Zla d’a d’ogolâ 21
21
1Hur amulâ ni d’igi mbiyo ma djangâ na abo Ma didina,
nga mi pred’em ata yima lara ma mam i kuana.
2Nge nge pî nga mi djib’er ala sun mam mba led’a ni djivid’a iramu,
wani Ma didina ni sama nga hurîna.
3Tit ta yam d’ingêra ki gagazid’id’a
ni vama le Ma didina tam djivid’a kal ahle suma ngat buzunina.
4Subur tad’a ki yam mba ad’enga
a nga tak tchod’a hi suma asa’atnid’a woi
d’igi lalamba nga d’i b’o na.
5Djib’era hi sama nga mi le sunda akud’a kekengâ,
ti imî kur duzîd’a,
wani sama nga mi latogo zazak bei djib’era ba na,
mi i ni kur houd’a.
6Suma a nga fe ndjondjoîd’a ki mbut irina
ni suma lili suma nga hal matnina.
7Sun nda murud’umba hi suma asa’atnid’a nga d’i bazi woyo,
kayam azi min á tit yam d’ingêra d’i.
8Sama zlad’a kama mi tit ni kur lovot ta gunda,
wani sunda hi sama bei zlad’a kama ti ni d’ingêr.
9Hotei ang kak yam gonga akulo abo tu,
kal la ang kak katcha d’a yalâ avo hur azì ma tunid’a.
10Sama asa’atna djib’er mamba ni yam tcho d’a led’a,
nga mi we hohowa banam mbuo mi.
11Ata yima ang to sama las sumina, ma lilid’a mba mi mbut sama ned’a;
ata yima ang hat sama ned’ina, mba mi i avogovok kur wed’a.
12Ma d’ingêrâ iram nga tinda yam azina hi sama asa’atnina,
nga mi zud’um kur ndaka.
13Sama mi tos humam mbei á hum tchina hi sama houd’ina,
fata mam tam mi tchid’a, sa nga mi hulongôm humba d’uo mi.
14He d’a hawa d’a a hat gumunda nga d’i b’leng vun ayîna hi sanina kä,
he d’a hawa d’a gumunda nga d’i ve vun ayîna hi sanina kä mi.
15Sama d’ingêr ma nga mi tit tit ta d’ingêrina, mi le furîd’a,
wani b’laka ni yam suma a nga tit tit ta d’ingêra d’uo na.
16Sama mi wal tam mbei ki lovot ta ned’ina
mba mi ka’î zlapa ki suma matna.
17Sama mi min kak ki furîd’a teteuna mba mi mbut sama kid’aka,
sama le yam süm guguzlud’a ki te ma mbulîna mba mi mbut sama ndjondjoîna d’uo mi.
18Sama asa’atna mi mbut vama wuraka yam sama d’ingêrâ,
sama mbut ira mi mbut ni vama wuraka yam suma iratna mi.
19Hotei ang kak abagei hur fulâ,
kal la ang kak katcha d’a yal la ti zalang hurunga.
20Ndjondjoî d’a kal teglesa ki mbulâ a nga avo hi sama ned’a,
wani ma lilid’a mi ligizi ni liga.
21Sama nga mi tit yam d’ingêra ki djivid’ina
mba mi fe arid’a ki d’ingêra ki subura mi.
22Sama ned’a nga mi kal kur azì ma ngolâ hi grang suma durîna,
nga mi to gulumun ma ad’eng ma azi tin huruzi kama kä woi mi.
23Sama nga mi ngom vunam ki sinam ped’etna,
mi sut ni tam mbei kur ndaka.
24Sama yam mba ad’eng ma subur tad’a simiyêm ala Ma las suma,
mi le sun mamba ni kayîna ki yam mba ad’enga.
25Djib’era hi sama azulomba mba d’i tchumu,
kayam mam min le sunda kabom mbi.
26Sama azulomba nga mi le d’od’oka burâ ki burâ yam ahlena hi sumina,
wani sama d’ingêrâ nga mi he bei gigrita ba.
27Vama ngat buzuna hi suma asa’atnina ni vama ndjendjed’a,
ni vama ndjendje ma kalâ ata yima azi mbam ki djib’er ra tchod’ina mi.
28Sama glangâs ma aboina mba mi ba woyo,
wani sama mi humut ad’ut djivid’a tretna, mi ndak á de zlad’a bei ara ba.
29Sama asa’atna mi d’uzî iram ba ba,
wani sama d’ingêrâ mi tcholî kur lovot mamba ngingring.
30Ned’a d’oze wad’ud’a d’oze d’alâ
ma kak djangûna ki minda hi Ma didinid’ina nga d’i.
31A nga ngom akulumeina ni yam bur ma dur ayîna,
wani kusa tcholî ata Ma didina.
Currently Selected:
Zla d’a d’ogolâ 21: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
