Ndumba 20
20
Mbiyo ma Meriba-na
(Gol Bzuk 17.1-7)
1Kur til ma avo’â, ablaud’a hi Israel-lîd’a pet ti mba hur ful ma Tisin-na, ti tchol kä Kades. Nata yi máma ba, Miriyam ti mid’a; a tozot ni kua mi.
2Mbina mi nga kua yam ablau suma d’i. Kayam ndata, azi tchol djangûna ki Moise azi ki Aron. 3Suma pet a nga hal Moise huneîd’a, a dum ala: Ni kayam me ba, ami bomi woi d’igi b’oziyomina a bo woi avok Ma didina na d’uo ge? 4Ni kayam me ba, agi yomï ami ablaud’a hi Ma didinid’a abagei hur fulâ ka hî á tchami woi ki d’uwar mamina mi ge? 5Ni kayam me ba, agi yomi woi kur Ezipte á mbami kur yima tcho ma wana ge? Ni yima sa nga mi zum va kua d’uo na. Tulum nga kua d’uo, guguzlu nga kua d’uo, agu grenatna nga kua d’uo, mbiyo ma tched’a nga kua d’uo mi.
6Moise azi ki Aron a ar ablaud’a, a i kur zlub’u d’a ngaf tad’a, a puk kä ki irazi andaga. Subura hi Ma didinid’a ti nde tat tei iraziya.
7Ma didina mi de mi Moise ala: 8Ang hle totogo manga, ang ki wiyengâ Aron agi togogi ablaud’a hi Israel-lîd’a, agi dagi zlad’a mahinad’a irazi kä; mba d’i he mbina. Ang mba buzugï mbina ata ahina ndata, ang mba hum mablaud’a ki d’uwar matna.
9Moise mi hle totogo mam mba nga avok Ma didinid’a d’igi Ma didina mi hum vuna na. 10Moise azi ki Aron a tok ablaud’a kä gen ahinad’a. Moise mi dazi ala: Agi suma bei hum vuna, agi humugiya! Nata ahina ndata ba, ami mba buzugugï mbina zu?
11Moise mi hlabom akulo, mi wat ahinad’a ki totogo mamba yam mbà. Ahinad’a ti buzuk ki mbina djangâ ngola; ablaud’a ki d’uwar matna a tche.
12Ata yi máma Ma didina mi de mi Moise azi ki Aron ala: Kayamba agi hagi nga gagazid’a kan nduo d’a, agi suburun nga avok ablaud’a d’uo mi d’a, agi mba kalagi ablau ndata kur ambas sa an nga ni hattchid’a d’i.
13Wana ni mbiyo ma Meriba-na. Ni yima Israel-lâ a yal ki Ma didina kua, mi tagazi subur mamba woi adigazina.
Amul ma Edom-ma mi d’el Israel-lâ á kala
14Ni hur ful ma Kades-sâ ba, Moise mi tchuk sunda ata amul ma Edom-ma, mi dum ala: Ang hum zlad’a hi ami b’oziyong Israel-lîd’a: Ang we ndak ka mba kamid’a pet. 15Abuyomi ngolo a i Ezipte. Ami kagami kua bizad’a ablaud’a, wani Ezipte-na a lami tchod’a kabuyomi ngolo. 16Ami tchimi yam Ma didina. Mi hum tchi mamina, mi sunï malaika mama, mi buzugumï woi kur Ezipte.
Gola! Ami nga ka hî Kades kur azì ma ngol ma avun hagad’a handaga mangina. 17Ang arami lovota ami kalami yam ambas manga. Ami mba d’ezemi woi aduk asinena d’oze aduk guguzlud’a d’i, ami mba tchami mbiyo golonga d’uo mi. Ami mba tid’imi ni kur lovot ta ngola, ami mba d’ezemi woi abo ma ndjuf foze abo ma gula d’uo mi, gak ami mba kalami woi yam ambas manga.
18Amul ma Edom-ma mi hulong dum ala: Agi kalagi yam ambas manda d’i! Le agi kalagiya ni, an mba ni durugiya.
19Israel-lâ a dum ala: Ami mba tid’imi ni kur lovot ta ngola teteu. Le ami halami mbina mi ami d’oze yam d’uwar mamina ni, ami mba wuragang beged’a kamu. Ami nga tchenengû, ang arami lovota ami kalami ni kasemi akulo yam ambas manga go.
20Amul ma Edom-ma mi hulong dazi ala: Agi nga kalagi d’i! Suma Edom-ma ablaud’a a buzugï woi kahle suma sïna abozi á ngaf Israel-lâ. 21A d’el Israel-lâ á kal yam ambas mazid’a. Ata yi máma Israel-lâ a hulong hle lovot ta dinga.
Matna hi Aron-na
22Ablaud’a pet a tchol Kades, a i yam ahina d’a Hor-ra. 23Ma didina mi de mi Moise azi ki Aron yam ahina ndata avun hagad’a hambas sa Edom-mba ala: 24Aron mba mi mid’a, kayam mam mba mi kal kur ambas sa an nga ni hat mi Israel-lîd’a d’i, kayam agi tchilagi yam vun man ma hed’a ata yima mbiyo ma Meriba-na. 25Ang i ki Aron azi ki goroma Elazar akulo yam ahina d’a Hor-ra. 26Ang fok baruna hi Aron-na woi atamu, ang tchugum ata goroma Elazar. Nata yi máma ba, Aron mba mi mid’a.
27Moise mi le d’igi Ma didina mi hum vuna na. A djak akulo yam ahina d’a Hor-ra ir ablaud’a pet. 28Moise mi fok baruna woi ata Aron, mi tchugum ata goroma Elazar. Aron mi mit ata yi máma akulo yam ahinad’a yat ta ked’iwurenga. Moise azi ki Elazar a tchugï asezi kä woi yam ahinad’a. 29Ata yima ablaud’a ti wala Aron mi mit wa na, Israel-lâ pet a tchim gak burâ dok hindi.
Currently Selected:
Ndumba 20: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
