Sunda hi suma hi Levi-nid’a 20
20
Alona mi d’el filei ma tuwala
1Ma didina mi de mi Moise ala: 2Ang i de mi Israel-lâ ala:
Sama lara ma aduk Israel-lîna, d’oze le nangei ma nga kaka adigagina, le mi he goroma malo ma a yum ala Molo’â ni, mi ndak á tchid’a. Ar suma a nga kaka yam ambasina, a durum kahinad’a, a tchum mbeyo. 3An tan mba ni mbut iran ata sa máma, mba ni pad’am mbei aduk sum mama, kayam mi he goroma malo ma a yum ala Molo’â, mi mbut zlub’u man nda kud’ora ndjendjed’a, mi lazan simiyên Ma bei tchod’ina mi. 4Le suma yam ambasina a duk irazi woi yam sama mi he goroma malo ma a yum ala Molo’îna, le a tchum nga d’uo ni, 5an mba ni mbut iran ata sa máma kadezemu, an mba ni pad’am mbei aduk sum mama ki suma pet suma a le tchod’a d’igi mam na á tuwal alo ma a yum ala Molo’îna.
6Le sana mi i avun suma a nga djop ki suma azuleinina d’oze suma a nga de zlad’a yam ahle suma a nga mbana á mbut tam ndjendjed’a ki sed’eziya ni, an mba ni mbut iran ata sa máma, an mba ni pad’am mbei aduk sum mama.
7Ar agi kagagi ni suma yed’etna, kayam an ni Ma didina Alo magina.
Alona mi d’el zlap pa nga ata yat tuo d’a
8Ma didina mi de mi Moise kua ala: Agi ngomogi vun man ma hed’a, agi lagi sunda kam mi, kayam an ni Ma didin ma tinigi iragi vagina.
9Sama lara ma yahlena yam abum azi kasuma, a tchum mbeyo. Buzuwam mba mi hulong kamu, kayam mi yahlena yam abum azi kasumu.
10Le sana mi le mizeuna katchad’a hi ndramid’a ni, mandjufâ katcha ndata djak, a tchazi woyo.
11Le sana mi bur katchabumba ni, mi lasî abumu. Sa máma katcha ndata djak, a tchazi woyo. Buzuwazi mba mi hulong kaziya.
12Le sana mi bur kakunom mba goroma amambid’a ni, azi djak, a tchazi woyo, kayam a le ni vama zulona. Buzuwazi mba mi hulong kaziya.
13Le sana mi bur ki mandjufâ d’igi a bur katchad’ina ni, a le nahle suma ndjendjed’a; a tchazi woyo. Buzuwazi mba mi hulong kaziya.
14Le sana mi vatchad’a ki gorota djagu ni, mi tchila ni yam gata. Mam karop ndazina, a ngalazi woi pet, kayam ar andjaf tcho d’a hina d’a ti kak adigagi d’i.
15Le sana mi ful d’uwarâ ni, a tchum mbeyo, a tchi d’uwar máma woi mi.
16Le atchad’a ti hut go gen d’uwarâ, ti zlap ki sed’emu ni, a tchat tei ki d’uwar máma mi. Agi tchazi woyo. Buzuwazi mba mi hulong kaziya.
17Le sana mi ve wiyem mba abum gorombid’a d’oze wiyem mba asum gorotid’a atchad’a ni, azi le ni vama ndjendjed’a. A mba digizi woi aduk sum mazina. Mi mba mi hlaneka hi tcho mambid’a kayam mi ve ni wiyemba.
18Le sana mi bur katcha d’a buzuna fata ni, a digizi woi aduk sum mazina, kayam azi djak a tchila yam gat ta d’el lovot ta á le tchod’a hina d’id’a.
19Ar ang bur kabung wiyemba d’oze asung wiyeta d’i. Le sana mi bur ki sumamamba ni, azi djak a mba hlaneka hi tcho mazid’id’a.
20Le sana mi bur katchad’a habum wiyemid’a ni, mi mbud’umî zulona. Mandjufâ katcha ndata djak, a mba hlaneka hi tcho mazid’a, a mba bo ni bei grona mi.
21Le sana mi ve wiyema amamba ni, mi le ni sun nda ata yat tuo d’a, mi mbut ni wiyema zulona. Kayam ndata, a mba ka’î bei grona.
22Ar agi ngomogi gat manda pet ki vun man ma he ma tetengâ mi, agi lagi sunda kamu, kayam ambas sa an hagizi á kaka kua wanda, ti noyôgi woi d’i. 23Andjaf suma an nga ni digizi woi avorogi wana, agi tid’igi yam gat mazid’a d’i, kayam ni yam sun nda tcho d’a hina d’a ba, an mbud’uzi huyogon wana. 24An dagi ala: Ni agi ba, mba hlagi ambas mazid’a; an mba ni hagiziya. Nambas sa ambira ki mbul ayuma a nga sor kä kuad’a. An ni Ma didina Alo magi ma walagi woi kandjaf suma dingîna. 25Agi walagi ir d’uwarâ d’oze azureina d’oze ambureina d’oze aluweina, suma yed’etna ki suma ndjendjed’a tala agi mbud’ugi sum magina ndjendjed’a ki d’uwarâ d’oze kazureina d’oze kambureina d’oze kaluweina d’oze kahle suma a dram kä andaga suma ndjendje suma an noyôzi woina d’uo d’a.
26Agi kagagi ni man suma yed’etna, kayam an Ma didina ni Ma bei tchod’ina. An walagi kandjaf suma dingâ ni kayambala agi kagagi ni sum mana d’a.
27Le mandjufâ d’oze atchad’a a nga djop ki suma azuleina d’oze a djop yam vama nga mbana ni, agi duruzi kahinad’a, agi tchazi woyo. Buzuwazi mba mi hulong kaziya.
Currently Selected:
Sunda hi suma hi Levi-nid’a 20: BA
Highlight
Share
Compare
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
