Sawal la giled’a 40
40
David mi subur Ma didina
1Ni sawal la David mi hlat mi hat mi ma ngolâ hi suma hle sawalina.
2An tin hurun yam Ma didina;
mi mbut iramu, mi hum tchi mana mi.
3Mi pad’an ndei kur zul la yiyik ka tchod’a,
kur dorbop ma kä yiyi’â,
mi tinin asen akulo yam ahinad’a,
mi minin lovot manda á tita mi.
4Mi had’an sawal la awilid’a
á gilem mam Alo meina.
Suma ablaud’a a mba we hina,
a mba le mandarâ,
a mba tin huruzi yam Ma didina mi.
5Sama nga mi le furîd’ina
ni sama deng tam ata Ma didinina;
nga mi zlap ki suma subur tazina
d’oze suma ka zlad’a d’uo mi.
6Ma didina Alo mana,
sun mang nga nglo d’a kal tegles sa ang lat kamid’a
ki nga hur mang ma ang ngam kamina
a zul ablaud’a heî.
Sama d’igi ang na na nga d’i!
An min de woi kazi kua,
an min tchi wala woi kaziya,
wani azi kal ablaud’a heî,
an ndak á vazi ad’uzi woi pet ti.
7Ang tang nga lang djivid’a
yam vama ngat buzuna ki he d’a hawad’a hi d’uwarîd’a d’i,
wani ang malan human ndei á hum zla manga.
Ang min nga vama ngat buzu ma ngala,
d’oze vama ngat buzu ma zlup yam tchod’a woina d’uo mi.
8Kayam ndata, an dala: An wana!
An mba wa ki mbaktum mba d’ut ta a b’irit kanda.
9Alo mana, tan lan djivid’a á le min manga,
gat manga nga kurun krovo mi.
10An nga ni tchi wal zla d’a irata aduk toka hablau sumid’a,
an nga ni duk vunan ndi.
Ma didina, ang we.
11An ngei nga d’ingêr manga kä kurun ndi,
an nga ni de zla d’engzeng manga ki sut manga woyo,
an nga ni ngei o mang nga didinda ki gagazi manga kä
aduk toka hablau sumid’a d’uo mi.
12Ma didina, ang mba ar bei wan hohowon ndi,
kayam o mang nga didinda ki gagazi manga a mba ngomon teteu.
David mi tchen Alona á ndjunumu
(Gol Saw Gil 70.2-6)
13Kayam an nga ki tcho d’a bei dap ndumba ba d’a kanu,
tcho manda tok kanu;
an we nga vama an lum ki sed’etna d’i.
Ta ablaud’a kal tumus sa kanda,
ve ta manda nga d’uo d’a.
14Ma didina, le ang mina ni, ang sud’unu;
Ma didina, ang mbeï atogo ndjununu!
15Ar suma pet suma a halan á tchid’ina
a mbut zulona, a mbut vama lasa mi;
ar suma a min á lan tchod’ina
a hulong bugol ki zulona.
16Suma a nga de kan ala: Tchuhu! Tchuhu! na,
ar azi mbut mandarâ abo zulo mazina.
17Ma didina, ar suma pet suma a nga halangâ
a le furîd’a ki hur ma hapma kangû,
ar suma a le kayam sut mangina
a de burâ ki burâ ala: Ma didina ni Ma kal papana!
18An ni ma hou ma hohoud’a,
wani Salad’a, ang nga djib’er kanu;
angî ma ndjununa, angî ma sud’una mi.
Alo mana, ang le lilinga d’i.
Currently Selected:
Sawal la giled’a 40: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
