Sawal la giled’a 83
83
Israel-lâ a tchen Alona mi dik suma djangûna
1Ni sawal la gile d’a Asaf mi hlata.
2Alo mana, ang kak hina mudjuk ki,
Alo mana, ang kak bei de zlad’a d’i,
ang kak hawa tchugot tuo mi.
3Kayam mang suma djangûna a nga djulula,
suma a noyôngâ a nga yo djedjerezi akulo.
4A nga min tazi gumun á dur sum mangâ,
a ndjak vunazi á dur suma ang nga ngomozina.
5Azi nga de tazi ala:
Ei dabazi andjavazi woi yam andagad’a;
ar sa mi yi simiyê Israel-lâ bugol luo d’a.
6Azi djop taziya, vunazi tchuk tu,
a djin vunazi ala a dur ki sed’engû.
7Azi ni suma Edom-ma, suma Ismael-lâ,
suma Mowap-ma, suma Hagar-râ,
8suma Gebal-lâ, suma Amon-na, suma Amale’â,
suma Filistê-na ki suma a nga kaka avo Tir-râ mi.
9Suma Asiri-na pî a zlap ki sed’ezi mi,
a had’enga mi Lot groma.
Tchol ndjö
10Ang b’lagazi woi d’igi ang b’lak Sisera ki Jabin
avun alum ma Kison-na na
d’igi ang b’lak suma Madiyan-na na mi.
11Ang b’lagazi woi avun mbiyo ma lau ma Harot-na;
azi mbut vama tub’ad’a handagad’ina.
12Ang b’lak suma nglo mazina woi
d’igi ang b’lak Orep ki Zep na,
ang b’lak amulei mazina woi
d’igi ang b’lak Zeba ki Salmuna na mi.
13Sum ndazina a dala:
Ei hlei yima kaka hAlonina.
14Alo mana, ang mbud’uzi d’igi mbirlimba na,
d’igi hububu ma simetna mi felema na,
15d’igi aku d’a nga d’i ngal agud’id’a na,
d’igi sin aku d’a ti trâ yam ahuniyônid’a na mi.
16Ang digizi ki simet mang ma ngolâ,
ang mbud’uzi mandarâ ki babar mang ma ngol ma kal papana mi.
17Ma didina, ang mangâzi woyo,
kayam azi hulongî gevengû.
18Ar azi mbut zulona, ar azi mbut mandarâ ki irazi fafat,
ar a mang ngei avun nga hur mazina, ar a dap pei mi.
19Ar azi wala angî ma a yang ala Ma didina na,
ang tu ni ma sä akulo ma kal tegles
ma te yam andagad’a petna.
Currently Selected:
Sawal la giled’a 83: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
