Zla d’a d’ogolâ 23
23
1Le ang kak avun tena ki sama ngolâ ni, ang gol tang djivi ki vama nga tinda avorongâ. 2Le angî sama agozlomba ni, ang ve tang kekei. 3Ang le d’od’oka yam te mam ma mbulâ d’i, kayam ni te ma mbut ira hawa.
4Ar ang kau tang á mbut sama ndjondjoîna d’i, ar ang tin djib’er manga kat tuo mi. 5Ang min tin irang yam ndjondjoî d’a kal leina zu? Gagazi, ndjondjoîd’a nga d’i min gigingâ d’igi agigilauna na, ti pir akulo aduk alona, ti vit teyo.
6Ar ang te tena hi sama djib’er mamba tchod’ina d’i, ar ang le d’od’oka yam te mam ma mbulâ d’uo mi. 7Djib’er ra kurumba ba wana: Mba mi dang ala: Ang te, ang tche, wani hurum nga tu ki sed’eng ngi. 8Ang mba vin vama ang tuma woyo, zla mang nga djivi d’a ang dumzid’a mba d’i ba natang hawa.
9Ar ang de zlad’a kä gen ma lilid’a d’i, kayam mi lasî zla mang nga ne d’a ang nga data.
10Ar ang djok agu ma a pum ir hagad’a adjeu dedeina woi d’i, ar ang kal kur asinena hi suma hokuyod’ina d’uo mi. 11Kayam sama mi sazi atchuguluzina ni ma ad’engêm kal petna, mba mi ndjun kazi á kak djangûna ki sed’eng mi.
12Ar ang tin hurung yam hata, ar ang tin humang á hum zla d’a sama ned’a nga mi data.
13Ang ar gogorâ bei tod’a d’i. Le ang tomî kazlingâta ni, nga mi mit ti, 14wani to d’a ang tomba ang sud’umî woi ata yima azuleina.
D’al ma sana mi dum mi goromina
15Gorona, le ang tin hurung yam ned’a ni, an mba ni le furîd’a kurun krovo mi. 16Ata yima ang mba de zla d’a iratina, an mba ni le hur ma hapma.
17Ar ang le d’od’oka yam tcho d’a suma le tchod’a a nga lata d’i, wani ang le ni mandara Ma didina burâ ki burâ. 18Wani burâ nga mi mba, hur mang ma tinda mba mi dap pei hawa d’i.
19Gorona, ang huma, ang mbut sama ned’a, ang tit kur lovot ta d’ingêra. 20Ang kak aduk suma a nga gurut ki süm guguzlud’ina d’oze aduk suma a nga mut hliuna agozlombina d’i. 21Sama gurut ki sümina ki sama te heîna a ge ni tazi houd’a. Sama mi halî sen ma burâ tuna mba mi tchu’î baru d’a ndjondjorod’a atamu.
22Ang hum abung ma vud’unga, ata yima asung ti djeng mamarina, ang golot is si. 23Ang gus gagazid’a, ned’a, hata ki wad’ud’a, ar ang guzuzi woi d’i. 24Sama d’ingêrâ abum nga mi le hur ma hapma, sama mi vut gor ma ned’ina nga mi le furîd’a mi. 25Ar abung azi kasung a le furîd’a, ar ta vud’unga ti le hur ma hapma.
26Gorona, ang han hurungû, ang hle ni balum asen mi. 27Atcha d’a gaulangâ ni zul la yiyika, atchad’a hi sama dingîd’a ni golong nga mbed’eta. 28A nga bur suma kä d’igi suma kul suma tchi matna na, a nga zul suma mbut ira aduk suma mi.
Zla d’a yam sama gurut ki sümina
29Ni nge mi nga kur ndaka ge? Ni nge mi nga kur hohoud’a ge? Ni nge mi nga kur yalâ ge? Ni nge mi nga kur yor tad’a ge? Ni nge mi fe mbilâ hawa bei zlam ge? Ni nge ba, iram mbi tchor hleud’a kekeng ge? 30Ni suma a nga hir kä avun süm guguzlud’a hihira, ni suma a i hal süm ma hlumbina. 31Ar ang gol süm guguzlud’a kayambala mi djivid’a hleud’a d’oze nga mi wile kur kopma d’oze anguvum nga d’i djang kä woi titrizigu d’a d’i. 32Dabi mamba mi ed’engî d’igi guguina na, mi gangî d’igi hurd’ud’a na mi. 33Irang mba d’i tining á le d’od’oka yam atcha d’a dinga, hurung mba mi zud’ung á de zla d’a asa’ata. 34Ang mba mbut ni d’igi sama nga burâ aduk alum ma ngolîna na, d’igi sama nga burâ yam agu ma fiyak ma akulo yam batod’ina na mi. 35Ang mba dala: A tonu, tan tan nga d’i; a mired’enu, an we nga d’i. An mba ni zlit akulo ni mindja ba, ni tche kua ge?
Currently Selected:
Zla d’a d’ogolâ 23: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
