Sawal la giled’a 42
42
MBAKTUM MBA MBÀD’A
(42—72)
Yor tad’a hi sama a digim mbeina
1Ni sawal la Kore groma a hlat a hat mi ma ngolâ hi suma hle sawalina.
2Alo mana, an nga ni hat hurun kang
d’igi pandrid’a nga d’i hat hurut yam mbiyo ma toliyona na.
3Alo man ma arina zlam nga d’i lan heî.
Ni mindja ba, an mba ni kal kur gong mamba
á wum iram ge?
4Andjege ki faleya, simi irana mi mbut ni te mana,
kayam a nga dan burâ ki burâ ala:
Alo mangâ mi nga ni lara ge?
5Wani an nga ki djib’era ki hur ma hata
ata yima an nga ni i adjeu ki suma ablaud’a
kur gonga hAlonid’a kur bur ma vun tilâ
á suburum á lum mersina.
6An nga ni djop tan ala:
Ni kayam me ba, an mbut hohoud’a hina ge?
Ni kayam me ba, an djib’er hina ge?
An tin hurun ni yam Alo mana,
an mba ni gilem kua yam sut mamba mi.
7Alo mana, an mbut wa hohoud’a.
Kayam ndata, ata yi
ma an nga ata yima alum ma Jurdê-na tinï ad’ud’a djangâ kua
yam ahina d’a Hermon-nda kahina d’a Misar-rina,
an nga ni djib’er kangû.
8Ndaka nga d’i djang kan kä
d’igi mbiyona nga mi djang kä yam ndrama wü na,
abil mangâ nga mi sulul kan akulo
d’igi sama mbina mi hlubum kä na na.
9Ma didina, ang tagan djivi manga faleya,
ar an hle sawal manga andjege
á tcheneng ang Alo ma han arid’ina.
10Alo ma ndjununa, an nga ni dangû,
ni kayam me ba, ang maran ndei ge?
Ni kayam me ba, ang aran kur ndaka
abo man suma djangûna na ge?
11Tan tchuk wa susub’ok,
ata yima man suma djangûna a nga mbud’un zulona
ki zla mazi d’a ded’a burâ ki burâ ala:
Alo mangâ, mi nga ni lara ge d’a.
12An nga ni djop tan ala:
Ni kayam me ba, an mbut hohoud’a hina ge?
Ni kayam me ba, an djib’er hina ge?
An tin hurun ni yam Alo mana, an mba ni gilem kua;
mam mi Alo man ma sud’una.
Currently Selected:
Sawal la giled’a 42: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
