Zla d’a d’ogolâ 10
10
ZLA D’A D’OGOLÂ HI SALOMON-NDA
(10—29)
Zla d’a de d’a d’ogol la yam titid’a
1Zla d’a d’ogolâ hi Salomon-nda ba wana:
Gor ma ned’a nga mi labum tam djivid’a,
wani gor ma lilid’a mi b’lak hur asum heî.
2Ndjondjoî d’a a fat ki mbut irid’a zlat nga d’i,
wani d’ingêra nga d’i prut sana woi avun matna.
3Ma didina nga mi ar sama d’ingêrâ meid’a tchum mbi,
wani nga mi d’el suma asa’atna yam ahle suma azi minizina.
4Sama nga mi le sunda ndjondjoîna mi mbut ni ma houd’a,
wani suma a nga le sunda akud’a kekengâ a mbut ni suma ndjondjoîna mi.
5Sama nga mi tok awuna awalina ni sama ned’a,
wani sama nga mi bur sena ata yima fet awunina ni sama mi mba ki zulonina.
6Vun ma b’ed’a nga yam suma d’ingêrâ,
wani zla d’a ndavun suma asa’atnid’a ni murud’umba.
7Djib’er ra yam sama d’ingêr ma mi mitna ni b’e vuna,
wani a mba mar rei yam simiyê suma asa’at suma a bona.
8Sama ned’a kuruma mba mi tit yam vun ma hed’a,
wani sama zla d’a lilid’a nga d’i ndavunama, mi i ni kur bad’a.
9Sama mi tit tit ta ata yatina nga mi kak ki halasa,
wani sama nga mi tit tit ta ata yat tuo d’ina, ad’um mba d’i ge woyo.
10Sama nga mi tchem irina mi mba ni ki ndaka,
wani sama zla d’a lilid’a nga d’i nde avunama, mi i ni kur bad’a mi.
11Zla d’a ndavun suma d’ingêrîd’a ni sidei arid’a,
wani zla d’a ndavun suma asa’atnid’a ni murud’umba.
12D’ugura nga d’i tchol ki huneîd’a aduk suma,
wani od’a nga d’i zlup yam tcho d’a lara ge pet mi.
13Ang fe ned’a navun sama wad’ud’a,
wani blafâ ná to sama bei wäd’u zlad’a ba na.
14Suma ned’a a nga tok wed’a,
wani zla d’a ndavun sama lilid’id’a mba d’i mba ki b’laka atogo zak.
15Fed’a hi sama ndjondjoînid’a ni d’igi azì ma ngol ma ad’eng ma ngunguna na,
wani b’laka hi suma houd’id’a ni hou mazid’a.
16Sunda hi sama d’ingêrîd’a nga d’i hum arid’a,
wani fed’a hi sama asa’atnid’a ni yam tcho d’a led’a.
17Sama nga mi ngom hatina mi hle ni lovot ta i kur arid’id’a,
wani sama nga mi noî ngopina mi vit ni tam mbeyo.
18Sama nga mi ve sana kurum gumuna ni sama ka zlad’a,
wani sama lilid’a nga mi tchuk zla d’a aboina yam ndrama aduk suma.
19Sama tchit heîna nga mi ba bei le tchod’a d’i,
wani sama nga mi ngom vunam ped’etna ni sama wäd’u zlad’ina.
20Zla d’a ndavun sama d’ingêrîd’a ti kal kawei ma hap ma a manama,
wani djib’era hi sama asa’atnid’a ni zla d’a afid’igid’a.
21Zla d’a ndavun sama d’ingêrîd’a nga d’i tak lovota mi suma ablaud’a,
wani suma lilid’a a nga bo ni yam bei we mazid’a.
22B’e vuna hi Ma didinina nga mi mbut sana ma ndjondjoîna,
wani nga mi hum hur ma wura kam kua hina nde d’i.
23Sama lilid’a mi gol tcho d’a led’a ni vama luna iramu,
wani sama wad’ud’a, tam nga d’i lum djivid’a yam ned’a mi.
24Vama sama asa’atna nga mi lum mandarama, ni mam ba, mba mi mba kamu,
wani vama suma d’ingêrâ a nga minima, Alona mba mi haziziya.
25Ata yima mbirlimba nga d’i kalâ, nga d’i i ki sama asa’atna,
wani sama d’ingêrâ mi arî tchola ngingring burâ ki burâ.
26D’igi süm ma azleîna mi zleyêng siyang na, d’igi andosâ mi tchuvud’ung irang na mi,
sama azulomba mi le ki sama mi sunuma ni hina dedege mi.
27Suma a le mandara Ma didinina a mba te tatâ,
wani suma asa’atna a mba ar buruzi avoroziya.
28Hur ma tinda hi suma d’ingêrîna ni furîd’a,
wani hur ma tinda hi suma asa’atnina mba mi dap pei hawa.
29Ma didina ni gulumun ma ad’eng ma ngunguna hi suma iratnina,
wani nga mi b’lak suma batrangâ woyo.
30Sama d’ingêrâ mba mi giget abo va tu d’i,
wani suma asa’atna a mba kak yam ambasa d’i.
31Zla d’a ti ndavun ma d’ingêrîd’a ni ned’a,
wani sin nda ti de zla d’a ata yat tuo d’id’a a mba ngad’at teyo.
32Zla d’a ti ndavun ma d’ingêrîd’a ni zla d’a djivid’a,
wani zla d’a ti ndavun ma asa’atnid’a ni zla d’a ata yat tuo d’a.
Currently Selected:
Zla d’a d’ogolâ 10: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
