Sunda hi suma hi Levi-nid’a 26
26
B’e vuna hAlonina
1Ma didina mi de kua ala: Agi lagi fileina d’i, agi tinigi angus va avorogi d’i, agi tched’egi va d’uo mi. Agi tinigi ahina d’a djif fa hle tat d’igi angus va hina d’a kur ambas magid’a á kud’urogizi d’i, kayam an ni Ma didina Alo magina.
2Agi ngomogi bur man ma sabat ma tuk tad’a, agi lagi mandara zlub’u man nda kud’ora, kayam an ni Ma didina Alo magina.
3Le agi nga tid’igi yam gat manda, le agi ngomogi vun man ma hed’a, le agi nga lagi sunda kam mi ni, 4an mba ni sagi alona ata yamu. Andagad’a mba d’i wulugi awuna, agu magina mba mi vut mi. 5Agi mba togi awuna gak mi tinigi ata yima dut guguzlud’a, agi mba dud’ugi guguzlud’a gak ti tchagi ata yima zuma. Agi mba tagi tena hobogiya, agi mba kagagi kur ambas magid’a ki halasa mi.
6An mba ni mba ki b’lenga halasa kagiya; agi mba burugi sena bei va mbud’ugi mandarâ ba. An mba ni dap amburei suma ayîna woi kur ambas magid’a; sa mba mi mba á dur ayîna kur ambas magid’a d’i. 7Agi mba digigi magi suma djangûna; azi mba puk kä avorogi abo mbigeu magi d’a fiyaka. 8Suma vahl adigagina a mba dik suma kisâ, suma kis adigagina a mba dik suma 10.000; magi suma djangûna a mba puk kä avorogi abo mbigeu magi d’a fiyaka.
9An mba ni djib’er kagiya, an mba ni aragi agi vud’ugiya, agi mba zulugiya. An mba ni tchol yam vun ma djin ma an djinim ki sed’egina mi. 10Agi mba tagi awu ma adjeuna gak agi mba yom mbei á vrak ma awilina blangâmu.
11An mba ni min yi man ma kaka adigagiya, an mba ni gologi d’igi vama ndjendjed’a na d’i. 12An mba ni tit adigagiya, an mba ni ka’î Alo magina; agi mba kagagi sum mana mi.
13An ni Ma didina Alo magi ma buzugugï woi kur ambas sa Ezipte-d’ina tala agi kagagi magumei mazina d’uo d’a. An kus djuk ma kelegina woyo, an aragi agi tid’igi yagi akulo herengîleng.
Vun ma ged’a hAlonina
14Ma didina mi de kua ala: Wani le agi nga humun nduo, le agi nga tid’igi yam vun man ma hed’a pet tuo, 15le agi nga tchilagi tid’igi kam pet tuo, le agi gologi gata d’igi vama ndjendjed’a na, le agi bud’ugi vun man ma djinda woyo ni, 16wana nahle suma an mba ni mbagizï kagina:
An mba ni mba á mbud’ugi mandarâ.
An mba ni tumugi ki tugud’ei d’a homozed’a ki ta d’a kumura suma a mba kagi iragi mbuleina gak dabagi ari magid’a woina. Agi mba fagi ndaka, agi mba zaragi ahlena ni hawa na; magi suma djangûna a mba tazi naziya.
17An mba ni mbut iran kak djangûna ki sed’egiya. Agi mba tchugugi susub’ok abo magi suma djangûna; suma a noyôgina a mba te kagiya; agi mba tinigi tagi ringâ avorozi bei azi digigi ba.
18Le an lagi ahle ndazina hina pet ba, agi humugi nga d’uo ni, an mba ni ngobogi ngo-ngop yan kid’iziya yam tcho magid’a. 19Kur ad’eng magi d’a agi nga suburugi ki tagid’a, an mba ni hulongôgi yagi kä, an mba ni b’al alona akulo kagi kiki; andaga magid’a mba d’i sira ad’enga kiki mi. 20Ad’eng magid’a mba d’i dap pei ni hawana, andaga magid’a mba d’i wul awuna d’uo d’a, agu magina mba mi vut awilid’a d’uo mi.
21Le agi tchologi ad’enga agi min humun nduo ni, an mba ni tumugi ki tugud’ei d’a tcho d’a tchi matna tutum yan kid’iziya ndak yam tcho magid’a. 22An mba ni sunï amburei suma ayîna a mba vigigi grogina, a mba vigigi d’uwar magina; agi mba feyêgiya, lovot magid’a mba d’i se asuna.
23Le an lagi hina pet ba, agi humugi nga ngop manda d’uo, agi tchologi ad’enga ki sed’enu ni, 24an mba ni tchol ad’enga ki sed’egi mi, an mba ni tumugi tutum yan kid’iziya yam tcho magid’a. 25An mba ni mba kayî ma durâ kur ambas magid’a á hlatchugulun yam vun ma djin ma an djinim ki sed’egina. Fata agi mba togogi kur azì magi ma nglonid’a, an mba ni sunï tugud’ei djabuma adigagiya, an mba ni hagi abo magi suma djangûna. 26Ata yima an mba ni d’el avungô maginina, aropma dogo a mba gavungôna kur für ma tuna, a mba ngagizi ni ngä; agi mba tumu, wani mba mi hobogi d’i.
