon akulo yam suma Juda-na
ki suma a nga kaka avo Jerusalem-ma pet,
an mba ni b’lak ahlena hi Bäl suma arâ
zlapa ki mam suma nglo suma simiyêzi nga mi yina
ki mam suma ngat buzuna woi mi.
5An mba ni dap suma a djak akulo yam azuweina
á kud’or tchitchiud’ina,
ki suma a kud’uron suma a gun tazi ki simiyên
suma a i gun tazi
kalo ma a yum ala Milkom-mina woyo.
6An mba ni dap suma a noyôn an Ma didina
suma a nga halan nduo
suma a nga djobon yam va d’uo na woyo.
7Agi kagagi ki vunagi ma du’â
avok Salad’a Ma didina,
kayam bur mama mi mba wa go,
mi min wa va mam ma ngat buzuna,
mi tin wa suma mam yazina irazi vazi mi.
8Ma didina mi dala:
Kur bur ma ngat buzu máma
an mba ni ngop suma nglo suma avok sumina
kamulâ groma ki suma pet
suma a nga tit bugol alona hi suma dingîna.
9Kur bur máma an mba ni ngop
suma a nga pir yam agu ma avun gongina
ki suma a nga oî azina hi salazina
ki ndjondjoî d’a murud’umba ki d’a mbut irina.
10An Ma didina nga ni dagiya: Kur bur máma
a mba humï tchina avun agrek ma Kulufâ,
a mba humï wulula ir palumba
habo azì ma awilina hazì ma ngolîna.
Ni b’lak ka ngol la yam yima ndingîd’a.
11Agi suma Maktes-sâ, agi tchagi wulula,
kayam suma mbut abozina a dap wa woyo,
suma beged’a pet, a tchazi wa woi mi.
12Kur bur máma an mba ni hal
hur azì ma Jerusalem-ma ni ki lalamba,
an mba ni ngop suma a nga burâ kä
kur tcho mazid’a suma a nga de kuruzi ala:
Ma didina nga mi le vama djivi
d’oze vama tcho d’uo na.
13A mba hurum ndjondjoî mazid’a,
a mba b’lagazi aziyazi woyo,
a mba min azina,
wani azi mba kak kur ri,
a mba pe guguzlud’a,
wani azi mba tchat sümut tuo mi.
Bur ma ayîna hi Ma didinina
14 Bur ma ayîna hi Ma didinina
mi ar wa go, nga mi djï atogo zak.
Agi mba humugi siwel la kur bur mámid’a,
grang ma durâ pî mba mi tchi
tchi ma hat hurâ mi.
15Bur máma ni bur ma ayî ma bibiliuna,
ni bur ma hohoud’a ki pupuluka,
ni bur ma b’lak ahlena,
ni bur ma pleî ahlena,
ni bur ma nduvunda,
ni bur ma wura ma i’îli’â,
ni bur ma d’ugula,
ni bur ma akukutna mi.
16Kur bur máma a mba hum tchina
hadifa ki siwel la ayîna
yam azì ma nglo ma ad’eng ma ngunguna,
yam yima ndjol ma fiyak ma akulo deina mi.
17Ma didina mi dala:
An mba ni kal suma kur ndaka.
Azi mba tit ni d’igi suma duka na,
buzuwazi mba mi hle yina
d’igi guguma mi hle yina na,
hliwizi mba mi tchim mbeyo,
kayam azi le tchod’a avoron an Ma didina.
18Bege mazi d’a hap poze lor mazid’a
mba d’i prud’uzi woi kur bur ma ayî
ma bibiliuna hi Ma didinina d’i.
Mba mi ngal andagad’a woi ki zla tat pet
kayî mam ma aku ma bibiliuna.
Ma didina mba mi b’lak suma
yam andagad’a woi kur bur máma.
Ni vama mandarâ!
Currently Selected:
Sofoni 1: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
