Ndumba 25
25
Israel-lâ a nde tuwal fileina
1Israel-lâ a kak avo Sitim, a nde le sun nda batranga karop suma Mowap-ma. 2Arop suma Mowap-ma a nde yazi á tahle suma azi ngad’azi buzuna malo mazinina. Israel-lâ a taziya, a grif kä avok alona hi suma Mowap-ma mi. 3Israel-lâ a zlap tu kalo ma a yum ala Bäl-Peyor-râ. Kayam ndata, Ma didina hurum zal ngola ataziya.
4Ma didina mi de mi Moise ala: Ang yo suma nglo suma avok sumina pet, ang tchuguzi ziyona kelezi ang gabazi akulo ir afata avogon an Ma didina tala hurun b’leng yam Israel-lâ d’a.
5Moise mi de mi suma ka sariyad’a hi Israel-lîna ala: Ar nge nge pî mi tchi sa mam ma zlap tu kalo ma a yum ala Bäl-Peyor-râ woyo.
6Gol wani, ma Israel-lâ mi mbeï katcha d’a Madiyan-nda gen b’oziyoma ir Moise azi kablaud’a hi Israel-lîd’a, ata yima azi nga tchi avun zlub’u d’a ngaf tad’ina. 7Kid’a Fines Elazar goroma Aron ma ngat buzuna gorom ngolona mi wazi d’a, mi tcholï aduk ablaud’a, mi hle asapa abomu, 8mi i ad’u ma Israel-lâ krovo kur zlub’u mamba, mi tchogom katcha ndata huyogozi ki zla tazi djak. Ata yi máma tugud’ei d’a tcho d’a tchi matna ti ar bei tchi Israel-lâ. 9Tugud’ei d’a tcho ndata ti tchi suma ni 24.000.
10Ma didina mi de mi Moise ala: 11Fines Elazar gorom ma Aron ma ngat buzuna gorom ngolona, mi b’lengên hurun yam Israel-lâ, kayam mam nga ki yungôrâ d’igi an na adigaziya. Kayam ndata, an nga kur hur ma zala á ngalazi woi d’uo d’a. 12Kayam ndata, ang dumu, an djin wa vun ma djin ma b’leng ma halasâ ki sed’emu. 13Vun ma djin máma mi arî kam kandjavam ma a mba vud’um bugolâ, a mba ka’î suma ngat buzuna gak didin, kayam mam tak yungôr mama woi yam an Alo mama, kayamba mi zlup yam tchod’a hi Israel-lîd’a.
14Ma Israel ma a tchum katcha d’a Madiyan-ndina a yum ala Zimri ni Salu goroma; mam ni ma ngol ma avok suma hi Simeon-nina. 15Wani atcha d’a Madiyan nda a tchata a yat ala Kosbi, ni Sur ma avok andjaf ma ablau ma hi Madiyan-nina goromba.
16Ma didina mi de mi Moise ala: 17Agi durugi suma Madiyan-na d’igi magi suma djangûna na, agi tchazi woyo! 18Kayam azi mbut tazi magi suma djangûna, a mbud’ugi iragi ki lem mazid’a ki zlad’a hi Kosbi ma ngol ma Madiyan-na goromba wiyezi d’a a tchat kur bur ma tugud’ei d’a tcho d’a tchi matna mi mba yam zlad’a hi Peyor-rina.
Currently Selected:
Ndumba 25: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
