Sawal la giled’a 46
46
Alo ma ad’engêm kal petna mi nga ki sed’eya
1Ni sawal la Kore groma a hlat a hat mi ma ngolâ hi suma hle sawalina.
2Alona ni ma ei ngeyei tei atama, mi nad’eng meid’a,
mi nga go á ndjuni teteu ata yima ndaka nga d’i mbana.
3-4Kayam ndata, le andagad’a giged’a,
le ahinad’a yir gak i kä aduk alum ma ngolâ,
le mbiyo aluma mi sulul akulo
gak nga mi giget ahinad’a pî,
ei nga lei mandar ri.
Tchol ndjö
5Aluma nga, ni ma mbiyom nga mi le
suma avo hurazina hAlonina tazi djivid’ina.
Azì máma ni yima kal tegles ma aduk yi
ma kak ma tetengâ hi ma sä akulo ma kal teglesîna.
6Alona mi nga kurumu, azì máma nga mi giget ti;
ki yorogo tcholola Alona nga mi ngomomu.
7Andjaf suma a nga siwela, leud’a nga d’i giget teteng mi.
Ata yima Alona mi de zlad’ina,
andagad’a ti lau woi d’igi mbina na.
8Ma didin ma ad’engêm kal petna mi nga ki sed’eya,
Alona hi Jakob-ma ni yi mei ma ngeid’a.
Tchol ndjö
9Agi mbeyegi gologi sun nda Ma didina mi lata,
agi gologi sun nda ndandal la mi lat yam andagad’id’a.
10Nga mi d’el vun ayîna gak avun dabid’a handagad’id’a,
nga mi kus yeûd’a kasapa woyo,
nga mi ngal pus ma dur ayîna woi mi.
11Alona mi dala: Agi bagiya! Ar agi wagi ala an nAlona.
An nga ni te yam suma, ni te yam andagad’a mi.
12Ma didin ma ad’engêm kal petna mi nga ki sed’eya.
Alona hi Jakob-ma ni yi mei ma ngeid’a.
Tchol ndjö.
Currently Selected:
Sawal la giled’a 46: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
