Zakari 2
2
Vama nde tam á hindid’ina: Ziyo ma nga yina
1An hle iran akulo, an gol wani vana nde tam mbei iranu, an we sana mi nga tchola ki ziyo ma nga yina abomu. 2An dum ala: Ang i nara ge?
Mi hulong dan ala: An i ni nga ni Jerusalem, na ni bubuwat ki fiyagat a ni nana ge?
3Ata yi máma malaika ma dan zlad’ina nga mi i gen malaika ma ding ma nga mi ngavamina, 4mi dum ala: Ang ring de mazong ma mi nga ki ziyona abom máma ala: Jerusalem mba d’i ka’î azì ma ngol ma bei gulumuna kam ba na, kayam d’uwarâ ki suma a mba kak kuruma a mba zul ablaud’a. 5Ma didina mi dala: An mba ni mbut ni d’igi gulumun ma akud’a na yam azì ma ngol máma, an mba ni mbut ni subur ra kurumba mi.
Ma didina nga mi yi suma a yozi magombina
6Ma didina mi dala:
Agi buzugugi woyo, agi buzugugi woi
yam ambas sa abo ma norîd’a,
kayam an ndjoyôgiya wa woi
yam andagad’a abot ma fid’ina.
7Agi suma Siyon suma nga kaka Babilon-na,
agi buzugugi woi sud’ugi tagiya.
8Ma didin ma ad’engêm kal pet ma ganï sundina, mi de zla d’a ndaka yam andjaf suma a hurumugina ala:
Sama lara ma dogina
mi don ni iran nda aduka.
9An mba ni hlabon akulo
á ngop andjaf máma.
Azi mba mbut vama hurumba
handjaf suma a nga lazi sundina.
Kur bur máma agi mba wagi ala ni Ma didin ma ad’engêm kal petna ba, mi sununïya.
10Ma didina mi dala:
Agi suma Siyon-na,
agi eregi ad’ugi akulo lagi furîd’a,
kayam an nga ni djïza á kak adigagiya.
11Kur bur máma andjaf suma ablaud’a
a mba reî ki an Ma didina,
a mba mbut sum mana,
an mba ni kak adigagiya.
Kur bur máma agi mba wagi ala ni Ma didin ma ad’engêm kal petna ba, mi sununï gevegiya.
12Ambas sa Juda-d’a mba d’i mbut ni
vana hi Ma didinina
yam ambas sa mam tinit irat vata.
Jerusalem mba d’i mbut
nazì ma ngol ma mam manama.
13Ar nge nge pî mi kak ki vunam ma du’â
avok Ma didina,
kayam nga mi nde woi
ata yam ma kak ma a tinim iram vama.
Currently Selected:
Zakari 2: BA
Highlight
Copy
Compare
Share
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
