Sawal la giled’a 94
94
Alona ni ma hlatchugula
1Ma didina, angî Alo ma hlatchugula,
angî Alo ma hlatchugula,
ar ang tak subur manga woyo.
2Ma ka sariyad’a yam andagad’ina, ang tchol akulo,
ang he suma yam mba ad’enga wurak mazid’a
yam sun nda azi lata.
3Ma didina, suma asa’atna a mba kak hina gagak mindja ge?
Suma asa’atna a mba le furîd’a hina gagak mindja ge?
4Azi nga de zla d’a asa’ata,
azi nga de zlad’a ki ngula.
Suma a nga le sun nda ata yat tuo d’a pet
a nga subur taziya.
5Ma didina, azi nga miret sum mangâ kä,
azi nga le suma ang tazi djonina ndaka.
6Azi nga tchi arop suma modonod’a kangoyogeina woyo,
azi nga tchi suma hokuyod’a woi mi.
7Azi nga dala: Ma didina nga mi wami d’i,
Alona hi Jakob-ma nga mi tin humam mbi.
8Agi suma bei wed’a aduk sumina,
agi gologi tagi djiviya!
Agi suma lilid’a, ni mindja ba,
agi mba mbud’ugi suma ned’a ge?
9Mam ma mi tin humbina, mi ndak á hum mbuo zu?
Mam ma mi min irina, mi ndak á we d’uo zu?
10Mam ma gat andjaf sumina, mba mi ngobozi d’uo zu?
Mam ma hat suma ned’ina ni ma bei ned’a zu?
11Ma didina mi we djib’era hi sumid’a;
ndat ni hawa yak!
12Ma didina, sama ang nga ngobom
ma ang nga had’am gat mangîna,
mi le furîd’a.
13Mba mi tuk tam kur bur ma ndaka
á djup dabid’a hi zul la ngol
la a nga djugud’ot yam suma asa’atnid’a.
14Kayam ang nga ar sum mangâ woi d’i,
ang nga noî mang suma ang tazi djonina woi d’uo mi.
15Ang mba hulong ka sariya d’a d’ingêra;
suma huruzi tuna a mba le sunda kat mi.
16Ni nge ba, mba mi tchol avoron
á d’el suma asa’at ndazina ge?
Ni nge ba, mba mi tchol á ndjunun
abo suma bei d’ingêr ndazina ge?
17Ladjï Ma didina mi ndjunun nduo ni,
an arî hina go á bad’a woi ki iran fafat.
18Ata yima an nga ni dala: An nga ni puk kä na,
Ma didina, o mang nga didinda nga d’i ndjununu.
19Ata yima an nga ki djib’er ra tetengina,
ang nga b’lengên hurunu, ang nga han furîd’a mi.
20Suma ka sariya suma tcho
suma a tin gat ta ata yat tuo d’ina,
a nga zlap tu ki sed’eng á ka sariyad’a zu?
21Azi nga tok tazi á kak djangûna ki suma d’ingêrâ,
azi nga ka sariya d’a matna
yam suma bei zlad’a kazi ba na.
22Wani Ma didina mi ni gulumun man ma ad’eng ma ngunguna;
Alo mana nahina man nda an ngei tan kuad’a.
23Mam mba mi hulongôzi tcho mazid’a kaziya,
mam mba mi b’lagazi woi
yam zla mazi d’a asa’at ta azi lata.
Ma didina Alo meina mba mi dabazi woi ki irazi fafat.
Currently Selected:
Sawal la giled’a 94: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
