Matiye 7

Agi kagi sariyad’a yam sa d’i

(Gol Luc 6.37-38,41-42)

1Jesus mi had’azi kua ala: Agi kagi sariyad’a yam sa d’i, kayam Alona mi kagi sariyad’a kagi d’uo mi. 2Alona mba mi kagi sariyad’a kagi ni d’igi agi nga kat yam suma dingâ na mi. Mi mba mi ngagi ni ki nga d’a agi nga ngagi ki mi suma dingîd’a mi. 3Ni kayam me ba, ang gol asu ma lerem ma nga ir wiyengîna, wani ang nga djib’er yam agu ma murguli ma nga irangâ d’uo ge? 4Ni nana ba, ang de mi wiyengâ ala: Ang tin an hlang asu ma lerem ma irangâ woyo, wani ang tanga we nga agu ma murguli ma nga irangâ d’uo ge? 5Ang ma lop ira, ar ang hlagu ma murguli ma nga irangâ woi tua ba, ang ndak á we yina woi tetet á hlasu ma lerem ma nga ir wiyengîna woi tua.

6Ar agi hagi vama a tinim iram vam mAlonina madureina d’i. Ar agi tchugugi hed’eu magina kä avok kozongâ d’uo mi, dam azi mired’em kä kaseziya, a mba hulong hôgi mbilâ.

Hat ta yam tchenda, hala ki dap vun gonga mi

(Gol Luc 11.9-13)

7Jesus mi had’azi kua ala: Agi tchenegi Alona, mba mi hagiya; agi halagi va, agi mba fagiziya; agi dabagi vun gonga, a mba malagiziya. 8Kayam nge nge pî ma nga mi tchena, Alona mba mi humu; sama nga mi halâ, mba mi fe; sama nga mi dap vun gongina, a mba malamziya. 9Ni nge adigagi ba, goroma le mi tchenem yam avuna ba, mba mi hum ahinad’a ge? 10D’oze le mi tchenemî yam kulufâ ba, mba mi hum guguina ge? 11Le agi suma tchona agi wagi á hahle suma djivina mi grogina na ni, Abugi ma sä akulona mba mi hahle suma djivina mi suma a nga tchenema kal luo zu?

12Kayam ndata, ahlena pet suma agi min suma lagizina, agi lazi mi suma dingâ na mi. Wana agi ndagagi ni vun gata hi Moise-sa ki hata hi suma djok vun Alonid’a.

Hat ta yam vun agrek ma mbed’etnid’a

(Gol Luc 13.24)

13Jesus mi had’azi kua ala: Agi kalagi ata vun agrek ma mbed’etna, kayam vun agre’â azi ki lovot ta i ata yima bad’id’a ti ni bubud’a, suma a kal i kuana a nablaud’a mi. 14Kayam lovot ta i kur arid’id’a tad’enga heî, vun agre’â mi ni mbed’et mi, suma fatna a nakid’eid’a mi.

Hat ta yam aguna ki vud’umba

(Gol Luc 6.43-44)

15Jesus mi had’azi kua ala: Agi gologi tagi djivi ki suma djok vun suma ka zla suma a nga mba atagi ki bak tumiyôna atazina, wani kuruzi krovo ni ngû ma ayîna. 16Agi mba wazi nata sun mazid’a. Na ni a dut vud’a guguzlud’a ata aweid’a zu? D’oze a dut vud’a tuluma ata kekerezeuna zu? 17Hina mi, agu ma djivina pet mi vut ni vut ta djivid’a, wani agu ma tchona pet mi vut ni vut ta tchod’a mi. 18Agu ma djivina mi ndak á vut vut ta tchod’a d’i, agu ma tchona mi ndak á vut vut ta djivid’a d’uo mi. 19Agu ma lara ge ma nga mi vut vut ta tchod’ina, a mba kam mbeyo, a mba gum aduk akud’a. 20Nata sun mazid’a ba, agi mba wazi kiya.

An wagi nga d’i

(Gol Luc 13.25-27)

21Jesus mi had’azi kua ala: Suma pet suma a nga yan ala Salamina, Salamina na, a mba kal kur leu d’a akulod’a pet ti, wani ni suma a nga le minda hAbun ma sä akulona hol. 22Kur bur máma, suma ablaud’a a mba dan ala: Salamina, Salamina, ami djogomi zlad’a hAlonid’a woi ki simiyêng ngi? Ami digimi muzuk ma tchona woi ki simiyêng ngi? Ami lami sun nda ngol la atchapa ki simiyêng ngi? 23Ata yi máma, an mba ni dazi woi ala: Agi suma le tchod’ina, an wagi nga d’i, agi hud’ugi sä woi dei gevenu.

Gongîyo suma mbàna

(Gol Luc 6.47-49)

24Jesus mi had’azi kua ala: Kayam ndata, sama lara ma hum zla man nda an data ma le sunda katna, mi hle tamî d’igi sama ne ma mi min aziyam yam ahinad’ina na. 25Alona mi se, mbiyo ma kä na mi kuza, babarâ mi le bibik giget gong ndata mi, wani ti to nga kä d’i, kayam mi gat ad’ut ni yam ahinad’a.

26Wani sama lara ma hum zla man nda an data ma le sunda kat tuo na, mi hle tamî d’igi sama lili ma mi min gong mamba yam lesîna na. 27Alona mi se, mbiyo ma kä na mi kuza, babarâ mi le bibik giget gong ndata mi, ti to kä woi ndjandjap, ti b’lak kei kakazeî mi.

Ad’enga hi Jesus-d’a

28Kid’a Jesus mi dap zla d’a ded’id’a, ablau suma a le atchap yam hat mamba, 29kayam nga mi had’azi kad’enga, wani nga ni d’igi suma hat gata na d’i.

Currently Selected:

Matiye 7: BA

Highlight

Copy

Compare