Sawal la giled’a 44
44
Yor tad’a hi sumid’a
1Ni sawal la Kore groma a hlat a hat mi ma ngolâ hi suma hle sawalina.
2Alo mamina, ami humumi ki humamiya,
abuyomi ngolo a dami
zla sun nda ang lat kur atchogoi mazid’a avok dedeid’a.
3Ang dik andjaf suma woi á hazi yima kaka,
ang b’lak andjaf suma woi á arazi yima kaka mi.
4Azi hlambasa nga ni ki durâ d’i,
azi kus ayîna nga ni kad’eng mazid’a d’uo mi.
Wani ni kad’eng manga, ang tin irang kaziya,
kayam me ang hurung vaziya.
5Alo mana, angî amul mana,
ni ang ba, had’enga mi sum mangâ á kus ayîna.
6Ni kayam ang ba, ami digimi mami suma djangûna,
ni kayam simiyêng ba,
ami mired’emi mami suma djangûna kä kasemi mi.
7An tin nga hurun yam yeû manda d’i,
ni mbigeu man nda fiyaka ba, ti sud’un nduo mi.
8Wani ni ang ba, sud’umi woi abo mami suma djangûna,
ni ang ba, mbut suma a noyômina zulona.
9Ami nga suburung burâ ki burâ,
ami mba gileng simiyêng gak didin.
Tchol ndjö.
10Wani ang arami woyo,
ang mbud’umi zulona avun ayî ma durâ,
ang i nga dur ayîna ki b’rang mamid’a d’i.
11Ang dadagami kazigami avok mami suma djangûna;
suma a noyômina a hurumumi ahle mamina mi.
12Ang hami woi d’igi tumiyô suma a izi ata yima tchid’ina na,
ang b’rawami woi aduk andjaf suma dingâ.
13Ang gus sum mangâ woi ki gus sa akid’eid’a
d’igi suma zlazi nga d’uo na na.
14Ang mbud’umi vama lasa avok ndromina,
ang mbud’umi vama sanda avok suma a nguyumina.
15Ang mbud’umi vama lasa mi suma;
a nga kidjik yazi ad’umi aduk suma.
16Burâ ki burâ zulona nga mi lanu,
zulona nga mi tchan mi,
17abo sama mi kragan ngulina,
nga mi lazan avok man ma djangû ma murud’umbina.
18Ahle ndazina a mba kami hina pet pî, ami marang nga d’i,
ami tchilami nga yam vun mang ma djinda d’uo mi.
19Ami lami nga hurumi gigrit kang ngi,
ami d’ezemi nga woi kur lovot manga d’uo mi.
20Hina pî, ang arami talala aduk ahle suma abageina,
ang arami woi avun matna.
21Le ami marami ang Alo mamina woyo,
le ami mbud’umi irami ata alo ma dingâ ni,
22ang Alo ma we hur sumina,
ang mba ar bei we zla ndata d’i.
23Wani ni kayam ang ba, a nga tchami burâ ki burâ,
a nga golomi d’igi tumiyô suma a izi ata yima ngatina na.
24Salad’a, ang zlit akulo!
Ni kayam me ba, ang bur sena ge?
Ang tchol akulo! Ang arami woi ki irang fafat ti.
25Ni kayam me ba, ang ngei irang avoromi ge?
Ni kayam me ba, ang mar yam ndak mamid’a
ki djop vun mamina na ge?
26Kayam ami nga tchuka kä aduk guguma,
ami nga tchuka kä yam andagad’a mi.
27Ang tchol akulo! Ang mbeï ndjunumiya,
ang sud’umi woi yam o mang nga didinda.
Currently Selected:
Sawal la giled’a 44: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
