Sawal la giled’a 63
63
Ang hat hurung yam Alona
1Ni sawal la gile d’a David mi hlat kid’a mi ring ngei tam abo Saul hur ful ma Juda-nid’a.
2Alona, angî Alo mana, an nga ni halangû,
zlang nga d’i lanu,
an nga ni hat hurun kang
d’igi andaga d’a so d’a mbiyona nga mi ndagat tuo d’a na.
3Kayam ndata, an nga ni golong kur gong mang nga kud’ora
á wad’eng manga ki subur manga.
4Kayam o mang nga didinda kal kak kä karid’id’a,
an mba ni suburungû.
5Ata yima an nga kaka ki iran yam andagad’a tua na,
an mba ni suburungû,
an mba ni yo abon akulo ki simiyêngû.
6An mba ni hop pei kahle suma djivina
d’igi te ma djivi ma mbulâ na,
an mba ni le furîd’a, an mba ni gileng mi.
7Ata yima an nga ni bur kä na, an nga ni djib’er kangû,
gak yima fod’a an nga ni dugot djib’era kangû.
8Kayam angî ma ndjununa,
an nga ni le furîd’a ata yi
ma an nga ngeid’a ad’u gigingângâ.
9An reî tan ni ki angû,
ad’eng manga nga d’i djigin akulo.
10Wani suma a halan á tchid’ina,
a mba i kä azulei ata yima kä ad’u andagad’ina.
11A mba tchazi ki mbigeu d’a fiyaka,
a mba mbut ni vama ved’a hi ngûnina.
12An amulâ mba ni le furîd’a kang ang Alona;
sama lara ma gun tam ki simiyêngâ
mba mi subur tam kang mi,
kayam suma ka zlad’a a mba duguzi vunaziya.
Currently Selected:
Sawal la giled’a 63: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
