Ndumba 4
4
Sun nda a hat madesâ hi suma hi Levi-nid’a (a) Nala, mandjafâ hi Kehat-na
1Ma didina mi de mi Moise azi ki Aron ala: 2Agi ndumugi suma hi Kehat suma aduk suma hi Levi-nina, ad’u adezezi kad’u andjavazi 3suma bizazi dok hindi dok hindina ki suma bizazi kal dok hindi dok hindi gak mba ata biza d’a dok vahlina, suma pet suma a ndak á le sunda kur zlub’u d’a ngaf tad’ina. 4Wana ni sun nda andjafâ hi Kehat-na a lat kur zlub’u d’a ngaf tad’id’a, nala, ahle mat suma a tinizi irazi vazi suma kal tegles suma a le ki sunda kurutna.
5Fata agi yogi á id’id’a, Aron azi ki groma a but baru d’a ka ira woyo, a zlubut yam zandu’â hAlonina. 6A tchuk baru ma duburok ma a lum ki bak azar ma aduk mbina kä ma a yum ala dofênina kamu, a bar baru d’a botlozid’a kam mbei mi. Bugola, a nik agu ma murguli ma hle ki zandu’îna ata b’alangâ. 7A bar baru d’a botlozid’a yam tabul ma a tin avungô ma a tinim iram vama kama, a tin tazana, kopma, anguleina ki gugurei suma vo süm guguzlu d’a a hat he d’a hawad’a kuana kua; a tin avungô ma a nga tinim avogon teteuna kua mi. 8A bar yam ahle ndazina ki baru d’a hleu d’a kekenga, a d’ud’uzi ki baru ma duburok ma a lum ki bak azar ma aduk mbina kä ma a yum ala dofênina, a nik agu ma murgulina ata b’alang ma ata tabulîna. 9A yo baru d’a botlozid’a, a zlubut yam agu lalamba ki lalam mamba ki mangas mamba ki anduru ma tchuk butna ki gugur ra vo mbulâ kahle mam suma sunda pet. 10A tinim kahle mam suma sunda pet kur baru ma duburok ma a lum ki bak azar ma aduk mbina kä ma a yum ala dofênina, a tinim kur azang ma gan ma a zi kahlenina.
11A bar baru d’a botlozid’a yam yima ngal dubang ma his djivid’a ma a gulud’um ki lorina, a d’ud’um ki baru ma duburok ma a lum ki bak azar ma aduk mbina kä ma a yum ala dofênina, a nik agu mam ma murgulina ata b’alangâ. 12A yo ahle suma a le ki sunda kur yima a tinim iram vama pet, a tchuguzi kur baru d’a botlozid’a, a d’ud’uzi ki baru ma duburok ma a lum ki bak azar ma aduk mbina kä ma a yum ala dofênina, a tinizi kur azang ma gan ma a zi kahlenina. 13A ko but ma yam yima ngal ahle suma ngat buzunina woyo, a bar baru d’a hleu d’a sisila kamu, 14a tchuk ahle suma a le ki sunda ata yima ngal ahle suma ngat buzunina kamu, nala, ahle suma yo akud’a, kuyor ma siyam hindina, pelâ ki angala mi, a bar baru ma duburok ma a lum ki bak azar ma aduk mbina kä ma a yum ala dofênina kaziya, a nik agu ma murgulina ata b’alangâ mi.
15Le Aron azi ki groma a dap wa zlup yam ahle suma a tinizi irazi vazina kahle suma a le ki sunda ata yima a tinim iram vama da ni, ata yima agi igina, suma hi Kehat-na a mba, a yo ahle ndazina. Wani a do ahle suma a tinizi irazi vazina tala azi bö d’a d’i.
Wana ni sun nda a hat mi suma hi Kehat-na kur zlub’u d’a ngaf tad’id’a.
16Elazar ma ngat buzuna Aron goroma mba mi ngom mbul ma ngal akud’a, dubang ma his djivid’ina, he d’a hawa d’a a nga hat teteud’a ki mbul ma a vom yam suma á tinizi ki kur sundina. Mba mi ngom yima a tinim iram vam ma kal teglesâ kahle suma kuruma pet ki yima a tinim iram vama kahle suma kuruma pet mi.
17Ma didina mi de mi Moise azi ki Aron kua ala: 18Agi ngomogi andjafâ hi Kehat-na aduk suma hi Levi-na tala a dap pei d’uo d’a. 19Ang Aron agi ki grongâ lagi ki sed’ezi ni hina. Agi tinizi kur sunda, nge nge pî kur sun mamba kayambala azi do yima a tinim iram vam ma kal teglesâ do ba, a bö d’a d’i. 20Ar azi kal a gol ahle suma a tinizi irazi vazi suma a nga d’ud’uzina gol ba, a bo d’a d’i.
