Zla d’a d’ogolâ 2
2
Ned’a ti ngomong ngei bei le tchod’a
1Gorona, le ang ve zla manda,
le ang ngom vun man ma hed’a kurungû,
2le ang tin humang á hum ned’a,
le ang tin hurung yam zla d’a irata,
3gagazi, le ang nga yi wad’ud’a,
le ang nga de ki deleng akulo á hal zla d’a irata,
4le ang nga halat d’igi suma a hal beged’a na,
le ang nga halat fufut d’igi suma a hal ndjondjoîd’a na ni,
5ata yi máma ang mba we á le mandara Ma didina,
ang mba fe lovota á wAlona mi.
6Kayam ni Ma didina ba, nga mi he ned’a;
wed’a ki zla d’a irata a buzugï navunam mi.
7Nga mi ngom ndjunda yam suma d’ingêrâ,
mam mi mbareid’a hi suma iratnid’a
8á ngom lovota hi suma iratnid’a,
á ngom tita hi mam suma d’engzengîd’a.
9Ata yi máma ang mba we d’ingêra ki gagazid’a,
ang mba we á lahle suma djivi suma lara ge pet mi.
10Hina wani, ned’a mba d’i kal kurungû,
wad’ud’a mba d’i lang tang djivid’a mi.
11Djib’era mba d’i ngomongû,
zla d’a irata mba d’i kak ndjola kangû.
12Ned’a mba d’i prud’ung ngei kur lovot ta tchod’a
abo suma a nga de zla d’a ndak á ded’a d’uo d’ina,
13abo suma a noî lovot ta d’ingêra woi
á tit kur lovot ta nduvundina.
14Azi ni suma tazi nga d’i lazi djivid’a á le tchod’ina,
a ni suma a nga le hur ma hapma á le zla d’a ata yat tuo d’ina.
15Azi ni suma a nga tit kur lovot ta ata yat tuo d’ina,
a ni suma a nga tit kur lovot ta gundina mi.
16Ned’a mba d’i prud’ung ngei abo atcha d’a gaulangâ,
abo atcha d’a ding nga vunat mbulâ
17d’a ti ar ndjuvut ma d’umba woi
d’a mar yam vun ma djin ma ti djinim avok Alonina woid’a.
18Kayam aziyat mi leng iramï abona hi matnina,
lovot mata ti i navo hi suma azuleina.
19Sama lara ma kal avo hatatna nga mi hulongî d’uo d’a,
nga mi fe lovota á kak karid’a d’uo mi.
20Kayam ndata, ar ang hle ni lovota hi suma djivinid’a,
ar ang tit ni kur lovota hi suma d’ingêrîd’a mi.
21Kayam ni suma d’ingêrâ ba, a mba kak yam ambasa,
ni suma iratna ba, a mba ar kaka kad’u.
22Wani suma asa’atna, a mba dabazi woi yam ambasa;
suma a nga d’engzeng nguo na, a mba yozi woi kat mi.
Currently Selected:
Zla d’a d’ogolâ 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.