Sawal la giled’a 132
132
Ma didina mi man Siyon á kak kuru
1Ni sawal la suma a djak Jerusalem á lü vun tilîna a hlata.
Ma didina, ang djib’er yam David,
ang djib’er yam ndak ka mi fata pet mi.
2Mi gun tam avok Ma didina,
mi hle vunam mAlo ma ad’engâ hi Jakob-ma ala:
3An mba ni kal kur yi man ma kaka d’i,
an mba ni djak yam azang ma an nga ni bur kama d’i,
4an mba ni bur sen ndi,
iran mba d’i rimek kuo mi,
5gak an fe yina yam Ma didina,
yima kaka yam Alo ma ad’engâ hi Jakob-ma.
6Gola! Ami humumi avun suma Efrata-na ala:
Ami fami zandu’â hAlonina sä abagei
aduk agu d’a Jar-ra.
7Ar ei i ata yi mam ma kaka,
ar ei i grivi kä avok yi mam ma tin asema.
8Ma didina, ang tchol akulo,
ang mbeï ata yang ma tuk tad’a
ki zanduk mang ma ad’eng manga nga kuana.
9Ar mang suma ngat buzuna a tchuk d’ingêra atazi
d’igi suma a tchuk baruna atazi na,
ar mang suma d’engzengâ
a er ad’uzi akulo ki furîd’a mi.
10Kayam o mang nga yam azong mangâ David
ma ang manam tinim amulinid’a,
ang zud’um mbei d’i.
11Ma didina mi gun tam mi David,
gagazi, nga mi hulong bugol li;
mi dala: Ni gorong ma kurungâ ba,
an mba ni tinim á kak
yam zlam mang nga amula blangângû.
12Le grongâ ki grozina a ngom vun man ma djinda
ki vun man ma he ma an nga ni had’azizina mi ni,
a mba kak yam zlam manga gak didin.
13Kayam ndata, Ma didina mi man Siyon,
hurum minit á kak kuru.
14Mi dala: Wana ni yi man ma tuk tad’a gak didin,
an mba ni kak kua, kayam an hurun minid’u.
15An mba ni b’e vunan yam Siyon,
an mba ni he tena mi sum matna,
an mba ni hop mat suma hohoud’a.
16An mba ni tchuk suta ata mat suma ngat buzuna
d’igi a tchuk baruna atazi na,
mat suma d’engzengâ
a mba er ad’uzi akulo ki furîd’a mi.
17An mba ni tin amul ma ad’engâ
ad’u andjafâ hi David-na kur Siyon,
an mba ni min lovota avok ma an mba ni vragam balum
ma an manam tinim amulina.
18An mba ni tchuk zulona ata mam suma djangûna
d’igi a tchuk baruna atazi na,
avaval la kamba mba d’i wile mi.
Currently Selected:
Sawal la giled’a 132: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
