Sawal la giled’a 21
21
Amulâ nga mi le furîd’a yam Ma didina
1Ni sawal la David mi hlat mi hat mi ma ngolâ hi suma hle sawalina.
2Ma didina, amulâ nga mi le furîd’a yam ad’eng manga;
kid’a ang sud’umba, mi le hur ma hapma ngola.
3Ang hum wa vama hurum minima,
ang aram nga bei hum vama mam tcheneng ki vunam kama d’i.
Tchol ndjö
4Ang d’ugulom wa,
ang b’e wa vun ma djivi ma kal teglesâ kamu,
ang kulubum wa avaval la lor ra kal teglesa kam mi.
5Mi tcheneng ala ar va mi lum mbi; ang humumu,
ang hum bizad’a ablaud’a gak didin.
6Kayam ndjun manga, subur mamba ti kal ngola,
ang hum ngola, zlam nde yina mi.
7Ang mbud’um vama b’e vuna gak didin,
ang mbud’um sama le furîd’a avorongâ mi.
8Ma didina, amulâ mi deng tamî atang angû,
ma sä akulo ma kal teglesâ,
yam o mang nga didinda mam mba mi puk kä d’i.
9Amulâ, ang mba vik mang suma djangûna,
ni kad’eng manga ba, ang mba yo suma a noyôngâ.
10Bur ma ang mba tak tang ngei irazina,
ang mba mbud’uzi ni d’igi agu ma vakud’a hîhî’â na.
Ar Ma didina mi b’lagazi woi kayî mama,
ar aku mamba ti ngalazi woi mi.
11Ang mba dabazi grozina tchid’a woi yam andagad’a,
ang mba dabazi andjavazi tchid’a woi aduk suma mi.
12Azi ndjak vunazi á lang tchod’a,
azi nga huruzi á lang zla d’a tchod’a.
Hina pî, azi mba ndak ki.
13Ang mba yed’ezi ki yeû manga.
Kayam ndata, azi mba hang huyogozi á ringâ.
14Ma didina, ang tchol akulo kad’eng manga!
Ami min hlami sawala á suburung yam ad’eng manga.
Currently Selected:
Sawal la giled’a 21: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
