Sunda hi suma hi Levi-nid’a 6
6
Gat ta yam he d’a hawa d’a ngalid’a
1Ma didina mi de mi Moise ala: 2Ang he vuna mi Aron azi ki groma, ang dazi ala:
Wana ni gat ta yam he d’a hawa d’a ngalid’a: A ar he d’a hawa d’a ngal ndata akulo yam yima ngal ahle suma ngat buzuna gak yorogo, a ar akud’a ti ngal akulo yam yima ngal ahle suma ngat buzuna. 3Ma ngat buzuna mi tchuk baru mam mba ngola atamu, mi tchuk kalsongâ ad’um mi, mi yo bubud’aku d’a a ngal he d’a hawa d’a ngal la yam yima ngal ahle suma ngat buzunid’a, mi tchugum kä gen yima ngal ahle suma ngat buzuna go. 4Bugola, mi fok baru mama woyo, mi tchuk baru ma dingâ atam á yo butna á tchugum mbei bugol kangâ ata yima a tinim iram vam á tchuk butna kuana. 5Aku d’a nga d’i ngal yam yima ngal ahle suma ngat buzunid’a mba d’i mit tei d’i. Yorogo d’a lara pî ma ngat buzuna mi ndja aguna kad’u, mi tchuk vama a hum he d’a hawa d’a ngalina akulo kad’u, mi ngal mbul vama ngat buzu ma zlap darigïd’a woyo. 6Akud’a mba d’i ngal yam yima ngal ahle suma ngat buzuna hina baba bei mit tei ba.
Gat ta yam he d’a hawad’a hafutid’a
7Ma didina mi de kua ala: Wana ni gat ta yam he d’a hawad’a hafutid’a: Ar Aron groma a hat mi an Ma didina ni azi avok yima ngal ahle suma ngat buzuna. 8Ma ngat buzuna mi yo afuta abom tu ki mbulâ zlapa ki dubang ma his djivid’a ma a vom yam he d’a hawa ndatina, mi ngalat akulo yam yima ngal ahle suma ngat buzuna d’igi vama ge hum ma his ma afufuî ma avogon an Ma didinina na. 9He d’a hawad’a ad’ut ta ara, Aron azi ki groma a tad’u, wani a gangufa kua d’i. A tat nata yima tu ma a tinim iram vam ma kur gulumuna hi zlub’u d’a ngaf tad’ina. 10Ar a yat kangufa d’i. Ni b’raud’a an hazizi aduk ahle suma a handji he d’a hawa d’a ngalina; ni vama a tinim iram vam ma kal tegles mi an Ma didinina d’igi vama a hum vama ngat buzuna á zlup yam tchod’ina ki vama ngat buzu ma yam tchilad’ina na mi. 11Ar Aron grom suma andjofâ pet a tad’u; ti arî gat ta didinda yam andjavazi yam he d’a hawa d’a ngal la a hat mi an Ma didinid’a. Kayam ndata, sama lara ma mi dotna mba mi mbut ni vama a tinim iram vam mi an Ma didinina.
12Ma didina mi de zlad’a mi Moise kua ala: 13Wana ni he d’a hawa d’a afut ta Aron azi ki groma a mba hat mi an Ma didina kur bur ma a mba vozi mbulâ kazi á tinizi irazi vazina: Afut ta adiged’i d’a kilona fid’i d’a a hat burâ ki burîd’a. A walat aduk mbà, a he tu yorogo, a he tu fladege mi. 14A tib’eged’u, a yat aku ki mbulâ kur halâ, a wizeget kä woi gegeleng á hat he d’a hawa d’a yid’a d’igi vama his ma afufuîna na, mi an Ma didina.
15Ma ngat buzu ma aduk Aron groma ma a mba vom mbulâ kam á vrak blangâma mba mi hat ni hina. Ti arî gat ta didinda avogon an Ma didina; mi ngalat tei pet. 16He d’a hawa d’a afuta hi ma ngat buzunid’a pet, a ngalat teyo; ar sa mi tat ti.
Gat ta yam vama ngat buzu ma zlup yam tchod’ina
17Ma didina mi de mi Moise ala: 18Ang i de mi Aron azi ki groma ala:
Wana ni gat ta yam vama ngat buzu ma zlup yam tchod’ina: Nata yima a nga ngat vama a hum he d’a hawa d’a ngala kuana ba, mi i ngat vama a hum vama ngat buzuna á zlup yam tchod’ina kua avogon an Ma didina; ni vama a tinim iram vam ma kal tegles mi an Ma didinina. 19Ma ngat buzu ma mba mi he vama a hum vama ngat buzuna á zlup yam tchod’ina, mba mi mud’umu; mba mi mud’umî ata yima tu ma a tinim iram vam ma kur gulumuna hi zlub’u d’a ngaf tad’ina. 20Vama lara ma mi do hliu va mámina, mba mi mbut ni vama a tinim iram vam mi an Ma didinina. Le buzuna hi vama a ngad’am máma mi do ata baruna ni, mi mbuzumî ata yima tu ma a tinim iram vam ma kal tegles mi an Ma didinina. 21Le a yumî kur dei ma lubuna ni, a tom mbeyo. Le a yumî kur dei ma kawei ma hleuna ni, a hegem mbusa woi ki mbina pipit. 22Mandjuf ma lara ma aduk suma ngat buzunina, mi mut hliu máma, kayam ni vama a tinim iram vam ma kal tegles mi an Ma didinina.
23Wani vama lara ma a mba hum vama ngat buzuna yam tchod’a ma a mba mba ki buzuwam kur zlub’u d’a ngaf tad’a á zlup yam tchod’a ata yima kud’orina, ar sa mi mud’um mbi; a ngalamî woyo.
Currently Selected:
Sunda hi suma hi Levi-nid’a 6: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
