Ndumba 17
17
Totogod’a hi Aron-nda
1Ma didina mi de mi Moise ala: 2Ang i de mi Israel-lâ ala a hang totogod’a yam andjavazi gagang, nala, totogod’a dogo yam mbà abo mazi suma nglo suma avok andjavazina, ang b’ir simiyê nge nge pî ata totogo mamba. 3Ang b’ir simiyê Aron ata totogo d’a yam andjafâ hi Levi-nid’a, kayam ang mba fe totogod’a tutu yam suma avok andjavazina. 4Ang tchuk tutuguyo ndazina kä kur zlub’u d’a ngaf tad’a avok zanduk mana ata yima an nga ni ngavagi kuana. 5Sama an manama, totogo mamba mba d’i d’uva. Hina wani, an mba ni d’el gureî d’a Israel-lâ a nga guruyôt kagid’a avogonu.
6Moise mi de zla ndata mi Israel-lâ. Suma nglo suma avorozina, nge nge pî mi hum totogod’a yam andjavam gagang; tutuguyona pet ni dogo yam mbà, d’a hi Aron-nda nga aduk mi. 7Moise mi tchuk tutuguyo ndazina kä avok zandu’â hi Ma didinina kur zlub’ud’a. 8Tcha ndjivinda, ata yima Moise mi kal kur zlub’ud’ina, mi we totogod’a hi Aron nda yam andjafâ hi Levi-nid’a ti d’uvî d’uva go d’i, wani ti b’o, ti vut vud’agu amandena, mi ne mi. 9Moise mi yo tutuguyo suma kur zlub’ud’ina pet, mi i tagazi mi Israel-lâ pet á waziya. Suma nglo suma avorozina nge nge pî mi hle mamba.
10Ma didina mi de mi Moise kua ala: Ang hulong totogod’a hi Aron-nda kä avok zanduk mana. Ti mba d’i mbut ni vama ge humba mi Israel suma yam mba ad’enga. Hina wani, ang mba d’el vun gureî d’a azi nga guruyôt kanda, azi mba ar bei bod’a mi. 11Moise mi lahle ndazina d’igi Ma didina mi hum vuna na mi.
Sunda hi suma ngat buzuna ki d’a hi suma hi Levi-nid’a
12Israel-lâ a de mi Moise ala: Ang gola! Ami bomi ni woyo, ami bami ni woyo, ami bami ni woi pet! 13Sama lara pî ma mi hut go ki zlub’ud’a hi Ma didinid’ina, mi mit ni mid’a. Ami pet bomi ni woi hina d’ang zu?
Currently Selected:
Ndumba 17: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
