Matiye 18

Ma ngolâ ni nge?

(Gol Mar 9.33-37; Luc 9.46-48)

1Ata yi máma, suma hata a mba gen Jesus, a djobom ala: Sama mba mi kak ma ngolâ kur leu d’a akulod’ina ni nge ge?

2Mi yi gogorâ, mi tinim adigaziya, mi dazi ala: 3Gagazi, an nga ni dagiya, le agi mbud’ugi nga tagi d’igi gogor ma wana hina d’uo ni, agi mba kalagi kur leu d’a akulod’a d’i. 4Kayam ndata, nge nge pî ma mi hulong yam kä d’igi gogor ma wana na na, mba mi kak ma ngolâ kur leu d’a akulod’a. 5Nge nge pî ma ve gogorâ d’igi ma wana na atam yam simiyêna, mi van ni anu.

Jesus nga mi hat yam tcho d’a ngol la kala

(Gol Mar 9.42-48; Luc 17.1-2)

6Jesus mi had’azi kua ala: Nge nge pî ma nga mi le vama b’lak gogorâ aduk gugurei suma a he gagazid’a kana ni, djivid’a hotei djinim ahina d’a ngola kelemu, a gumza woi aduk alum ma ngolâ. 7Ni zla d’a hohoud’a yam suma yam andagad’a suma a nga lahle suma a tchuk suma kur tchod’ina. Mbeî ahle suma a tchuk suma kur tchod’ina a mba mba, wani ni zla d’a hohoud’a yam sama mi mba kahle ndazinina.

8Le abong ngoze aseng a nga ing kur tchod’a ni, ang kazi woyo, ang tchuguzi woi dei. Djivid’a hotei ang kal kur arid’a kabong tu d’oze aseng tu, kala abong djak koze aseng djak ing aduk aku d’a didinda d’a. 9Le irang nga d’i ing kur tchod’a ni, ang pad’at gat tei dei. Djivid’a kal la ang kal kur arid’a ki irang tud’a kala a mba gang aduk aku d’a Jahanama ki irang djaka.

D’ogol ma yam timi ma vit tei ma a fuma

(Gol Luc 15.3-7)

10Jesus mi had’azi kua ala: Agi gologi tagi djiviya, agi gologi ma tu ma aduk gugurei suma wana is si. Kayam an nga ni dagiya, malaika mazina a sä akulo a nga gol ir Abun ma sä akulona teteu. [11An Gor Sana mba ná sut ma vit teina.]

12Agi djib’eregi nana? Le sana mi nga ki tumiyôna kis, ma dingâ tu adigazi mi vit teyo ni, sa máma mba mi ar suma dok zlengâ yam zlengîna yam ahinad’a, mi i á hal ma vit teina d’uo zu? 13Gagazi, an nga ni dagiya, le mi fum wa ni, mi nga ki furîd’a yam ma tuna kal suma dok zlengâ yam zlengâ suma a vit nga woi d’uo na. 14Kayam ndata, Abugi ma sä akulona mi min ala ma tu ma aduk gugurei suma wana mi ba woi d’i.

Le wiyengâ lang tchod’a ni...

15Jesus mi had’azi kua ala: Le wiyengâ mi lang tchod’a ni, ang i fumu, ang tagam tcho mamba, ang ki mam mbà go. Le mi humungû ni, ang fe wa wiyengâ. 16Wani le mi humung nga d’uo ni, ang ve sana tu d’oze mbà, kayam glangâsâ hi suma mbà d’oze hi suma hindina ni zla d’a ndaka. 17Le mi humuzi nga d’uo ni, ang de zla ndata woi mi Toka. Le mi hum nga Toka d’uo mi ni, ang golomî d’igi sama angeina d’oze sama tar lombod’a na.

D’ela ki he lovota

18Jesus mi had’azi kua ala: Gagazi, an nga ni dagiya, vama agi djinim ka hî yam andagad’a, mba mi ka’î djinda sä akulo hina mi; vama lara ma agi bud’um ka hî yam andagad’ina, mba mi ka’î buta sä akulo hina mi.

19Gagazi, an nga ni dagi kua, le suma mbà adigagi ka hî yam andagad’ina a ndjak vunazi tu yam vama azi tchenem kama ni, Abun ma sä akulona mba mi haziziya. 20Kayam ata yima lara ma suma mbà d’oze hindi a nga toka ki simiyêna, an nga adigaziya.

D’ogol ma yam ma sun ma mi noî hur ma vatina

21Ata yi máma, Pierre mi mba gen Jesus, mi djobom ala: Salana, wiyena mi lan tchod’a ni yam ga ba, an vat hurun ndei kam tua ge? Gak yam kid’iziya zu?

22Jesus mi dum ala: An nga ni dangû ni yam kid’iziya go d’i, wani yam dok kid’iziya dok kid’iziya d’a yam kid’iziya. 23Kayam leu d’a akulod’a ti hle tat ni d’igi amul ma mi min á ndum bege mam mba nga abo mam suma sundid’a na. 24Kid’a mi tin ad’u ndumbid’a, a mbamï ma nga ki bal gurzud’a dudubud’a ngola kama. 25Wani mi nga ki vama wurak ki. Salama mi he vuna ala a guzum mbei kamamba ki groma kahligiyem pet á wurak ki bal mama. 26Ata yi máma, ma sun máma mi ge tam kä avorom mi tchenem mi dum ala: Salana, ang ve tang kanu, an mba ni wuragangzi pet. 27Kayam ndata, salama mi wum hohowomu, mi gum akulo, mi tchi bal ma kama woi pet mi.

28Wani ma sun máma mi ndabua, mi fe ndram ma sun ma bal mama nga kam siled’a kisâ. Mi vum delem do ndinding, mi dum ala: Ang wuragan bal man ma kangâ. 29Ata yi máma, ndram ma sun máma mi ge tam kä avorom mi tchenem mi dum ala: Ang ve tang kanu, an mba ni wuragangziya. 30Wani mi min ndi, mi i mi gum dangeina gak mi wurak bal mama. 31Ata yima ndrom suma sunda a we vama mi luma, huruzi zal heî, a i de mi salazina yam vama mi luma. 32Ata yi máma, salama mi yumïya, mi dum ala: Ang ma sun ma tchona, an tchang bal man ma kangâ woi pet, ni kayamba ang tchi avoronda. 33Djivid’a ang we ndrang ma sunda hohowom d’igi an wang hohowong na mi d’uo zu? 34Salama hurum zal heî, mi gum dangeina gak mi wurak bal mama pet.

35Jesus mi de kua ala: Le nge nge pî adigagi mi vat nga hurum mbei yam wiyema d’uo ni, Abun ma sä akulona mba mi vat hurum mbei kam mbuo mi.

Currently Selected:

Matiye 18: BA

Highlight

Copy

Compare