Sawal la giled’a 112
112
B’e vun ma yam sama mi le mandara Alonina
1Agi gilegi Ma didina!
Sama nga mi le mandara Alonina,
mi le furîd’a;
sama tam nga d’i lum djivid’a yam vun mam ma hed’ina,
mi le furîd’a mi.
2Andjavam mba mi kak ad’enga yam ambasa;
andjaf suma d’ingêrâ, Alona mba mi b’e vunam kazi mi.
3Avo hi sa máma, ang fe ni duzîd’a ki ndjondjoîd’a,
d’ingêr mamba ti nga kaka gak didin mi.
4Ata yima yina mi mbut nduvundina,
b’od’a nga d’i b’o woi yam suma d’ingêrâ,
yam suma d’engzengâ,
yam suma a le djivid’ina,
yam suma a we hohowa sumina mi.
5Sama nga mi we hohowa suma, nga mi hazi balâ,
nga mi le sun mamba ata lovod’ot na,
nga mi le ni sun nda djivid’a.
6Sa máma mba mi giget ti;
simiyêm mba mi yi gak didin mi.
7Vunadigam nga d’i tumum yam zla d’a tcho d’a mi humuta d’i,
hurum ade’esa, mi tin hurum mi yam Ma didina mi.
8Mi nga mi tchol ngingring,
nga mi ring mandar ri
gak mi we kus sa yam mam suma djangûnid’a.
9Nga mi b’rau ahligiyem mi suma houd’a;
djivi mam mba led’a nga d’i dap puo mi.
Mba mi mbut ngola, a mba suburum mi.
10Sama asa’atna mba mi we hina wani, mba mi ka guruta,
mba mi mut siyamu, ad’engêm mba d’i dap pei mi.
Suma asa’atna, min mazid’a mba d’i kal leyo.
Currently Selected:
Sawal la giled’a 112: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
