Ndumba 27
27
Gat ta b’rau djona mi gro aropmid’a
1Mala, Nowa, Hogla, Milka ki Tirsa, azi ni Selofat grom suma aropma. Mam mi ad’u andjafâ hi Manase ma Josef goromina, nala, Manase mi vut Makir, Makir mi vut Galät, Galät mi vut Hefer, Hefer mi vut Selofat máma. Gro arop suma vahl ndazina 2a mba avok Moise azi ki Elazar ma ngat buzuna ki suma nglona kablau d’a pet ta avun zlub’u d’a ngaf tad’id’a, a dala: 3Abumi mi mit nabagei hur fulâ, wani mi nga aduk suma a ndjak vunazi ki Kore á kak djangûna ki Ma didinina d’i. Mi mit ni yam tcho mamba tata. Wani mi nga ki gor mandjuf fi. 4Ni kayam me ba, abumi simiyêm mi sil lei aduk sum mama ge? Ni kayambala gorom mandjuf nga d’uo d’a zu? Agi hami djona zlapa kabumi b’oziyoma.
5Moise mi i ki zla mazid’a avok Ma didina. 6Ma didina mi de mi Moise ala: 7Selofat groma zla mazid’a nata yad’u. Ang hazi djona zlapa kabuzi b’oziyoma. Ni azi ba, ang hazi djona habuzina. 8Ang de mi Israel-lâ ala: Le sana mi mit mi ar nga gorom mandjuf fuo ni, agi hagi djo mama mi goromba. 9Le goromba nga d’uo ni, agi hagi djo mama mi b’oziyoma. 10Le b’oziyoma nga d’uo ni, agi hagi djo mama mabum b’oziyoma. 11Le abum b’oziyoma nga d’uo ni, agi hagi djo mama mi salam ma go ma ad’u andjavama. Ni sa máma ba, mba mi tum djomu. Zla ndata mba d’i arî gat ta didinda yam Israel-lâ d’igi an Ma didina ni hang vuna na.
Alona mi man Josue á vrak balum Moise
12Ma didina mi de mi Moise ala: Ang djak akulo yam ahina d’a Abarim mba wanda, ang gol ambas sa an nga ni hat mi Israel-lîd’a. 13Ang mba golod’u, wani ang mba mit i azulei kä gen simiyêng d’igi wiyengâ Aron mi mit mi i azulei kä gen simiyêm na mi, 14kayam agi tchilagi yam vun man ma hed’a abagei hur ful ma Tisin-na ata yima ablaud’a a yal ki sed’ena, agi suburun nga avorozi ata yima a hal mbiyo ma tched’ina d’uo mi. Ni mbiyo ma Kades ma abagei hur ful ma Tisin-nina.
15Moise mi de mi Ma didina ala: 16Ma didina, angî Alo ma he arid’a mi suma petna; ar ang tin sana yam ablaud’a. 17Ni sama mi ndak á nde avorozi á i ki sed’ezi abuna, ni ma tit avorozi á hulongôzi avona, ni ma mi buzuguzi abuna, ni ma hulongôzi avona mi. Kayambala ablau manga ti kak d’igi tumiyô suma bei salazi ma pola ba na na d’uo d’a.
18Ma didina mi de mi Moise ala: Ang ve Josue Nun gorom ma nga ki Muzu’îna, ang tin abong kamu. 19Ang i ki sed’em avok ma ngat buzuna Elazar, avok ablaud’a mi, ang hum vuna avorozi kä. 20Ang hum ngol manga kayambala ablaud’a hi Israel-lîd’a ti humumu d’a. 21Mi tchol avok ma ngat buzuna Elazar, mi djop kam ki Urima avogon an Ma didina. Mam tamba zlapa kablaud’a hi Israel-lîd’a pet a mba buzuk kei nad’u vun ma hed’a hi Elazar-râ, a mba hulong nad’u vun mam ma hed’a mi.
22Moise mi le d’igi Ma didina mi hum vuna na. Mi ve Josue, mi i ki sed’em avok ma ngat buzuna Elazar, avok ablaud’a pet mi. 23Mi tin abom kam á vrak blangâm d’igi Ma didina mi hum vuna na mi.
Currently Selected:
Ndumba 27: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
