Nehemi 6
6
Suma djangûna a hulongî á d’el sunda kua
1Ata yima an duk nga bapma avun agre’â d’uo tua na, Sanbalat ki Tobiya ki Gesem ma Arap-ma ki mami suma djangû suma dingâ a hum ala an min wa gulumuna akulo, hod’ol mamba ar nga d’uo mi. 2Ata yi máma Sanbalat ki Gesem a sunï atanu, a dan ala: Ang mbeï ei i asem tei Kefirim kur hor ra Ono-d’a. Wani azi nga huruzi á lan murud’umba.
3An hulong sunuzi suma ni dazi ala: An nga ki sunda ngola á led’a, an ndak á arat ni iza gevegi d’i. Le an iza gevegiya ni, sun ndata mba d’i d’ela.
4A sunï suma atan yazi fid’i ki zla d’a tu ndata; an hulongôzi humba ni ki zla d’a tu ndata mi. 5Sanbalat mi sunï azong mama atan yam á vahla ki mbaktumba vunat mala woi abomu. 6A b’ir kua ala: Vuna mi wet wa woi aduk suma, Gasmu mi dami na mi ala ang ki Juif-fâ agi nga minigi tagi á tchol huneîd’a. Ni kayam ndata ba, ang hulong nga min gulumuna akulo. A nga dala ang nga hal á kak amul mazina. 7A nga dala ang tin wa suma djok vuna á de woi kang avo Jerusalem ala: Amulâ nga avo Juda. Amul ma ngolâ mba mi hum zla ndata atogo zak. Kayam ndata, ang mbeï ei yoi siretna yam zla ndata.
8An hulongôm humba ala: Zla d’a ang dat wanda ni zla d’a kad’a, ni zla ma anga ki yanga.
9Sum ndazina a min mbud’umi mandarâ, a dala: Tazi mba d’i tchuk lus, a mba ar sun ndata bei led’a.
An tchen Alona kua ala: Wani ki tchetchemba, ang Alo mana, ang han ad’enga.
10An i avo hi Semaya Delaya gorom ma Mehetabel gorom ngolonina, ni ma nga d’ela avona. Mi dan ala: Ei i kur gonga hAlonid’a kur yima a tinim iram vama, ei dugi vuna keya, kayam mang suma djangûna a nga mba á tchangû. Gagazi, a nga mba ini andjege á tchangû.
11An hulong ni dum ala: Sama d’igi an na ni ring zu? Sama d’igi an na na ni ndak á kal kur gong nga kud’ora hAlonid’a á sut tandju? An nga ni kal li!
12An we tcha ala zla d’a mi dandjid’a tcholï nga nata Alona d’i. Mi dan hina, ni kayam me Tobiya azi ki Sanbalat a wuragamî wuraga. 13A wuragam kayambala an mbut mandarâ ni tit yam d’al mama ni le tchod’a le ba, azi b’lagan simiyên ndei á mbud’un zulona d’a.
14An tchen Alona kua ala: Alo mana, ang djib’er yam Tobiya azi ki Sanbalat yam sun nda azi nga lata, ki d’a djok vuna Nowadiya ki suma djok vun suma ding suma a nga hal lovota á mbud’un mandarîna.
15Gulumuna mi dap minda ni kur bur ma dok mbà yam vahlâ hi til Elul-lâ; bur ma a le sun gulumuna kurâ pet ni burâ dok vahl yam mbà. 16Kid’a mami suma djangûna pet a hum hina d’a, andjaf suma ding suma a nguyumina pet a mbut mandarâ, a hulong yazi kä yam taziya, a wala sun ndata ti le ni ata minda hAlo meinid’a.
17Kur bur máma suma nglo suma Juda-na a sun mbaktumba mi Tobiya yazi ablaud’a, Tobiya pî mi sunuzi mbaktumba hina mi. 18Kayam suma Juda-na ablaud’a a zlap ki sed’em yam gun tad’a, kayam mam mi Sekaniya Aras goroma akunoma, goroma Johanan mi ve Mesulam Berekiya goroma goromba atchad’a. 19A nga dum zlam djivid’a avoronu, azi im zla manda mi. Mam nga mi sununï mbaktumba á mbud’un mandarâ.
Currently Selected:
Nehemi 6: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
