Ndumba 11
11
Israel-lâ a nga ata Tabera-na
1Israel-lâ a nga gureî gureî d’a tchod’a yam Ma didina. Ma didina mi huma, hurum zal ngola, mi sunï akud’a adigaziya. Ti ngal vun kangâ woi burut. 2Ablau suma Israel-lâ a nde tchi yam Moise; Moise mi tchen Ma didina kaziya; akud’a ti mit tei mi. 3A tin yi máma simina ala Tabera, kayam akud’a hi Ma didinid’a ti fo ngala adigaziya.
Israel-lâ a nga hal hliuna
4Andjaf ma ding ma teteng ma nga aduk Israel-lîna nga ni le d’od’oka heî. Israel-lâ tazid’a pî a tchol tchina ala: Ni nge ba, mba mi hami hliuna á mutna ge? 5Humami nga gami yam kulufâ, kurduna, bubud’a, poirod’a, pazara ki tumba suma avo Ezipte suma ami tazi bei gusa ba na. 6Ki tchetchemba, ami id’imiyâ wa, va nga d’uo d’a; irami ti gol kä ni manna go.
7Manna mi hle tamî d’igi ir vud’agu koriyandrena na, mi hle tamî d’igi bedeliyuma na. 8Israel-lâ a b’rau woi teteng á yomu, a lud’um mboze a dum mi, a yum kur deina, a lum fangasuna mi. Adjib’et mamba ni d’igi woî ma a lum ki mbulîna na. 9Ata yima mbad’ïd’a nga d’i yak kä andjege kur kangîna, manna nga mi tchugï kä ki sed’et mi.
10Moise mi hum tchina hi sumina, nge nge pî ad’u adezem avun zlub’u mamba. Ma didina hurum zal ngola heî.
Zla ndata le nga Moise tam djivi d’i, 11mi de mi Ma didina ala: Ni kayam me ba, ang kid’eî ir an azong mangâ na ge? Ni kayam me ba, ang nga wan hohowon nduo ge? Ni kayam me ba, ang tinin aneka hi sum ndazina kan na ge? 12Na ni sum ndazina pet an vazi wirizi ni an ndju? An vud’uzi ni anu ba ang ala an zizi didigan d’igi atcha d’a wul gorâ nga d’i zim adigat na gak ni izi yam ambas sa ang tang hat mabuyozi á haziziya d’a ge? 13An mba ni fe hliuna ni lara ba, ni hum mi sum ndazina hina pet ke? Kayam a nga tchi kan ala: Ang hami hliu ma mutna. 14An ndak nga á zi ablau sum ndazina van tu d’i, kayam a tchan aneka heî. 15Le ang lan ni na ni, hotei ang tchanu. Le ang wan hohowonu ni, ar an we ndak manda ki iran ndi.
16Ma didina mi de mi Moise ala: Ang togon suma nglo Israel-lâ dok kid’iziya, suma ang wazi ala ni suma nglona avok suma na, ang mba ki sed’ezi avun zlub’u d’a ngaf tad’a, ar a tchol akulo ata yi máma zlapa ki sed’engû. 17An mba ni tchugï asen kä, an mba ni dang zlad’a ata yi máma, an mba ni hle Muzuk ma nga kaka kangâ, an mba ni tinim kaziya, kayam azi zi aneka hi sumid’a zlapa ki angû, tala ang zit vang tu d’uo d’a.
18Ang de mablau suma ala: Avin agi mbud’ugi tagi yed’et, agi mba mud’ugi hliuna, kayam Ma didina mi hum tchi magi mala ni nge mba mi hei hliu ma mutna, kayam ei sä Ezipte wani djivid’a heyû na. Ma didina mba mi hagi hliuna, agi mba mud’ugiziya. 19Agi mba mud’ugizi ni burâ tu d’oze burâ mbà d’oze burâ vahl hloze burâ dogo d’oze burâ dok mbà go d’i. 20Wani agi mba mud’ugizi ni tilâ sop, gak mi hlagi hisâ mi kak atchinagi mi, kayam agi gologi Ma didin ma nga kaka adigagina is, agi tchigi avorom ala: Ni kayam me ba, mi buzugugï woi kur Ezipte ge?
21Moise mi dum ala: Suma an adigazina a ni 600.000, wani ang dala ang hazi hliuna azi tum tilâ sobu ni! 22Na ni a ngad’azi naho’â kamuzleina pet ba a ndagazi zu? D’oze a togozi ni kuluf ma hur alum ma ngolîna pet ba, ni ndagazi zu?
23Ma didina mi hulong de mi Moise ala: Na ni an kid’ak su? Ki tchetchemba, ang mba we zla d’a an data mba d’i le d’oze mba d’i le d’uo, ang mba we.
Alona he Muzu’â mi suma nglona
24Moise mi de zlad’a hi Ma didinid’a mablau suma, mi tok suma nglo suma dok kid’iziya suma avok ablau sumina, mi ndjarazi kä ngui zlub’ud’a. 25Ma didina mi tchugï asem kä kur d’ugula, mi de zlad’a mi Moise, mi hle Muzuk ma nga kaka kama, mi tinim yam suma nglo suma dok kid’iziya ndazina. Ata yima Muzu’â mi kak kazina, a nde djok vuna, wani a i nga avogovok ki.
26Suma mbà a ar nga kä kur kangâ, ma tuna a yum ala Eldat, ma mbàna a yum ala Medat. Muzu’â mi kak kaziya, kayam azi ni suma a b’irizi aduk suma dok kid’iziyana mi, wani azi iza nga avun zlub’ud’a d’i. A nde djok vuna kur kangâ. 27Wani gor azongâ mi ring i de mi Moise ala: Eldat azi ki Medat a nga djok vuna kur kangâ!
28Josue Nun gorom ma azongâ hi Moise ma nga zlapa ki sed’em ki gogorom deina, mi dum ala: Salana Moise, ang d’eleziya!
29Moise mi hulong dum ala: Ang le ni yungôra kan ndju? Ladjï Ma didina mi b’rau Muzuk mama mi sum mama pet á djok vuna ni, tan mba d’i lan djivid’a ngola. 30Moise ki suma nglo suma avok Israel-lîna a buzuk a i kur kangâ.
Ma didina mi mba ki tcheged’a
31Ma didina mi tchol ki simet ma kur alum ma ngolîna, mi mba ki tcheged’a. Nga d’i yak kä yam kangâ gak ti ndezi woi keng ndak ir tit ta burâ tud’a ngui kangâ woi d’uhl. Molot ta kä andaga i akulod’a ndak go ki metred’a tu. 32A nde yo tcheged’a kur bur máma yorogo kandjege gak tchavin fladege, a warat tei bugol kangâ. Ma mi yo akid’eid’ina, mi fe ni kilona dudubud’a tcha. 33Ata yima hliuna mi nga ved’a avunazi tua na, Ma didina hurum zal kazi ngola, mi tumuzi ki tugud’ei d’a tcho d’a tchi matna. 34A yi yi máma ala Kibrot-Hatava, nala, Yima a tos suma a le d’od’oka kuana.
35A tchol Kibrot-Hatava á i Haserot, a kak sä kua.
Currently Selected:
Ndumba 11: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
