Zla d’a d’ogolâ 30
30
ZLA D’A D’OGOL LA DE D’A TETENGA
(30—31)
Zlad’a hi Agur-ra
1Wana ni zlad’a hi Agur Jake goromid’a, wana ni zla d’a sa máma mi dat mi Itiyel, mi dat mi Itiyel azi ki Ukal-la:
2Gagazi, lili manda kal suma pet, an nga ki wad’ud’a d’igi sana na d’i.
3An hat nga ned’a d’i,
an we nga Ma bei tchod’a ba na d’uo mi.
4Ni nge mi djak akulo ba, mi hulongî kä ge?
Ni nge mi ve simetna hur abom ge?
Ni nge mi gul mbina atam kur baruna ge?
Ni nge mi tin vun dabid’a handagad’id’a ge?
Simiyêm nana ge? Simiyê goroma nana ge?
Le ang wumu ni, ang danu.
5Zlad’a hAlonid’a pet ni zla d’a ndak memeta. Mam mi mbareid’a hi suma a ngei tazi atama. 6Ar ang tchuk zla d’a ding yam zla mamba ba, mi ngobong ang mbut sama ka zlad’a d’i.
7An nga ni tcheneng yam ahlena mbà; ang hadji avok mat mana: 8Ang walan ndei ki zla d’a hawa yaka ki zla d’a kad’a. Ang han houd’a d’uo mi na, ang han ndjondjoîd’a d’uo mi. Ang han ni te ma ndagana hol. 9Le an nde kur duzîd’a ni, dam an mba ni tin vunan ni dala: Ma didina ni nge ge kla. Le houd’a kal kanu ni, dam an mba ni kula, ni ngulung simiyêng ang Alo mana kla.
10Ar ang de zla d’a tchod’a yam azongâ kä gen salama ba, mi tchugung zlad’a kang ba, ang wurak yam tcho manga d’i.
11Suma dingâ a nga yahlena yam abuyoziya, a nga de zla d’a djivi yam asuyozi d’uo mi.
12Suma dingâ a nga djib’er ala azi ni suma yed’etna, wani a mbus nga tazi woi kur ndjendje mazid’a d’i.
13Suma dingâ a nga, ni suma yam mba ad’enga, a nga gol suma ki irazi sod’a woi ngrazang.
14Suma dingâ a nga, siyazi mi ni d’igi mbigeu d’a fiyak ka siyat mbàd’a na, agingâzi ti ni d’igi mbigeud’a na á b’lak suma hohou suma kur ambasina woyo, á tchi suma kid’aka woi aduk suma mi.
Zla d’a ding nga d’ogol la tetenga
15Dileîd’a ti nga ki gro arop suma mbà suma a nga dala: Heya! Heya! na. Ahlena hindi a nga, ni suma va nga mi ndagazi d’uo na, ma fid’ina mi nga kua, ni suma a nga dala: Ndak wa d’uo na.
16Nala, yima azuleina,
atcha d’a gendreged’a,
andaga d’a nga d’i hop ki mbina d’uo d’a,
aku d’a nga d’i dala: Ndak wa! d’uo d’a.
17Sama mi las abum mi gol asuma is mi na, gagau ma avun toliyondina mba mi pad’am iramu, agigilauna groma a mba tum mi.
18Ahlena hindi a nga, ma fid’ina mi nga kua: Ni suma a kal kana, ni suma an wazi nga ad’uzi d’uo na mi.
19Nala, lovot ta agigilauna mi pir kakulo hur alonid’a;
lovot ta guguina mi tan kakulo yam ahinad’id’a;
lovot ta batod’a ti djang ki hur alum ma ngolîd’a;
lovot ta sana mi i ki avo hi gor weid’id’a.
20Wani ni lovota hatcha d’a mizeunid’a: Nga d’i le mizeuna, nga d’i mbus tat teyo, nga d’i dala: An le nga tcho d’i.
21Andagad’a nga d’i giget abo ahlena hindi, ma fid’ina mi nga kua: Ni ma ndat ndak á ve tat abom mbuo na.
22Nala, magom ma mi mbut amulîna;
ma lili ma mi hop ki tenina;
23atcha d’a suma a golot isa, ti mbut atcha d’a telid’a;
wei d’a ti vrak balum salatid’a.
24Ahle suma gureina fid’i a nga yam andagad’a: Ni suma a kal lei ki ned’a heîna.
25Matchid’agad’a nahle suma ad’engêzi nga d’uo na, a nga tok te mazina nawaliya;
26ahîna ni vama ad’engêm nga d’uo na, mi ge zula naduk ahinad’a;
27djera ti nga kamul li, wani ti buzuk kei nad’u adezet teteng;
28hod’ogol ma ang ndak á vum kabongâ, wani ang fumî kur azì ma amula hamuleinina.
29Ahlena hindi a nga, suma a nga titna, ma fid’ina mi nga kua: Ni suma a nga tit tit ta djivid’a heîna.
30Azlo ma ni ngola hahle suma abageina ma nga mi didak kazigam abo va d’uo na;
31ahlek ma nga mi tit avok ahlugud’einina;
mbekmbere ma nga mi tit avok aho’îna;
amul ma nga mi tit avok azigar mamina.
32Le ang nga lahle suma lilid’a kur subur ta manga, d’oze le ang nga ki djib’er ra tchod’a ni, ang duk abong avunangû. 33Kayam le a kudjuk ambira ni, ti mba ni ki mbulâ; le a tum sana atchinamu ni, mi djangî buzuna; le a djiu ayîna akulo ni, mi mba ni ki yalâ mi.
Currently Selected:
Zla d’a d’ogolâ 30: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
