Sawal la giled’a 56
56
Tchenda hi sama tin hurum yam Alonina
1Ni sawal la gile d’a David mi hlat mi hat mi ma ngolâ hi suma hle sawalina. Mi hlat ni kid’a suma Filistê-na a vum avo Gat-ta.
2Alo mana, ang wan hohowonu,
kayam suma a nga digin ad’unu,
burâ ki burâ a nga mbud’un avalid’a ki durâ.
3Burâ ki burâ man suma djangûna a nga digin ad’unu,
azi nablaud’a a nga durun ayîna ki subur tad’a.
4Bur ma mandarâ mi lana,
an tin hurun ni kangû.
5Alona, an nga ni gileng yam zla d’a ang data,
an tin hurun ni kangû, an nga ni le mandar ri.
Sana ni nge ba, mi lan vana ge?
6Burâ ki burâ a nga mbut zla manda tchod’a,
djib’er mazid’a pet ná lan tchod’a.
7A ndjak vunaziya,
a nga tchid’in asenu,
a nga kud’ugun á tchid’a.
8Kur tcho mazi ndata hina pet ni,
azi mba prut tei abong zu?
Alo mana, ang kuzuzi vunazi kayî mangâ.
9Ang we tcha man nda tata d’a,
ang ve simi mana kur gugura.
Ang b’irim nga kä kur mbaktum manga d’uo zu?
10Fata an mba ni yang á ndjununda,
man suma djangûna a mba dadak bugol kazigaziya.
Ata yi máma an mba ni wala
ang Alona, ang nga ki sed’enu.
11Alona, an nga ni gileng yam zla d’a ang data.
Gagazi, Ma didina, an nga ni gileng yam zla ndata.
12An tin hurun ni kangû, an nga ni le mandar ri.
Sana ni nge ba, mi lan vana ge?
13Alo mana, mbeî an ndak vun vun ma hle ma an hlangzina,
an mba ni hang vama ngat buzu ma le mersid’a,
14kayam ang prud’un ndei avun matna.
Ang siran ad’enga, an puk nga kä d’i,
kayam an tit avorong kur b’od’a aduk suma a nga ki irazina.
Currently Selected:
Sawal la giled’a 56: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
