Matiye 16

Fariziyêna ki Sadusiyêna a djop yam vama simata

(Gol Mar 8.11-13; Luc 12.54-56)

1Fariziyêna azi ki Sadusiyêna a mba ata Jesus. A kugum ala mi tagazi vama simat ma mi tcholï akulona. 2Mi hulong dazi ala: Le afata ti mbut wa fladeged’a ni, agi nga dagi ala: Yina mba mi le ini djiviya, kayam akulod’a ti mbut hleud’a. 3Ki yorogod’a, agi nga dagi ala: Ini alona mba se, kayam akulod’a ka hleud’a ki d’ugula kikring. Agi wagi simat ta akulod’a, wani agi ndagagi á we simata hatchogoi d’a wandid’a d’i. 4Agi suma tcho suma bei d’ingêr suma kur atchogoi d’a wandina, agi nga halagi vama simata, wani a mba samad’agizi d’i, ni simata hi ma djok vun Alona Jonas-sâ hol. Mi araziya, mi iya.

Angufa hi Fariziyênid’a ki d’a hi Sadusiyênid’a

(Gol Mar 8.14-21)

5Suma hata a djak sä woi abo apod’a abo hî, a mar bei yo avungôna aboziya. 6Jesus mi dazi ala: Agi gologi tagi djivi kangufa hi Fariziyênid’a ki d’a hi Sadusiyênid’a.

7Mam suma hata a nga de tazi ala: Mi de hina ni kayamba ei yoi nga avungôna aboi d’uo d’a.

8Kid’a Jesus mi we hina d’a, mi dazi ala: Agi suma he gagazi magi d’a akid’eid’ina, ni kayam me ba, agi nga dagi tagi yam avungô ma nga abogi d’uo na ge? 9Agi wagi nga d’uo tua? Agi djib’eregi nga yam avungô ma vahl ma an mbrugum mi suma dudubud’a vahlâ d’uo zu? Agi taragi ad’um mba ara ti oî gumud’a ni ga ge? 10Agi djib’eregi nga yam avungô ma kid’iziya ma an mbrugum mi suma dudubud’a fid’ina d’uo zu? Agi taragi ad’um mba ara ti oî gumud’a ni ga ge? 11Agi wagi nga d’ala an dagi ni yam avungôna d’uo d’a d’uo zu? Wani agi gologi tagi djivi kangufa hi Fariziyênid’a ki d’a hi Sadusiyênid’a.

12Ata yi máma, suma hata a wala mi dazi ala a gol tazi djiviya ni yam angufa d’i, wani a gol tazi djivi ni yam hata hi Fariziyênid’a ki d’a hi Sadusiyênid’a.

Pierre mi de woi yam Jesus ala ni Mesi

(Gol Mar 8.27-30; Luc 9.18-21)

13Kid’a Jesus mbaza yam ambas sa Sesare d’a Filip-pid’a, mi djop mam suma hata ala: Suma a nga de yam an Gor Sana ala an ni nge ge?

14Azi hulong dum ala: Suma dingâ a nga dala angî Jean ma le suma batemba, suma dingâ ala angî Elie, suma dingâ ala angî Jeremi d’oze ma dingâ tu aduk suma djok vun Alona.

15Wani mi djobozi ala: Wani agi tagid’a nga dagi kan ala an ni nge ge?

16Simon Pierre mi hulong dum ala: Angî Mesi máma, Alo ma arina Goroma.

17Jesus mi hulong dum ala: Ang Simon Jonas goroma, ang le furîd’a, kayam ni sana ba, mi tagang gagazi ndata d’i, wani nAbun ma sä akulona. 18An nga ni dangû, angî Pierre, an mba ni min Tok manda yam ahina ndata. Vun agre’â hi yima azuleinina mba mi lat va d’i. 19An mba ni hang lakled’a hi leu d’a akulod’id’a abongû. Vama ang djinim ka hî yam andagad’ina, mba mi ka’î djinda sä akulo hina mi; vama lara ma ang bud’um ka hî yam andagad’ina, mba mi ka’î buta sä akulo hina mi.

20Ata yi máma, Jesus mi gat mam suma hata ala a de mi sa ala mam mi Mesi-yu d’i.

Jesus mi de woi yam mad’am ki tchol mamba

(Gol Mar 8.31—9.1; Luc 9.22-27)

21Kur bur máma, Jesus mi nde mi de woi mi mam suma hata ala: Mbeî an i Jerusalem á fe ndaka ngola abo suma nglona azi ki nglo suma ngat buzuna ki suma hat gata mi. A mba tchanu, wani kur bur ma hindina, an mba ni tchol akulo aduk suma matna.

22Wani Pierre mi vum im woi gen nde, mi nde ngobom ala: Salana, ar Alona mi mbang ahle ndazina kang ngi.

23Wani Jesus mi mbut iram mi de mi Pierre ala: Seitan, iza woi hina dei ad’unu, ang hal á pugun kur tchod’a, kayam djib’er manga nga ni djib’era hAlonid’a d’i, wani ni djib’era hi sumid’a.

24Ata yi máma, Jesus mi de mi mam suma hata ala: Le sana mi min á tit ad’unu ni, ar mi noî tamu, mi hlagu mam ma b’ala kamu, mi tit ad’unu. 25Kayam nge nge pî ma nga mi min á sut tama, mba mi ba tam mbeyo. Wani nge nge pî ma ba tam mbei kana, mba mi sut tam mi. 26Wani le sana mi fahle suma yam andagad’ina ki zlazi pet, wani mam tamba mi ba woyo ni, djivi d’a mi fata ni me ge? D’oze, vama sana mba mi hum á vrak blangâm mam tambina ni me ge? 27Kayam an Gor Sana mba ni mbeï kur subura hAbunda ki malaika mama. Kur bur máma, an mba ni wurak nge nge pî yam sun mam mba led’a. 28Gagazi, an nga ni dagiya, suma dingâ a nga aduk suma tchola kä wana a mba bo d’i, gak azi mba wan an Gor Sana mba ni mbeï kamul manda.

Currently Selected:

Matiye 16: BA

Highlight

Copy

Compare