Sawal la giled’a 69
69
Tchenda hi sama nga kur yor tad’ina
1Ni sawal la gile d’a David mi hlat mi hat mi ma ngolâ hi suma hle sawala mi hlat kadingîd’a.
2Alo mana, ang sud’unu,
kayam ndaka mba kelen ta d’igi mbina mi mba kel sana ta na.
3An nga ni rot kä aduk dorbopma,
nga ni fe yima ad’eng ma ni tin asena d’i.
Gola! An nga aduk galileina, abilâ nga mi hlanu.
4An seî wa abo tchina, delen ndi so wa ndandang,
iran ndi so wa woi ngolol á djubung ang Alo mana.
5Suma a noyôn hawa ya’â
a nablaud’a kal tumus sa kanda;
suma a kak djangûna ki sed’en hawa ya’â,
a kalan kad’enga, a nga halan á tchan ndeyo;
vama an kulum nga d’uo na,
a tezen kad’enga ala an wuragamu.
6Alo mana, ang wahle suma lili suma an lazi avorongâ,
tcho manda ti nga ngeid’a avorong nguo mi.
7Salad’a, Ma didin ma ad’engêng kal petna,
ar suma a tin huruzi kangâ a mbut zulona kan ndi;
Alona hi Israel-lîna,
ar suma a nga halangâ a mang ngei kayam an nduo mi.
8Ni kayam ang ba, an nga ni ve tan kur ngula,
an mbut zulona mi.
9Ni kayam ang ba, an mbut sama dingâ ir b’oziyona,
an mbut angeina ir b’oziyon suma asuyona mi.
10Tan nga d’i lan zlezleû yam gong manga,
ngul la suma a nga ngulunga ti hulong kanu.
11An nga ni le tan ndaka,
an nga ni d’el tan bei te tena mi,
wani a mbut ni vama ngula kanu.
12An tchuk dodora atanu,
wani an mbut ni va mazi ma lasa.
13Suma a nga kaka kä avun azina a nga de zlad’a kanu,
suma a gurut ki sümina a nga hle sawala ki sed’en mi.
14Ma didina, an nga ni tchenengû,
Alo mana, ni yima ndak á ang wan hohowona.
O mang nga didinda ti ngola heî.
Ang humunu; gagazi, angî ma sud’una.
15Ang pad’an ndei aduk dorbopma,
ang hlan ndei aduk galileina
abo suma a noyôna.
16Ang ar abilâ mi hlan ndi,
ar an sir kä ad’u galileina d’i,
ar yima azuleina mi duk vunam kan nduo mi.
17Ma didina, ang humunu,
kayam o mang nga didinda ti ngola heî;
yam we hohou manga, ang mbud’ï irang kiranu.
18Ar ang mbut azigang mi azong mangâ d’i;
kayam an nga kur ndaka, ang humun atogo zak.
19Ang hud’ï geven go á ndjununu,
ang prud’un ndei abo man suma djangûna mi.
20Ang we ngul la azi nga ngulunda,
ang we mbut ta azi nga mbud’un zulonid’a,
ang we mang nga azi nga mangân ndeid’a,
ang we man suma djangûna pet mi.
21Ngul mazid’a b’lagan hurunu,
an ve tugud’eid’a;
an hal sama wan hohowona,
wani sa nga d’i;
an hal sama b’lengên huruna,
wani an fe nga sa d’uo mi.
22Azi nga tchugun kuma ma tchi matna aduk te mana,
ata yima vunan sona, azi nga han süm guguzlu ma azleîna.
23Ar te mazina mi mbut ni dauna avoroziya,
ar te mazi ma ata yima darigïd’ina,
mi mbut nabei d’a vazid’a.
24Ar irazi ti mbut nduvunda, a we yina d’i,
ar furuzi mi gun kä ki iram fafat.
25Ar hurung zal kaziya,
ar hurung hat atazi guguî mi.
26Ar yi mazi ma kaka mi mbut djona,
ar sa mi kak kur aziyazi d’uo mi.
27Kayam azi nga djop vun suma ang gad’azina,
azi nga de woi yam ndaka hi suma ang duruzi mbuleinina.
28Ang ndumuzi tcho mazid’a yam ndrat tchod’a,
ar azi kal kur d’ingêr manga d’uo mi.
29Ang hazazi simiyêzi woi kur mbaktumba hi suma arinid’a,
ar ang b’irizi simiyêzi zlapa ki suma d’ingêrâ d’i.
30An ni ma hohou ma kur ndakina.
Alo mana, ang mbeï tcholon akulo, ang sud’unu.
31An mba ni gileng simiyêng ki sawala,
an mba ni suburungû, an mba ni hang ngola mi.
32Ma didina, wana ni vama lang tang djivid’a kal amuhlâ,
kal amuhl ma digili ma ad’eng ma an hangzina.
33Suma lulumana a mba we hina wani, a mba le furîd’a,
suma a nga hal Alonina, va mi lazi d’i.
34Ma didina nga mi hum tchina hi suma a nga kur ndakina,
nga mi mar yam mam suma a yozi magombina d’uo mi.
35Ar akulod’a kandagad’a a gilemu,
ar alum ma ngolâ kahlena pet suma a nga kuruma a gilem mi.
36Kayam Alona mba mi sut suma kur Siyon-na,
mba mi min azì ma teteng ma Juda-na akulo,
sum mama a mba kak kuru,
azì máma mba mi arî mazina mi.
37Andjaf azungeî mama a mba tum djona,
suma a le kama a mba kak kur mi.
Currently Selected:
Sawal la giled’a 69: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
