Zla d’a d’ogolâ 13
13
1Gor ma ned’a mi humî hata habumba,
wani gor ma yam mba ad’enga nga mi hum ngopa d’i.
2Ni zla d’a ndavun sanid’a ba, mi te ki djivid’a,
wani suma mbut ira a hat huruzi ni yam murud’um mba led’a.
3Sama nga mi ngom vunam ped’etna, mi ngomî tamu,
wani sama nga mi ngo vunam mbei hagak á de zlad’ina, mi ba ni tam mbeyo.
4Minda hi sama azulombid’a nga d’i mba ki va tu d’i,
wani minda hi suma a le sunda akud’a kekengâ mba d’i mbazi ki duzîd’a.
5Sama d’ingêrâ nga mi noî zla d’a kad’a woyo,
wani sama asa’atna mi mbut tam ndjendjed’a, mi mbut tam zulona mi.
6D’ingêra nga d’i ngom sama tit kur lovot ta iratina,
wani asa’ata nga d’i ba sama le tchod’a woyo.
7Suma dingâ a nga yi tazi ala azi ni suma ndjondjoîna,
wani azi nga ki va d’i.
Suma dingâ a nga yi tazi ala azi ni suma houd’a,
wani azi ni suma ndjondjoîna!
8Vama wurak yam arid’a hi sanid’ina ni ndjondjoî mamba,
wani sama houd’a nga mi hum ngopa d’i.
9Sama d’ingêrâ nga mi b’o ndinding d’igi b’od’a na,
wani sama asa’atna mi ni d’igi lalam mba mit teid’a na.
10Sama yam mba ad’enga mi tchu’î huneîd’a aduk suma,
wani ned’a a fat nata suma a hum d’al ma ded’ina.
11Ndjondjoî d’a a fat ki mbut irid’a, mba d’i feyâ,
wani sama nga mi tok ahlena ndendena, mba mi i avogovogo.
12Vama sana mi tin hurum kama le mi fum nga d’uo ni,
mi tchugum tam susub’ok.
Wani vama mi tin hurum kama le mi fumu ni,
mi gram tam mbeyo.
13Sama mi gol gata isâ mba fe ndaka,
wani sama le mandara vun ma hed’ina, mba mi fe wuraka.
14Hata hi sama ned’id’a ni sidei arid’a
á wal sana woi ki dauna hi matnina.
15Sama wad’ud’a nga mi mba ki sumad’a,
wani lovota hi suma mbut irid’a ti i ni sana kur bad’a.
16Sama ne ma lara pî mi lahle mama ni ki wed’a,
wani sama lilid’a nga mi tak lili mamba woi abua.
17Sama sun ma asa’atna nga mi mba ki ndaka,
wani ma sun ma d’engzengâ nga mi mba ki suta.
18Sama noî hatina mba mi mbut houd’a, suma a mba golom is mi,
wani sama mi ve ngopa atama, suma a mba hum ngola.
19Vama sana mi tin hurum kam ma mi ndagam vunama ni djivid’a kamu,
wani wal tang ngei ki tchod’a ni vama ndjendjed’a ir suma lilid’a.
20Sama tit ki suma ned’ina mba mi mbut ni sama ned’a,
wani sama mi te ki suma lilid’ina mba mi nde kur tchod’a.
21Ndaka nga d’i dik bugol suma le tchod’a,
wani djivid’a nga d’i wurak suma d’ingêrâ.
22Sama djivina mba mi ar djona mi grom ngolona,
wani ndjondjoîd’a hi suma tchonid’a mba d’i arî mi suma d’ingêrâ.
23Asine ma sama houd’a mi zumuma nga mi wul awuna ngola,
wani ma dingâ nga mi b’lak kei kayam salama nga ni sama d’ingêrâ d’i.
24Sama nga mi to goroma kazlingâta d’uo na, hurum mi ve nga goroma d’i,
wani sama mi le yam goromina nga mi gad’amu.
25Sama d’ingêrâ nga mi te mi hoba,
wani sama asa’atna hurum nga tchi u’uyur abo meid’a.
Currently Selected:
Zla d’a d’ogolâ 13: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
