Ndumba 15
15
He d’a hawa d’a afuta, mbulâ ki süm guguzlud’a
1Ma didina mi de mi Moise ala: 2Ang i de mi Israel-lâ ala: Ma didina mi dala: Fata agi kalagi kur ambas sa an nga ni hagizi á kakid’a, 3agi mba handi vama ngat buzu ma ngala, d’oze vama ngat buzu ma zlap darigïd’a, d’oze vama ngat buzu ma ndak vun vun ma hled’a, d’oze he d’a hawa d’a kur min magid’id’a, d’oze ata yima vun le tilâ. Le ni d’uwar ma nglona d’oze ma gureina á his his ma afufuîna avoronu ni, 4sama mban ki vama ngat buzunina, mi mba ki he d’a hawa d’a afut ta adiged’id’a ir kilona hindi d’a a tib’eget ki mbulâ lidirâ tu ki nusid’a. 5Agi mban ki süm guguzlud’a lidirâ tu ki nusa yam timi ma lara ma a hum vama ngat buzu ma ngala d’oze ma ngat buzu ma zlap darigïd’ina. 6Le ni gamlâna ni, agi mbagi kafut ta adiged’id’a ir kilona karagaya d’a a tib’eget ki mbulâ lidirâ mbàd’a 7zlapa ki süm guguzlud’a lidirâ mbà á his his ma afufuîna avoron an Ma didina. 8Le a han namuhlâ vama ngat buzu ma ngala d’oze vama ngat buzu ma zlap darigïd’a d’oze á ndak vun vun ma hled’a d’oze vama ngat buzu ma hawana ni, 9a mba kafut ta adiged’id’a ir kilona zlengâ d’a a tib’eget ki mbulâ lidirâ hindid’a yam amuhl máma 10zlapa ki süm guguzlud’a lidirâ hindi. Ni he d’a hawa d’a ngal la his sa afufuîd’a avoron an Ma didinid’a.
11Agi lagi hina ata yima lara ma agi hagi amuhlâ vama ngat buzuna d’oze gamlâna d’oze gor timina d’oze gor b’ënina. 12Ablaud’a hahle suma agi handji vama ngat buzunina ma lara pî agi humî ki he d’a hawa d’a a b’irit kä kamba. 13Ata yima Israel-lâ a han vama ngat buzu ma his ma afufuînina, a tit yam gat ndata. 14Angoyogei suma a mba á kak adigagi ndjöna, d’oze suma a mba á kak adigagi ki irazi fafatna, le a min á han vama ngat buzu ma ngal ma his ma afufuîna ni, a tit yam gat ndata d’igi agi na mi. 15Gat ndata mba d’i ka’î yam ablaud’a pet, yam agi Israel-lâ d’igi yam angoyogeina na mi. Mba d’i ka’î gat ta irata kur atchogoi d’a lara ge pet ta nga d’i mbad’a. An Ma didina nga ni le ki Israel-lâ vazi mi, ni le kangoyogeina vazi mi d’i. 16Gata ki vun ma hed’a a ni tu kagi agiya, kazi azi mi.
A he fangasuna mAlona avo Kanan
17Ma didina mi de mi Moise kua ala: 18Ang i de mi Israel-lâ ala: Ma didina mi dala: Fata agi kalagi kur ambas sa an nga ni igi kura, 19ata yima agi tagi te ma kur ambas ndatina, agi pad’agi vun ahle ndazina á handjiya. 20Agi han he d’a hawad’a hi fangasunid’a, ni he d’a hawa d’a avoka hafut ta agi tib’egeta. Agi mba handji ni d’igi agi hagi awuna avun ambid’a’â na. 21Agi mba handi fangasu magi ma avok ma agi guma na mi. Gat ndata ti arî gat ta irata kagi kur atchogoi d’a nga d’i mbad’a mi.
