Zla d’a d’ogolâ 28
28
1Sama asa’atna mi ringî bei sa mi digim ba, wani sama d’ingêrâ, mayîna ni d’igi azlo ma azongâ na.
2Le huneîd’a nga kur ambasa ni, suma te katna a nablaud’a, wani le ni ki sama wäd’u ma wed’a tu ni, ti mba d’i i avogovogo.
3Sama hou ma mi kid’eî ir sama kid’akina, mi ni d’igi alo ma se ki babarâ ma mi b’lak ahlena woi kakazeîna na.
4Suma a nga tit yam gata d’uo na, a nga läd’u sama asa’atna, wani suma a nga tit yam gatina a ka’î djangûna ki sed’emu.
5Suma tchona a nga wäd’u zla d’a d’ingêra d’i, wani suma a nga hal Ma didinina a nga wäd’u ahlena pet.
6Sama hohou ma nga mi tit kur lovot mamba d’ingêrâ, mi kal ma ndjondjoî ma nga mi tit kur lovot ta gundina.
7Sama nga mi tit yam gatina ni gor ma wad’ud’a, wani sama nga mi le darigïd’a ki suma batrangîna mi mbut nabum zulona.
8Sama nga mi i ndjondjoî mamba avok ki bege d’a mi hat mi suma ki mbiyo ma ngolîd’a, mi togot ni mi sama nga mi hahlena mi suma kid’akina.
9Sama nga mi tos humam mbei á hum gatina, Alona mi gol tchen mamba ni vama ndjendjed’a.
10Sama nga mi vit suma iratna woi kur lovot ta tchod’ina, mba mi nde kur zul la mam tam djugud’ota, wani suma iratna a mba te djivid’a djona.
11Sama ndjondjoîna mi gol tamî sama ned’a, wani ma kid’ak ma wad’ud’a nga mi fegem ad’umu.
12Ata yima suma d’ingêrâ a kusâ, suma a fe djivid’a pet, wani ata yima suma asa’atna a kusâ, nge nge pî, mi halî yima ngeid’a.
13Sama mi ngei yam tcho mamba kä na, nga mi fe djivid’a d’i, wani sama mi de tcho mamba woi mi arat tei mi na, a mba wum hohowomu.
14Sama nga mi le mandara Alona teteuna, mi le furîd’a, wani sama mi b’al hurum kikina, mba mi nde kur ndaka.
15Sama asa’at ma nga mi te yam suma kid’akina, mi ni d’igi azlo ma nga mi tchina d’oze ambur urs ma nga mi hal tena abo meid’ina na.
16Ma te yam ma mi we nga ad’u zlad’a d’uo na nga mi djop vun suma ngola, wani ma nga mi noî bege d’a a fat ki lovod’ot tuo d’a woina, mba mi te leud’a tatâ.
17Sama mi tchi sana mi wala zlad’a vumu na, mi ring á tchi tamu; ar sa mi d’elem mbi!
18Sama nga mi tit kur lovot ta d’ingêrina mba mi kak ki halasa, wani sama nga mi tit kur lovot ta mbàmbà d’a gundina mba mi nde kä kur ra dinga tu.
19Sama nga mi zum asinema mba mi fe tena ngola, wani sama mi tit bugol ahle suma hawa ya’îna, mi nde ni houd’a.
20Sama d’engzengâ, a mba b’e vuna kam ngola, wani sama mi b’at tam á mbut ma ndjondjoînina, a mba ar bei ngobom mbi.
21Nga djivid’a á ka ir sa d’i, wani suma dingâ a nga miret gata kä yam te ma avunazi ma ngiyeûna.
22Sama d’od’oka nga mi b’at tam atogotogo á mbut tam ndjondjoîd’a, wani mi we nga d’ala mam mba mi nde ni kur houd’a d’a d’i.
23Sama mi ngop sama dingîna, mba mi fe djivid’a avorom kal sama mi lum ad’um ki zla d’a de d’a avunamba gogona.
24Sama nga mi kul ahlena habum kasum ma nga mi dala ndata nga ni tchod’a d’uo na, ni sama b’lak ahlena hi sumina ndrama.
25Sama gol tam ala mam mi va na, nga mi djiu huneîd’a akulo, wani sama mi tin hurum yam Ma didinina mba mi kak kur duzîd’a.
26Sama mi tin hurum yam mam tam gona ni sama lilid’a, wani sama nga mi tit ki ned’ina mba mi kak ki halasa.
27Sama nga mi hahlena mi suma houd’ina, nga mi kid’ak ki, wani sama nga mi duk iram mbei kazina suma ablaud’a a mba gum vuna.
28Ata yima suma asa’atna a nga te yambina, nge nge pî, mi halî yima ngeid’a. Ata yima a puk kä na, suma d’ingêrâ a mba te yamba blangâziya.
Currently Selected:
Zla d’a d’ogolâ 28: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