(b) Nala, mandjafâ hi Gerson-na
21Ma didina mi de mi Moise kua ala: 22Ang ndum suma hi Gerson-na ad’u adezezi kad’u andjavazi mi. 23Ang ndum suma bizazi dok hindi dok hindina ki suma bizazi kal dok hindi dok hindi gak mba ata biza d’a dok vahlina, suma pet suma a ndak á le sunda kur zlub’u d’a ngaf tad’ina. 24Wana ni sun nda andjafâ hi Gerson-na a mba lata kahle suma azi mba zizina. 25A mba zi baru d’a luluî d’a lalavat ta yam zlub’u d’a ngaf tad’id’a, nala, yima a tinim iram vam ma kal teglesâ ki yima a tinim iram vama djak, a mba zi ma kat akulona ki baru ma duburok ma a lum ki bak azar ma aduk mbina kä ma a yum ala dofê ma a barattchi kat akulona, ki baru d’a ka ir ra avunata, 26baru d’a a gat gulumunid’a, ki baru d’a ka ir ra avunamba, kahlena hi zlub’ud’ina kahlena hi yima ngal ahle suma ngat buzunina pet ki ziyo mazina, kahle suma sun mazina pet kahle suma azi mba le ki sunda kurâ pet mi. 27Sun nda andjafâ hi Gerson-na a mba lata pet, a mba lat nad’u vun ma hed’a hi Aron azi ki groma yam sun mazi d’a zi ahlena, yam sun mazi d’a led’a pet mi. Azi mba tinizi á ngom ahle suma azi zizina.
28Wana ni sun nda andjafâ hi Gerson-na a mba lat kur zlub’u d’a ngaf tad’id’a. Ahle suma azi mba ngomozina pet a mba ngomozi nad’u vun ma hed’a hi Itamar ma ngat buzuna Aron goromina.
(c) Nala, mandjafâ hi Merari-na
29Ma didina mi de mi Moise kua ala: Ang ndum suma hi Merari-na ad’u adezezi kad’u andjavazi mi. 30Ang ndum suma bizazi dok hindi dok hindina ki suma bizazi kal dok hindi dok hindi gak mba ata biza d’a dok vahlina, suma pet suma a ndak á le sunda kur zlub’u d’a ngaf tad’ina. 31Wana ni sun nda ang mba hazizi abozi á led’a kur zlub’u d’a ngaf tad’id’a: Agu ma bebed’ena hi zlub’ud’ina, kawei mam ma latana, agu mam ma murgulina ki kawei mam ma ad’um kä na, 32agu ma murguli ma ata gulumun ma katna, kawei mam ma ad’um kä na ki tcheble matna ki ziyo ma atatna kahle mazi suma sunda kahle suma a lazi ki sunuzina pet. Agi yozi ahle suma azi mba zizina woi gagang.
33Wana ni sun nda a hat mandjafâ hi Merari-nid’a; ni sun nda azi mba lat kur zlub’u d’a ngaf tad’a ad’u vun ma hed’a hi Itamar ma ngat buzuna Aron goromid’a.
A ndum suma hi Levi suma le sunda
34-49Moise azi ki Aron ki suma nglo suma avok ablaud’a hi Israel-lîd’a, a ndum suma hi Kehat-na, suma hi Gerson-na ki suma hi Merari-na ad’u adezezi kad’u andjavazi mi. A ndum suma bizazi dok hindi dok hindina ki suma bizazi kal dok hindi dok hindi gak mba ata biza d’a dok vahlina, suma ndak á le sunda kur zlub’u d’a ngaf tad’ina. Moise azi ki Aron a ndumuzi ad’u vun ma hed’a hi Ma didinina d’igi mam de mi Moise na mi.
Suma a ndumuzi ad’u adesâ hi Kehat-na pet ni 2750.
Suma a ndumuzi ad’u adesâ hi Gerson-na pet ni 2630.
Suma a ndumuzi ad’u adesâ hi Merari-na pet ni 3200.
Ndumba hi suma hi Levi-na pet ni 8580.
Sama hi Levi ma lara pî mi ve gat ta irat ta a dumzi yam sun nda mam mba mi ndagat vunat yam ahle suma mam mba mi zizina d’igi Ma didina mi he vuna mi Moise na mi.
Currently Selected:
Ndumba 4: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
