Tit 2

Hat ta d’ingêra

1Wani ar ang dazi ni vama ndak yam hat ta d’ingêrina. 2Ang de mandjuvei momorogeina a kak ki ndjola, a ge yazi kä, a kak irazi sik, a kak ngingring kur he gagazid’a ki od’a ki ve tad’a. 3Hina mi, ang de marop momorogeina a ka’î d’igi arop suma yed’etna na, a kad’u sa d’i, a gurut ki süma d’uo mi. Ang arazi a hat ni hat ta djivid’a, 4kayam a hat arop suma gureina á le yam andjuviyozi ki grozina, 5á kak irazi sik, á ngom tazi ped’et, á le sunda djivid’a kur aziyaziya, á ge yazi kä ad’u andjuviyoziya, kayam suma a fe lovota á las zlad’a hAlonid’a d’i.

6Hina mi, ang gat azungeîna a kak irazi sik. 7Kur ahlena pet ang mbut ni vama taka kur sun nda djivid’a. Ang hat ni hat ta d’ingêra irang sik. 8Ang de ni zla d’a irata bei sana mi vang ki zla d’a bad’a, kayam mang suma djangûna a mbut zulona tala a de zla d’a tchod’a kei d’uo d’a.

9Ang gat magumeina a ge yazi kä ad’u suliyozina, a lazi tazi djivid’a kur ahlena pet bei gagad’a ba. 10Ar azi kuluzi d’i, wani a ta’î d’engzeng mazid’a woi teteu, a mbut ni vama taka á subur hata hAlo mei ma suta kur ahlena pet.

11Kayam Alona mi nde wa suma mam mbala ni sut ta yam ped’u d’a woi abua. 12Suma ndata nga d’i had’ei á walei tei woi ki tchod’a ki d’od’oka hi duniyad’id’a, á kagei irei sik, á tid’i d’ingêr ki d’engzenga avok Alona kur duniya d’a wanda. 13Ti nga d’i had’ei á tini huri ki furîd’a á djup bur ma subura hAlo mei ma ngol ma sud’ina Jesus Christ mba mi nde woina. 14Ni Ma he tam kei á sud’i woi kur tcho d’a lara ge pet á mbud’i mam suma yed’et suma tazi lazi zlezleû á le sun nda djivid’ina.

15Ang had’azi ahle ndazina, ang gigid’ezi mi. Ang ngobozi ki vun ma hed’a. Ar sa mi golong is si.

Currently Selected:

Tit 2: BA

Highlight

Copy

Compare