Marik 16
16
TCHOLA HI JESUS-D’A KI HULONG MAM MBA AKULOD’A
(16.1-20)
Jesus mi tchol akulo aduk suma matna
(Gol Mat 28.1-8; Luc 24.1-12; Jn 20.1-10)
1Kid’a bur ma sabatna mi kal lei dad’a, Marie d’a Makdala-d’a azi ki Marie d’a Jacques asumba ki Salome a i gus mbul ma his ma afufuîna á i vom yam Jesus. 2Kur bur dimas yorogo tcholol, kid’a afata ti deî dad’a, azi mbaza yam asud’a. 3A nga de tazi ala: Sama mba mi ligad’ei ini ahina ndata woi avun zula ni nge ge? 4Kid’a azi hle irazi akulod’a, a we ahina d’a ngol ndata a ligad’at tei avun zula da’. 5Ata yi máma a kal kä kur zula, a we gor azongâ nga kak kä ata abo ma ndjufâ ki baru d’a fiyak ka hapa atamu, wani vunadigazi d’i pat fek.
6Mi dazi ala: Ar vunadigagi d’i pat ti. An wala agi halagi ni Jesus ma Nazarat ma a b’alam akulo ata agunina. Mi tchol wa akulo, mi nga ka hî d’i; agi gologi yima a gum kuana wana. 7Ki tchetchemba, agi i dagi mi mam suma hata zlapa ki Pierre ala: Nga mi iza avorogi Galile; agi mba wum sä hî d’igi mi dagi avok na. 8Azi buzuk kei kur zula, a ringâ, a nga zlak djidjik, vunadigazi d’i pat fek mi, wani a de nga mi sa abo mandarâ d’i.
Jesus mi nde tam ir Marie d’a Makdala-d’a
(Gol Mat 28.9-10; Jn 20.11-18)
[9Kid’a Jesus mi tchol akulo aduk suma matna ki dimas yorogo tcholola, mi nde tam ir Marie d’a Makdala d’a mi dik muzuk ma tchona woi kurut kid’iziya avoka. 10Ti i de mi suma a nga ki sed’em adjeuna, kid’a azi nga hat huruzi ki tchinid’a. 11Wani ata yima ti dazi ala Jesus mi nga karid’a ndat wum mi na, azi he nga gagazid’a yam zla mata d’i.
Jesus mi nde tam mbei ir suma hata mbà
(Gol Luc 24.13-35)
12Bugol ahle ndazina, Jesus mi nde tam mbei ir suma mbà ki ta d’a dinga kid’a azi nga kur tita á i kur azì ma kelîd’a. 13Azi hulong i de mi ndroyozi suma dingâ, wani a he nga gagazid’a yam zla mazid’a d’uo mi.
Jesus mi nde tam mbei ir suma hat suma dogo yam tu
(Gol Mat 28.16-20; Luc 24.36-49; Jn 20.19-23; Sun SS 1.6-8)
14Bugola, Jesus mi nde tam mbei ir suma hat suma dogo yam tuna, ata yima azi nga avun tenina. Mi ngobozi yam bei he gagazi mazid’a, yam hur mazi ma b’al ma a he nga gagazid’a yam suma a wum bugol tchol mamba d’uo na mi.
15Bugola, mi dazi ala: Agi igi yam andagad’a pet, agi tchagi wal Zla d’a Djivid’a mi suma pet. 16Sama mi he gagazid’a a mba lum batembina, mba mi fe suta, wani sama mi he nga gagazid’a d’uo na, sariyad’a mba d’i vumu.
17Wana nahle suma atchap suma suma he gagazid’a kana a mba lazina: Azi mba dik muzuk ma tchona woi kur suma, a mba de zlad’a ki vuna hi suma teteng mi. 18Azi mba yo guguyona kaboziya. Le a tche ni kuma ma tchi matna pî, mba lazi va d’i. Azi mba tin abozi yam suma tugud’eid’a, a mba sud’uzi mi.
Hulonga hi Jesus d’a akulo gen Alonid’a
(Gol Luc 24.50-53; Sun SS 1.9-11)
19Bugol la Salad’a Jesus mi dazi zla ndata dad’a, a hlum sä akulo, mi kak ata Alona bigam mba ndjufa. 20Hina, mam suma hata a buzuk i ata yina pet, a tchi wal Zla d’a Djivid’a. Salad’a nga mi le sunda ki sed’eziya, nga mi tak zla ndata woi ala ni zla d’a gagazid’a kahle suma atchap suma azi nga lazina mi.]
Currently Selected:
Marik 16: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.