27Le an lagi ahle ndazina hina pet ba, agi humun nga d’i, agi tchologi ad’enga ki sed’enu ni, 28an mba ni tchol ad’enga ki sed’egi ngingring mi, an mba ni ngobogi ngo-ngop yan kid’iziya yam tcho magid’a. 29Agi mba mud’ugi grogi suma andjofâ ki grogi suma aropma mi. 30An mba ni b’lagagi yi magi ma nding ma fileina woyo, an mba ni to filei magi ma afata woyo, an mba tchugugi mad’agi akulo kamu, an mba ni gologi d’igi vama ndjendjed’a na mi. 31An mba ni mbut azì magi ma nglona azì ma gureina, djona mba mi ar gevegi girib’ing. An mba ni pleî yi magi ma agi tinindji iram vama woyo, an mba ni his ahle magi suma his suma afufuîna d’uo d’a. 32An tanda mba ni b’lak ambas magid’a woyo; magi suma djangû suma a mba kak kurâ, a mba le atchap kad’u. 33An mba ni ndjoyôgi woi vivreng kayî ma durâ; ambas magid’a mba d’i mbut nambas sa abageid’a, azì magi ma nglona mba mi arî djona mi.
34Ata yi máma ambasa mba d’i mbut awilid’a yam biza mat ta sabat ta tuk tad’a ata yima lara ma ndat mba d’i ar djonina, ata yima agi sä kur ambasa hi magi suma djangûnid’ina. Ata yi máma ambasa mba d’i tuk tad’u, ti mba d’i mbut awilid’a yam biza mat ta sabat ta tuk tad’a. 35Ata yima lara ma ndat mba d’i ar djonina, mba d’i tuk tat yam biza mat ta sabat ta tuk tad’a ti fat nga d’uo ata yima agi nga kaka katna.
36An mba ni mbut suma ar adigagi suma a mba kak yam ambasa hi mazi suma djangûnina mandarâ kagilam. Ni simet ma mba mi sir hum agunina go ba, mba mi digiziya. Azi mba ringî d’igi suma a ring avok ayî ma durîna na, a mba puk kä bei sa mi digizi ba mi. 37A mba puk kä yam tazi teteng d’igi suma a ringî avok ayî ma durâ na, bei sa mi digizi ba. A mba tchol avok mazi suma djangûna d’i. 38Azi mba dap pei aduk andjaf suma dingâ; andagad’a hi mazi suma djangûnid’a mba d’i taziya. 39Suma a mba ar adigagina, a mba mbut amangeîd’a yam tcho mazid’a kur ambasa hi mazi suma djangûnid’a, a mba mbut amangeîd’a yam tchod’a habuyozi ngolod’a mi.
Alona mba mi djib’er yam vun mam ma djinda
40Ma didina mi de kua ala: Bugol ahle ndazina, azi mba de woi yam tcho mazid’a ki d’a habuyozi ngolod’a ki tchila mazi d’a azi tchilat avoronda ki so vun mazi ma azi son vunana, 41azi mba wala ni an ba ni tchol ad’enga ki sed’ezi ni izi yam ambasa hi mazi suma djangûnid’a mi, azi mba ge yazi kä yam hur mazi ma b’ala, azi mba wala azi le ni tchod’a mi. 42Ata yi máma an mba ni djib’er yam vun man ma djin ma an djinim kabuyozi ngolona, nala, ki Jakob ki Isak ki Abraham. An mba ni djib’er yam vun ma hle ma an hlum yam ambas mazid’ina mi.
43Ata yima azi mba ar ambasa blogozi djona woi deina, mba d’i mbut awilid’a yam biza mat ta sabat ta tuk tad’a. Ata yi máma azi mba fe ndaka kayamba azi noî vun man ma hed’a, a gol gat manda is mi d’a. 44Wani fata an mba ni izi kur ambasa hi mazi suma djangûnid’a, an mba ni arazi woi ki iran fafat ti, an mba ni golozi is gak mba ni dabazi woi d’i, an mba ni but vun man ma djin ma an djinim ki sed’ezina woi d’uo mi, kayam an ni Ma didina Alo mazina. 45An mba ni djib’er kazi á wazi hohowozi yam vun ma djin ma an djinim kabuyozi ngolo á buzuguzi woi kur ambas sa Ezipte-d’a ir andjaf suma dingâ á kak Alo mazinina, kayam an ni Ma didina.
46Wana ni gata ki vun ma hed’a ki hata suma Ma didina mi tinizi adigam ki Israel-lâ abo Moise yam ahina d’a Sinai-d’ina.
Currently Selected:
Sunda hi suma hi Levi-nid’a 26: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
