Sawal la giled’a Wana ni modo zla d’a kuruta
Wana ni modo zla d’a kuruta
Kur mbaktum ndata sawal la giled’a, d’a kud’ora, d’a subura, d’a mersi d’a led’a ki d’a tchenda d’a a nga kuad’a ni 150. Wana nahle suma Israel-lâ a nga hle ki sawala zlapa kahle suma bud’a á he kAlona ngolina.
Sawal la Gile ndata suma a hlatna ni teteng. Suma a djib’er ala David mi hle ni 73, Salomon mi hle ni mbà (72 ki 127), Moise mi hle ni tu (90), Etam mi hle ni tu (89), Asaf mi hle ni 12 (50, 73–83), Kore groma a hle ni 12 (42–49, 84, 85, 87 ki 88 mi).
Sawal la Gile d’a 93 gak 99 d’a nga d’i de zlad’a ni yam amul la ted’a hi Israel-lîd’a.
Sawal la Gile d’a 122 gak 134 d’a ni sawal la Israel-lâ a nga hlat kur lovota á i Jerusalem á lü vun tilîd’a.
Kur Sawal la Giled’a teteng ad’u 39 ang fe zla d’a ded’a kua ala: Tchol ndjö. Zla d’a Tchol ndjö ndata, suma a wat nga ad’ut tetet ti, wani a djib’er ala suma hle sawala a muzuk muzuk tua ba, a i avogo.
Jesus tamba mi hle Sawal la Giled’a teteng. Gol Mar 14.26. Kur hat mamba mi de zlad’a yam Sawal la Gile d’a 110-d’a ki d’a 118-d’a. Gol Mar 12.10 ki ma 36-na. Kur tchen mamba mi hle zla d’a de d’a yam Sawal la Gile d’a 22-d’a ki d’a 31-d’a. Gol Mar 15.34 ki Luc 23.46 mi.
Vun ma Djin ma Awilina nga mi tagei ala Sawal la Giled’a nga d’i de zlad’a yam ndaka hi Christ-sa (gol Mat 27.34-48 ki Saw Gil 22-d’a ki d’a 69-d’a mi), yam tchol mam mba akulo aduk suma matna ki i mam mba akulo kur suburid’a mi. Gol Sun SS 2-d’a ki 4-d’a ki Saw Gil 16-d’a ki d’a 110-d’a ki d’a 118-d’a. A de zla Sawal la Giled’a kur Vun ma Djin ma Awilina pet ni kal kisa.
Tchenda hi Israel-lîd’a, tchenda hi Jesus-d’a ki tchenda hi kretiyê suma avo’îd’a a fat ni kur Sawal la Giled’a. Gol Sun SS 4.24-26. Sawal la gile ndata ni d’igi mbiyo ma lau ma suma a guluma na. Gak ini suma a nga hal Alona á tchenema a nga gulum mi. t Wana ni wal mata
Sawal la Gile d’a kis yam dok vahl ndata a walat kä nad’u vahl.
Mbaktum mba avoka 1–41
Mbaktum mba mbàd’a 42–72
Mbaktum mba hindid’a 73–89
Mbaktum mba fid’id’a 90–106
Mbaktum mba vahla 107–150
Currently Selected:
Sawal la giled’a Wana ni modo zla d’a kuruta: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.