Ahle suma ngat buzu suma yam tcho d’a bei wat ad’uta na
22Ma didina mi de kua ala: Le agi lagi tchod’a bei wad’ud’a, le agi tid’igi nga yam vun man ma he ma an Ma didina ni hum mi Moise-sâ 23ki vun ma he ma pet ma an huma d’uo tin ad’ud’a kur bur ma an hagi vunina dei d’oze bugol kur atchogoi magi d’a nga d’i mbad’a, 24le agi lagi tchod’a bei wat ad’ud’u, ablau d’a peta ti we nga d’uo ni, agi zla tagi pet agi hagi amuhl ma azongâ vama ngat buzu ma ngal ma his ma afufuîna avogon an Ma didina zlapa ki he d’a hawa d’a afuta ki d’a süm guguzlud’a d’igi a he vuna na. Agi hagi mbekmberena vama ngat buzuna yam tchod’a kua.
25Hina wani, ma ngat buzuna mba mi zlup yam tchod’a hablaud’a hi Israel-lîd’a pet. An mba ni vat hurun ndei kaziya, kayam a le ni tcho d’a bei wat ad’uta. Azi mba ki he mazi d’a hawa d’a afut ta ngala á suburun an Ma didina ki vama azi hum á tchid’a yam tcho mazid’a avogon an Ma didina yam tcho mazi d’a azi lat bei wed’id’a. 26Hina wani, an mba ni vat hurun ndei yam ablaud’a hi Israel-lîd’a kangoyogei suma a nga adigazina ki suma pet mi, kayam azi le ni tcho d’a bei wat ad’uta.
27Le ni sana tu ba, mi le tchod’a bei mi wat ad’ud’u ni, mi he b’ë d’a bizat tud’a á zlup yam tchod’a. 28Ma ngat buzuna mi zlup yam tcho d’a sa máma mi lat bei wat ad’ut avogon an Ma didinid’a. Ata yima a zlubut yatna, an mba ni vat hurun ndei kamu. 29Gat ndata ni yam suma pet suma a mba le tcho d’a bei wat ad’utina, yam Israel-lâ d’oze yam angei ma nga kaka adigagina mi. 30Wani le ni ma Israel-lâ d’oze angeina, mi le tchod’a kur min mamba ni, mi golon ni is; a mba pad’am mbei aduk sum mama. 31Mba mi zi tchod’a hanek ka a digim mbei kata, kayam mi golon is, mi tchila yam vun man ma hed’a mi.
Sana mi b’lak bur ma sabatna
32Ata yima Israel-lâ a nga abagei hur fulâ tua na, a fe sana nga mi yo aguna kur bur ma sabatna. 33Suma a fum yo agunina, a mbamî mi Moise azi ki Aron kablaud’a pet. 34A hum abo suma ngomba, kayam azi we nga vama azi le ki sed’ema d’uo tua.
35Ma didina mi de mi Moise ala: Agi tchagi sa máma woyo; ablaud’a pet ti durum sä woi bugol kangâ.
36Ablau d’a peta a nde ki sed’em mbei bugol kangâ, a durum kahinad’a gak a tchum d’igi Ma didina mi he vuna mi Moise na.
Gimi ma avun barunina
37Ma didina mi de mi Moise ala: 38Ang i de mi Israel-lâ ala: Ma didina mi dala: Kur atchogoi d’a lara pî agi gagi gimina avun baru magina, agi gagi baru d’a botlozid’a ziyoziyo gimina avun baruna. 39Le agi nga ki gimi máma avun baruna na ni, agi mba wumu, agi mba djib’eregi yam vun man ma hed’a pet á le ki sunda kamu, agi mba tid’igi yam djib’er ra kurugi krovod’a ki d’od’oka hahle suma agi wagizi ki iragi suma a igi á tuwal fileinina d’i. 40Hina wani, agi mba djib’eregi yam vun man ma hed’a pet, agi mba tid’igi kamu, agi mba kagagi ni suma tinigi iragi vagi mi an Alo maginina. 41An ni Ma didina Alo magi ma buzugugï woi kur Ezipte á Alo maginina. Gagazi, an ni Ma didina Alo magina.
Currently Selected:
Ndumba 15: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
