Sawal la giled’a 96
96
Suburi Ma didin ma nga mi djïna
1Agi gilegi Ma didina ki sawal la awilid’a!
Agi suma yam andagad’ina pet, agi gilegi Ma didina!
2Agi gilegi Ma didina, agi suburum simiyêmu,
agi dagi woi yam sut mamba burâ ki burâ.
3Agi dagi woi yam subur mamba avok andjaf suma pet,
agi tagagi sun mam mba ndandala woi avok suma pet mi.
4Kayam Ma didina ni ma ngol ma ndak á suburina;
ni ma a ringîm mandaram kal alona petna.
5Alona handjaf suma petna ni va d’i,
wani Ma didina ni ma lakulod’ina.
6Ngola ki subura ni mamba,
ad’eng mamba ki wile mamba
a nga kur gong mam mba kud’ora.
7Agi andjaf suma, agi suburugi Ma didina,
agi dagi woi yam subur mamba kad’eng mamba mi.
8Agi suburugi simiyê Ma didina,
agi mbeyegi ki he magi d’a hawad’a
kur gulumuna hi gong mambina.
9Agi grivigi kä avok Ma didina
kahle magi suma a tinizi irazi vazina;
agi suma yam andagad’ina pet, agi zlagagi avoromu.
10Agi dagi mandjaf suma pet ala: Ma didina nga mi tamula.
Ni kayam ndata ba, andagad’a ti nga kaka ngingring,
nga d’i giget tuo ni na.
Mi nga mi ka sariyad’a yam andjaf suma ki d’ingêra.
11Ar akulod’a ti le furîd’a,
ar andagad’a ti ayâ,
ar alum ma ngolâ mi oî d’igi azlona na
kahle suma a nga kuruma pet mi,
12Ar hur fulâ mi le furîd’a kahle suma kuruma pet,
ar agud’a pet ti le furîd’a
avok Ma didina,
13kayam nga mi djïya!
Nga mi djï á ka sariyad’a yam andagad’a,
mba mi ka sariyad’a yam suma
kur duniyad’ina ki d’ingêra,
mba mi ka sariyad’a yam andjaf suma dingâ
ki d’engzeng mamba mi.
Currently Selected:
Sawal la giled’a 96: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
